វ៉ាក់សាំងចាក់តែមួយដូស Johnson & Johnson មានប្រសិទ្ធភាពខ្លាំងក្លាប្រឆាំងវីរុសបំប្លែងខ្លួនឥណ្ឌា ៨៥ ភាគរយ និងរយៈពេល ៨ ខែ

ក្រុមហ៊ុនឱសថ Johnson & Johnson បាននិយាយថា វ៉ាក់សាំងការពារជំងឺកូវីដ ១៩ ចាក់តែមួយដងរបស់ខ្លួន បានបង្កើតនូវសកម្មភាពខ្លាំងក្លាប្រឆាំងនឹងវីរុសបំប្លែងខ្លួនឥណ្ឌា “Delta” និងវីរុសបំប្លែងខ្លួនទូទៅផ្សេងៗទៀត ។

ក្រុមហ៊ុនសុខភាពដែលមានមូលដ្ឋាននៅសហរដ្ឋអាមេរិកមួយនេះ បាននិយាយថា ភាពធន់នៃការឆ្លើយតបប្រព័ន្ធភាពស៊ាំរបស់វ៉ាក់សាំងនេះ មានរយៈពេលយ៉ាងតិច ៨ ខែ ។ វាមានប្រសិទ្ធភាព ៨៥ ភាគរយ ហើយក៏អាចជួយការពារ ការចូលសម្រាកព្យាបាលនៅមន្ទីរពេទ្យ និងការស្លាប់ពីវីរុសនេះផងដែរ ។

លោក Mathai Mammen ប្រធានស្រាវជ្រាវ និងអភិវឌ្ឍនៅអាជីវកម្មឱសថរបស់ក្រុមហ៊ុនវ៉ាក់សាំង Johnson & Johnson បាននិយាយនៅក្នុងសេចក្តីថ្លែងការណ៍មួយថា “ទិន្នន័យពីការសិក្សាដែលរកឃើញពី ប្រសិទ្ធភាពការពារវីរុសបំប្លែងខ្លួនរយៈពេល ៨ ខែនេះ ក៏បានបង្ហាញដែលថា វ៉ាក់សាំងការពារជំងឺកូវីដ ១៩ Johnson & Johnson បង្កើតនូវការឆ្លើយតបអង់ទីគ័រខ្លាំងក្លា ប្រឆាំងនឹងវីរុសដែលឆ្លងរហ័សនេះ” ។

ក្រុមហ៊ុនបាននិយាយថា វ៉ាក់សាំងនេះ បង្កើតសកម្មភាពកម្ចាត់អង់ទីគ័រប្រឆាំងនឹងវីរុសបំប្លែងខ្លួនឥណ្ឌា “Delta” ក្នុងកម្រិតខ្ពស់ជាងអ្វីដែលត្រូវបានគេសង្កេតឃើញ ចំពោះការកម្ចាត់វីរុសបំប្លែងខ្លួនអាហ្វ្រិកខាងត្បូង “Beta” ទៅទៀត ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ វ៉ាក់សាំងចាក់តែមួយដូស Johnson & Johnson អះអាងថា មានប្រសិទ្ធភាពការពារកូវីដបំប្លែងខ្លួនច្រើនប្រភេទ