ព័ត៌មានអន្ដរជាតិ
ធ្លាយតម្រុយទាញ អាមេរិក ជាប់ពាក់ព័ន្ធការវាយប្រហារភេរវកម្មនៅ រុស្ស៊ី
កាលពីរាត្រីថ្ងៃសុក្រ ទី២២ ខែមីនាកន្លងទៅ រុស្ស៊ីបានជួបប្រទះហេតុការណ៍ដ៏តក់ស្លុត និងសោកសង្រេងមួយ បន្ទាប់ពីជនដៃដល់ដែលមានគ្នា ៤ នាក់បានបើកការបាញ់រះ និងបំផ្ទុះគ្រាប់បែកនៅសាលប្រគំតន្រ្តី Crocus City Hall ក្នុងទីក្រុងមូស្គូ បណ្ដាលឲ្យមនុស្សប្រមាណ ១៣៧ នាក់ស្លាប់បាត់បង់ជីវិត និងជាង ១៨០ នាក់រងរបួស ខណៈរុស្ស៊ីបានដាក់ផ្ទាំងស៊ីបថាគ្មានអ្នកណាឆ្ងាយពីអាមេរិក និងអ៊ុយក្រែនឡើយ បើទោះបីជាក្រុមរដ្ឋឥស្លាមអះអាងទទួលខុសត្រូវលើការវាយប្រហារនេះក៏ដោយ ។
ជាក់ស្ដែងយោងតាមការចេញផ្សាយដោយសារព័ត៌មានរុស្ស៊ី Sputnik បានឲ្យដឹងថា មុនកើតការវាយប្រហារភេរវកម្មប្រមាណជា ២ សប្ដាហ៍ ពោលនៅថ្ងៃទី៧ ខែមីនា សហរដ្ឋអាមេរិកបានចេញសេចក្តីណែនាំដល់ពលរដ្ឋរបស់ខ្លួនកុំឲ្យធ្វើដំណើរទៅកាន់ប្រទេសរុស្ស៊ី និងបានព្រមានពលរដ្ឋអាមេរិកដែលកំពុងរស់នៅក្នុងទឹកដីរុស្ស៊ីស្រាប់ កុំឲ្យចូលរួមក្នុងការប្រមូលផ្ដុំធំៗ ជាពិសេសការប្រគំតន្ត្រីតែម្ដង ។
បន្ទាប់ពីការវាយប្រហារនេះហើយ អ្នកនាំពាក្យក្រុមប្រឹក្សាសន្តិសុខជាតិសេតវិមាន លោកស្រី Adrienne Watson បានបញ្ជាក់ថា សហរដ្ឋអាមេរិកបានចែករំលែកព័ត៌មានជាមួយរុស្ស៊ីអំពីការរៀបចំការវាយប្រហារភេរវកម្មនៅក្នុងរដ្ឋធានីរុស្ស៊ី ដោយដាក់មុខព្រួញចំៗថាគឺនៅកន្លែងដែលមានមនុស្សច្រើននេះឯង ។
ទន្ទឹមនោះ រឿងហេតុទាំងប៉ុន្មាន ក៏ដោយសារតែទីភ្នាក់ងារសន្តិសុខរុស្ស៊ីមានចន្លោះប្រហោង ក៏ដូចជាមើលស្រាលស្ថានការណ៍ ទើបបណ្ដាលឲ្យក្រុមភេរវករអាចដើរហើរចូលទៅក្នុងសាលប្រគំតន្ត្រីបានយ៉ាងរំភើយបែបនេះ ។ ទោះយ៉ាងណាក៏ដោយ មន្ត្រីពាក់ព័ន្ធរុស្ស៊ីកើតទុក្ខមិនសុខចិត្តឡើយ ហើយថែមទាំងពាក់មុខយក្សទៅចារកម្មអាមេរិកថាខ្វះព័ត៌មានលម្អិតជាក់លាក់ ។
ទាក់ទិននឹងបញ្ហានេះដែរ ទីភ្នាក់ងារ Intel របស់អាមេរិកក៏បានជូនដំណឹងរយៈពេល ២ សប្ដាហ៍ មុនការបោះឆ្នោតប្រធានាធិបតីរុស្ស៊ីផងដែរ ហើយទីភ្នាក់ងារចារកម្មមួយនេះចាត់ទុកថា រុស្ស៊ីខ្លួនឯងទៅវិញទេដែលជាអ្នកធ្វេសប្រហែស ពោលក្រោយការបោះឆ្នោត កងកម្លាំងសន្តិសុខរុស្ស៊ីប្រហែលជាទម្លាក់ដៃការយាមកាមរបស់ពួកគេ ដោយបង្ហាញក្ដីជឿជាក់ថា នឹងគ្មានការវាយប្រហារភេរវកម្មដ៏សាហាវយង់ឃ្នងកើតមានលើទីកដីរុស្ស៊ីនោះឡើយ ។
