ព័ត៌មានអន្ដរជាតិ

រដ្ឋសភាអាមេរិក អនុម័តកញ្ចប់ថវិកាយោធា ១.១៥ទ្រីលានដុល្លារ ពង្រីកកិច្ចសហប្រតិបត្តិការជាមួយអ៊ីស្រាអែល

បានផុស

៥១ វិនាទី មុន

នៅ

ថ្ងៃព្រហស្បតិ៍ ២៣ កក្កដា ២០២៦

ដោយ

សមាជិកសភាអាមេរិកមកពីគណបក្សសាធារណរដ្ឋរបស់ប្រធានាធិបតី ដូណាល់ ត្រាំ បានអនុម័តច្បាប់សម្រាប់កញ្ចប់ថវិកាចំណាយយោធាដ៏ច្រើនសន្ធឹកសន្ធាប់ រហូតដលត់ ១.១៥ ទ្រីលានដុល្លារ លើកិច្ចសហប្រតិបត្តិការបច្ចេកវិទ្យាយោធាជាមួយអ៊ីស្រាអែល ទោះបីជាមានការព្រួយបារម្ភពីសមាជិកសភាមកពីប្រជាធិបតេយ្យលើតម្លៃនិងការប្រើប្រាស់បច្ចេកវិទ្យាកាន់តែខ្លាំងក៏ដោយ។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Reuters, AP និង Al Jazeera នៅថ្ងៃទី២៣ ខែកក្កដា ឆ្នាំ២០២៦ ។

យោធាអាមេរិកនិងអ៊ីស្រាអែល។ រូបភាព៖ The star

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីព្រាងច្បាប់នេះត្រូវបានអនុម័តក្នុងសភាកាលពីថ្ងៃពុធ ដោយសំឡេងគាំទ្រប្រផិតប្រផើយ ២១៦ ទល់នឹង ២១២ សំឡេង ដោយសមាជិកសភាមកពីគណបក្សទាំងពីរប្រកាន់ខ្ជាប់នូវគោលជំហររបស់គណបក្ស លើកលែងតែសមាជិកសភាប្រជាធិបតេយ្យចំនួន ៦រូបបោះឆ្នោតគាំទ្រ និងសមាជិកសភាសាធារណរដ្ឋចំនួន ៧រូបបានជំទាស់។

លោក Thomas Massie តំណាងរាស្រ្តសាធារណរដ្ឋ បានប៉ះទង្គិចពាក្យសម្តីជាមួយសេតវិមាននិងជាអ្នករិះគន់យ៉ាងខ្លាំង ចំពោះសង្គ្រាមលើអ៊ីរ៉ង់ បង្ហោះសារមួយឆ្លើយតបទៅនឹងការបោះឆ្នោតថា៖ « ចំនួនសំឡេងឆ្នោតចុងក្រោយសម្រាប់ច្បាប់អនុញ្ញាតលើវិស័យការពារជាតិ(NDAA) នៅថ្ងៃនេះ រួមបញ្ចូលគ្នាយ៉ាងសោកសៅនូវបច្ចេកវិទ្យាយោធា និងខ្សែសង្វាក់ផ្គត់ផ្គង់របស់យើងជាមួយអ៊ីស្រាអែល។ សង្ឃឹមថា កំណែនេះនឹងបរាជ័យនៅក្នុងព្រឹទ្ធសភា ពីព្រោះមាត្រា២១៩ គឺជាការក្បត់អធិបតេយ្យភាពរបស់យើង»។

មិនតែប៉ុណ្ណោះច្បាប់អនុញ្ញាតការពារជាតិឆ្នាំ២០២៧ ឬ NDAA គឺជាការឆ្លុះបញ្ចាំងពីសំណើរបស់ប្រធានាធិបតី លោក ដូណាល់ ត្រាំ សម្រាប់ថវិកាយោធាកើនឡើងយ៉ាងខ្លាំង មិនអាចប្រៀបផ្ទឹមបានរបស់ប្រទេស ដោយស្វែងរកការបង្កើនការចំណាយពី ៩០០ប៊ីលានដុល្លារកាលពីឆ្នាំ មុនដល់ ១.៥ទ្រីលានដុល្លារ។

NDAA នៅឆ្នាំ ២០២៧ ក៏ទទួលបានការចាប់អារម្មណ៍យ៉ាងខ្លាំង ចំពោះវិធានការពង្រីកកិច្ចសហប្រតិបត្តិការបច្ចេកវិទ្យាយោធាជាមួយអ៊ីស្រាអែល ទោះបីជាមានការគាំទ្រក្នុងចំណោមអ្នកបោះឆ្នោត ដើម្បីបញ្ចប់ជំនួយយោធាដល់អ៊ីស្រាអែលក៏ដោយ៕

ណឺ មិនា