ការសិក្សា៖ អាយុជីវិតមនុស្សអាចកើនដល់ ១២០ ឆ្នាំ ក្នុងរយៈពេលជាច្រើនទសវត្សរ៍ខាងមុខ

ទូរទស្សន៍ស៊ុយអែត (SVT) បានរាយការណ៍កាលពីថ្ងៃអាទិត្យថា មនុស្សអាចរស់បាន ១២០ ឆ្នាំ ក្នុងរយៈពេលជាច្រើនទសវត្សរ៍ខាងមុខ ដោយសារតែច្ចេកវិទ្យាដូចជា បញ្ញាសិប្បនិមិត្ត (AI) និងចំណេះដឹងដែលទទួលបានពីជំងឺរាតត្បាតកូវីដ-១៩ ។

លោក Ignat Kulkov អ្នកស្រាវជ្រាវនៅសាកលវិទ្យាល័យ Malardalen បានប្រាប់ SVT ថា “តាមការព្យាករណ៍របស់យើង មនុស្សអាចមានអាយុកាលចន្លោះពី ១០០ ទៅ ១២០ ឆ្នាំ ក្នុងរយៈពេល ៥០ ឆ្នាំ ឬយូរជាងនេះ នៅក្នុងប្រទេសអភិវឌ្ឍន៍” ។ ចំណែកឯមនុស្សចាស់ក៏ត្រូវបានគេរំពឹងថា មានសុខភាពល្អដូចមនុស្សវ័យ ៤០ ឆ្នាំដែរ ។

មនុស្សកាន់តែច្រើននឹងពាក់ឧបករណ៍ដែលភ្ជាប់ជាមួយគ្រូពេទ្យ និងមន្ទីរពេទ្យ ដើម្បីតាមដានស្ថានភាពសុខភាពរបស់ពួកគេ ហើយជួយឲ្យរស់បានយូរ និងមានសុខភាពល្អ ។

គួរបញ្ជាក់ថា ជំងឺរាតត្បាតកូវីដ-១៩ បានបណ្តាលឱ្យមានចំណេះដឹងកាន់តែប្រសើរឡើងអំពីរបៀបតាមដានមេរោគ ខណៈដែល AI ត្រូវបានប្រើដើម្បីធ្វើរោគវិនិច្ឆ័យជំងឺលឿនជាងមុន និងដើម្បីបង្កើតវិធីព្យាបាលថ្មីៗទៀតផង ។

ដោយឡែកលោក Kulkov បានកត់សម្គាល់ថា​ ទោះជាយ៉ាងណា មនុស្សនឹងប្រឈមជាមួយបញ្ហាថ្មីៗផងដែរដូចជា ការប្រែប្រួលអាកាសធាតុដែលមានឥទ្ធិពលធំបំផុតលើប្រព័ន្ធថែទាំសុខភាពទាំងពេលអនាគត និងបច្ចុប្បន្ន ៕

ប្រែសម្រួល៖ វារី

ប្រភព៖ cgtn

ចុចអាន៖ អ្នកវិទ្យាសាស្ត្ររកឃើញវិធី ធ្វើឲ្យមនុស្សមានអាយុវែង