បន្ថែមពីនេះ សហរដ្ឋអាមេរិកថែមទាំងឌឺដងផ្លែផ្កាឲ្យរុស្ស៊ីទៀតថា កំពុងជួបរឿងអាម៉ាស់ដែលមិនអាចទប់ស្កាត់ស្ថានភាពដ៏អាក្រក់នេះបាន ជាពិសេសលោកប្រធានាធិបតី វ្ល៉ាឌីមៀរ ពូទីន កំពុងតែបាក់មុខមាត់ ដោយសារតែលោកទើបតែឈ្នះឆ្នោតក្ដៅៗផង ។
ពាក់ព័ន្ធនឹងហេតុការណ៍ដ៏សាហាវឃោរឃៅនេះទៀតសោត ថ្លែងនៅក្នុងសុន្ទរកថាតាមទូរទស្សន៍ទៅកាន់ប្រជាជាតិក្នុងរយៈពេលជិត ២០ ម៉ោង លោក ពូទីន ក៏បានប្រកាសយកថ្ងៃទី២៤ ខែមីនា ជាថ្ងៃកាន់ទុក្ខនៅទូទាំងប្រទេស ហើយគ្រប់ស្ថាប័ន ក៏ដូចជាស្ថានទូតរុស្ស៊ីទាំងអស់បានបង្ហូតទង់ជាតិពាក់កណ្ដាលដងដើម្បីចូលរួមរំលែកទុក្ខដល់ក្រុមគ្រួសាររបស់ជនរងគ្រោះ ជាពិសេសលោកប្ដេជ្ញានឹងកម្ចាត់ក្រុមភេរវករដែលសំងំលាក់ខ្លួនទាំងអស់ផងដែរ ។
គួរបញ្ជាក់ថា គិតត្រឹមពេលនេះ ជនសង្ស័យប្រមាណជា ១១ នាក់ហើយត្រូវបានចាប់ឃុំខ្លួន ខណៈក្រោយហេតុការណ៍ដ៏សោកសង្រេងនៅទីក្រុងមូស្គូនេះដែរ លោក ពូទីន ក៏ដូចជាប្រជាពលរដ្ឋ និងសាច់ញាតិនៃក្រុមគ្រួសាររបស់ជនរងគ្រោះក៏បានអុជទៀន និងដាក់កម្រងផ្កា ហើយមហាមិត្តរបស់រុស្ស៊ីជាច្រើនផ្ញើសារចូលរួមរំលែកទុក្ខដល់អ្នកស្លាប់បាត់បង់ជីវិត ស្របពេលដែលនេះក៏ជាការវាយប្រហារភេរវកម្មដ៏អាក្រក់បំផុតក្នុងប្រវត្តិសាស្ត្រសម័យទំនើបរបស់រុស្ស៊ីផងដែរ ៕
ដោយ ៖ សុខ ជីវ័ន្ត
ចុចអាន ៖ រុស្ស៊ី ថា អាមេរិក គួរតែប្រញាប់ប្រាប់ព័ត៌មានរឿងវាយប្រហារភេរវកម្មនៅ ក្រុងមូស្គូឲ្យហើយមក
-
ព័ត៌មានជាតិ៣ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ២០ ម៉ោង ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានអន្ដរជាតិ៦ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
កីឡា៦ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ៥ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
សន្តិសុខសង្គម២ ថ្ងៃ ago
សមត្ថកិច្ចស្រុកស្វាយលើ ឃាត់ខ្លួនប្តីប្រពន្ធ ១គូសង្ស័យរួមគំនិតសម្លាប់កូនខ្លួនឯង អាយុទើបតែ ២២ខែ
-
ព័ត៌មានជាតិ១ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
ព័ត៌មានជាតិ១៨ ម៉ោង ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»