ព័ត៌មានអន្ដរជាតិ

អភិបាលក្រុងញូវយ៉ក ហៅ លោក ណេតាន់យ៉ាហ៊ូ ថាជាឧក្រិដ្ឋជនសង្គ្រាម ប្រកាសមិនស្វាគមន៍មេដឹកនាំរូបនេះ

បានផុស

៥ នាទី មុន

នៅ

ថ្ងៃពុធ ២២ កក្កដា ២០២៦

ដោយ

អភិបាលក្រុងញូវយ៉ក លោក Zohran Mamdani ដែលជាអ្នកគោរពសាសនាឥស្លាម បានហៅនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ថាជាឧក្រិដ្ឋជនសង្គ្រាមជាថ្មីម្តងទៀត ថែមទាំងជំរុញឱ្យរដ្ឋាភិបាលសហព័ន្ធសហរដ្ឋអាមេរិកអនុវត្តដីកាចាប់ខ្លួនមេដឹកនាំរូបនេះ ស្របតាមតុលាការឧក្រិដ្ឋកម្មអន្តរជាតិ (ICC) ប្រសិនបើចូលទឹកដីសហរដ្ឋអាមេរិក។ នេះបើយោងតាមទីភ្នាក់ងារសារព័ត៌មាន Anadolu និងសារព័ត៌មានអន្តរជាតិផ្សេងទៀត ផ្សាយនៅថ្ងៃទី២២ ខែកក្កដា ឆ្នាំ២០២៦ ។

អភិបាលក្រុងញូវយ៉ក លោក Zohran Mamdani ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Mamdani បានចេញសារតាមរយៈវីដេអូមួយកាលពីថ្ងៃអង្គារ លើបណ្តាញសង្គម X ថា៖ « លោក បេនចាមីន ណេតាន់យ៉ាហ៊ូ គឺជាឧក្រិដ្ឋជនសង្គ្រាម ជាអ្នកប្រព្រឹត្តអំពើប្រល័យពូជសាសន៍ដ៏គួរឱ្យរន្ធត់ប្រឆាំងនឹងប្រជាជនប៉ាឡេស្ទីន»។

អភិបាលក្រុងញ៉ូវយករូបនេះ បានលើកឡើងថា លោក ណេតាន់យ៉ាហ៊ូ ជាអ្នកទទួលខុសត្រូវ ចំពោះការសម្លាប់មនុស្សជាង ៧៣ ០០០នាក់ ដោយបានកំណត់គោលដៅដោយចេតនាលើមន្ទីរពេទ្យ ថែមទាំងរារាំងការផ្តល់ស្បៀងអាហារ និងជំនួយមនុស្សធម៌ទៅដល់ប្រជាជនខ្វះខាតនៅក្នុងតំបន់ហ្គាហ្សាទៀតផង។

លោក Mamdani និយាយថា សហរដ្ឋអាមេរិកត្រូវតែទទួលខុសត្រូវលើរឿងនេះ ពីព្រោះជនជាតិអាមេរិក បង់ប្រាក់សម្រាប់គ្រាប់បែកសម្លាប់មនុស្ស។

លោកបន្ថែមថា៖ « មានហេតុផលដែលតុលាការ ICC បានចេញដីកាចាប់ខ្លួនគាត់[ណេតាន់យ៉ាហ៊ូ]។ អ្នកមានភ្នែក បេះដូង សតិសម្បជញ្ញៈ គួរតែទទួលស្គាល់ការបំផ្លិចបំផ្លាញដែលគាត់បានបង្កឡើង ហើយយល់ថាគាត់ជាកម្មសិទ្ធិរបស់តុលាការ»។

លោក Mamdani បន្តថា រដ្ឋបាលរបស់លោកមិនមានសិទ្ធិអំណាចផ្នែកច្បាប់ឯករាជ្យ ដើម្បីអនុវត្តដីកាទេ។ លោកសង្កត់ធ្ងន់ថា៖ « ទោះជាយ៉ាងណាក៏ដោយ រដ្ឋាភិបាលសហព័ន្ធមានអំណាច ហើយខ្ញុំសូមអំពាវនាវឱ្យពួកគេចូលរួមជាមួយ ICC និងអនុវត្តដីកានេះ។ ខ្ញុំចង់បញ្ជាក់ឱ្យច្បាស់ដូចគ្នាថា លោក ណេតាន់យ៉ាហ៊ូ មិនស្វាគមន៍ឱ្យមកទីក្រុងញូវយ៉កទេ ហើយឧក្រិដ្ឋជនសង្គ្រាមផ្សេងទៀតក៏ដូចគ្នា»។

លោកបន្ថែមថា៖ « ខណៈទីក្រុងញូវយ៉កមិនអាចបញ្ចប់ការប្រល័យពូជសាសន៍ដោយខ្លួនឯងបាន តែយើងអាចសម្រេចចិត្តថា តើភាពស្ងៀមស្ងាត់របស់យើងនឹងក្លាយជាអាវុធមួយផ្សេងទៀតឬអត់។ យើងអាចពិនិត្យមើលគ្រប់ផ្លូវទាំងអស់ដែលយើងមាន ដើម្បីការពារមនុស្សជាតិ និងសេចក្តីថ្លៃថ្នូររបស់មនុស្សទាំងអស់»។

គួរបញ្ជាក់ថា តុលាការ ICC បានចេញដីកាចាប់ខ្លួន លោក ណេតាន់យ៉ាហ៊ូ និងអតីតរដ្ឋមន្ត្រីក្រសួងការពារជាតិ លោក Yoav Gallant ក្នុងខែវិច្ឆិកា ឆ្នាំ២០២៤ ពីបទឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងនឹងមនុស្សជាតិនៅតំបន់ហ្គាហ្សា៕