ក្រុមអ្នកតាំងលំនៅអ៊ីស្រាអែល ដុតបំផ្លាញវិហារឥស្លាម នៅក្នុងតំបន់វែសប៊ែង បង្ក​ជា​ក្ដី​បារម្ភ​ខ្លាំង

ក្រុមអ្នកតាំងលំនៅជនជាតិអ៊ីស្រាអែល បានធ្វើការវាយប្រហារដោយដុតបំផ្លាញវិហារឥស្លាម Al-Taqwa នៅក្នុងភូមិ Al-Tuwani ស្ថិតក្នុងតំបន់វែសប៊ែង កាលពីយប់ថ្ងៃទី១៩ ខែកក្កដា ឆ្នាំ២០២៦។ នេះ​បើយោងតាម​ការ​លើក​ឡើងរបស់​អាជ្ញាធរ​ប៉ាឡេស្ទីន ដែល​ត្រូវបាន​ចុះផ្សាយ​សារព័ត៌មាន AFP។

ក្រៅពីការដុតវិហារឥស្លាម ក្រុមអ្នកតាំងលំនៅដែលខ្លះបានពាក់ម៉ាស់បិទបាំង​មុខ ក៏បានដុតបំផ្លាញផ្ទះប្រជាពលរដ្ឋចំនួនពីរខ្នង និងរោងចក្រផលិតទឹកដោះគោមួយកន្លែង ក្នុងសហគមន៍ Masafer Yatta ផងដែរ។

យោងតាមការបញ្ជាក់ពីលោក Mohammed Rabie ដែលជាប្រធានក្រុមប្រឹក្សាភូមិ ក្រុមអ្នកតាំងលំនៅ​អ៊ីស្រាអែល បានបាញ់ថ្នាំពណ៌ សរសេរជាភាសាហេប្រ៊ូ (Hebrew) នៅលើជញ្ជាំងវិហារ ហើយបានរត់គេចខ្លួនបាត់ទៅវិញ បន្ទាប់ពីប្រជាពលរដ្ឋក្នុងភូមិ បាននាំគ្នាចេញមកការពារ និងជួយពន្លត់អណ្តាតភ្លើងមិនឱ្យឆេះរាលដាលធ្ងន់ធ្ងរ។ ព្រឹត្តិការណ៍នេះ ត្រូវបានគេមើលឃើញថា ជាផ្នែកមួយនៃសកម្មភាពវាយប្រហារដ៏កើនឡើង ដែលបង្កឡើងដោយក្រុមអ្នកតាំងលំនៅប្រឆាំងនឹងសហគមន៍ប៉ាឡេស្ទីន ចាប់តាំងពីការផ្ទុះឡើងនៃសង្គ្រាមនៅហ្គាហ្សា ក្នុងឆ្នាំ២០២៣។

ប៉ូលិសអ៊ីស្រាអែល បានចេញសេចក្តីថ្លែងការណ៍ថា ពួកគេបានបញ្ជូនកម្លាំងចុះទៅកាន់កន្លែងកើតហេតុ ដើម្បីធ្វើការស៊ើបអង្កេត ជុំវិញការខូចខាតដែលបន្សល់ទុក។ ទោះជាយ៉ាងណាក៏ដោយ សកម្មជនប៉ាឡេស្ទីន លោក Osama Makhamra បានចោទប្រកាន់ថា ការវាយប្រហារនេះ បានកើតឡើងនៅចំពោះមុខរបស់កងទ័ពអ៊ីស្រាអែលផ្ទាល់តែម្តង ដោយសារតែមានប៉មយាមរបស់យោធាស្ថិតនៅក្បែរទីតាំងកើតហេតុ។

ក្រសួងកិច្ចការសាសនារបស់ប៉ាឡេស្ទីន បានចេញសេចក្តីថ្លែងការណ៍ថ្កោលទោសយ៉ាងខ្លាំងក្លាចំពោះសកម្មភាពនេះ ដោយចាត់ទុកថាជាអំពើភេរវកម្មពេញទំហឹង និងបានចោទប្រកាន់រដ្ឋាភិបាលជ្រុលនិយមរបស់អ៊ីស្រាអែលថា បានលើកទឹកចិត្តឱ្យមានអំពើហិង្សា ដើម្បីបណ្តេញប្រជាជនប៉ាឡេស្ទីនចេញពីតំបន់ Masafer Yatta។ ការិយាល័យសម្របសម្រួលកិច្ចការមនុស្សធម៌ របស់អង្គការសហប្រជាជាតិ (OCHA) ក៏បានរាយការណ៍ដែរថា អំពើហិង្សារបស់អ្នកតាំងលំនៅអ៊ីស្រាអែល ក្នុងតំបន់វែសប៊ែង បានកើនឡើងដល់កម្រិតដែលមិនធ្លាប់មានពីមុនមក ដោយមានករណីវាយប្រហារជាមធ្យម ៦ដងក្នុងមួយថ្ងៃ ដែលបណ្តាលឱ្យមានការខូចខាតទ្រព្យសម្បត្តិ និងរងរបួសជា​ច្រើន៕

ប្រែសម្រួល៖ ឈាង