ការ​សិក្សា​៖ ​ដើរ​បាន​ ៤០០០ ជំហាន​ក្នុង​មួយ​ថ្ងៃ​ អាច​កាត់​បន្ថយ​ហានិភ័យ​នៃ​ការ​ស្លាប់​

ការដើរត្រឹមតែ ៤ ០០០ ជំហានក្នុងមួយថ្ងៃ ជួយកាត់បន្ថយហានិភ័យនៃការស្លាប់ បើយោងតាមទស្សនាវដ្តី European Journal of Preventive Cardiology ។

ការសិក្សាចំនួន ១៧ អំពី “អត្ថប្រយោជន៍សុខភាពទាក់ទងនឹងការដើរ” បានបង្ហាញថា មនុស្សមិនសូវសកម្មដើរបានជាមធ្យម ៤០០០ ជំហានក្នុងមួយថ្ងៃ ប៉ុន្តែថយចុះហានិភ័យនៃការស្លាប់ដូចអ្នកដើរច្រើនដែរ ។ ជាពិសេសរាល់ ១០០០ ជំហានដែលដើរលើសអាចកាត់បន្ថយហានិភ័យនៃការស្លាប់បាន ១៥ ភាគរយ ។ យ៉ាងណាមនុស្សដែលដើរដល់រាប់ម៉ឺនជំហានក្នុងមួយថ្ងៃមិនបានបង្ហាញឲ្យឃើញនូវអត្ថប្រយោជន៍សុខភាពលើសនេះឡើយ ។

សម្រាប់ហានិភ័យនៃការស្លាប់ដោយសារជំងឺបេះដូង អ្នកស្រាវជ្រាវរកឃើញថា យើងគួរដើរមួយថ្ងៃ ២ ៣៣៧ ហើយបន្ថែម ៥០០ ជំហានទៀតដើម្បីកាត់បន្ថយហានិភ័យបាន ៧ ភាគរយ ។

ការសិក្សាបានឲ្យដឹងដែលថា មនុស្សអាយុក្រោម ៦០ ឆ្នាំគួរដើរចន្លោះពី ៧ ០០០ ទៅ ១៣ ០០០ ជំហានក្នុងមួយថ្ងៃ ជួយកាត់បន្ថយហានិភ័យនៃការស្លាប់ដល់ទៅ ៤៩ ភាគរយឯណោះ ។ ចំណែកឯអ្នកមានអាយុលើសពី ៦០ ឆ្នាំឡើងទៅ ការដើរពី ៦ ០០០ ទៅ ១០ ០០០ ជំហានជារៀងរាល់ថ្ងៃ ជួយកាត់បន្ថយហានិភ័យបាន ៤២ ភាគរយ ។

មិនតែប៉ុណ្ណោះ ការស្រាវជ្រាវកន្លងមកជាច្រើនបានបង្ហាញស្រដៀងគ្នាថា ការដើរជួយពង្រឹងសុខភាពបេះដូង និងកាត់បន្ថយហានិភ័យនៃជំងឺមហារីក ជំងឺទឹកនោមផ្អែម និងជំងឺវង្វេងទៀតផង ៕

ប្រែសម្រួល៖ វារី

ប្រភព៖ NBC

ចុចអាន៖ ការសិក្សា៖ អាយុជីវិតមនុស្សអាចកើនដល់ ១២០ ឆ្នាំ ក្នុងរយៈពេលជាច្រើនទសវត្សរ៍ខាងមុខ