ឥណ្ឌា បញ្ចេញក្រុមអ្នកជំនាញទៅជួយរដ្ឋនានាដែលកើនឡើងករណីឆ្លងកូវីដខ្លាំងក្លា

រដ្ឋាភិបាលសហព័ន្ធឥណ្ឌានៅថ្ងៃសុក្រនេះ បានបញ្ជូនក្រុមអ្នកជំនាញកម្រិតខ្ពស់ទៅកាន់រដ្ឋនានា ដែលមានការកើនឡើងនៃករណីឆ្លងជំងឺ ១៩ ក្នុងគោលបំណងជួយពួកគេឲ្យប្រសើរឡើង នូវការឆ្លើយតប ការគ្រប់គ្រង និងការដោះស្រាយជំងឺរាតត្បាត ។

ដើម្បីជួយពង្រឹងកិច្ចខិតខំប្រឹងប្រែងរបស់រដ្ឋាភិបាលរដ្ឋផ្សេងៗ ក្នុងការគ្រប់គ្រងជំងឺកូវីដ ១៩ ក្រសួងសុខាភិបាលសហព័ន្ធ បាននិយាយនៅក្នុងសេចក្តីថ្លែងការណ៍មួយថា “រដ្ឋាភិបាលកណ្តាល បាននិងកំពុងដឹកនាំក្រុមតំណាងពីមួយពេលទៅមួយពេល ដើម្បីចុះទៅរដ្ឋផ្សេងៗទាំងនោះ” ។

ក្រសួងបាននិយាយថា “ក្រុមទាំងនេះមានទំនាក់ទំនងជាមួយអាជ្ញាធររដ្ឋ និងទទួលបានការយល់ដឹងដោយផ្ទាល់អំពីបញ្ហាប្រឈម និងបញ្ហាដែលពួកគេកំពុងពង្រឹងសកម្មភាពការពារជំងឺកូវីដ ១៩” ។

ក្រសួងបាននិយាយទៀតថា ក្រុមជាច្រើនកំពុងញាប់ដៃញាប់ទៅទៅកាន់រដ្ឋ Kerala រដ្ឋ Tripura រដ្ឋ Odisha រដ្ឋ Chhattisgarh និងរដ្ឋ Manipur ដោយសារតែការកើនឡើងចំនួនករណីឆ្លង នៃជំងឺកូវីដ ១៩ ត្រូវបានរាយការណ៍នៅរដ្ឋទាំងនេះ ។

ក្រសួងបញ្ជាក់ថា ក្រុមការងារថ្នាក់ខ្ពស់ដែលទៅកាន់រដ្ឋទាំងនេះ រួមមានអ្នកជំនាញខាងព្យាបាល និងអ្នកជំនាញផ្នែកសុខភាពសាធារណៈ ។ ក្រុមទាំងអស់នឹងចុះទៅរដ្ឋនានាជាបន្ទាន់ និងតាមដានការអនុវត្តទូទៅនៃការគ្រប់គ្រងជំងឺកូវីដ ១៩ ជាពិសេសរួមទាំងប្រតិបត្ដិការឃ្លាំមើល និងការទប់ស្កាត់ជាដើម ។

ការចុះទៅរដ្ឋនានារបស់ក្រុមជំនាញទាំងនេះ ក៏បំពាក់ទៅដោយគ្រែពេទ្យ ឡានពេទ្យ បំពង់ខ្យល់អុកស៊ីសែន និងបង្កើនយុទ្ធនាការចាក់វ៉ាក់សាំងការពារជំងឺកូវីដ ១៩ ជាដើម ។ ជាមួយគ្នានេះដែរ ក្រុមជំនាញនឹងវាយតម្លៃពីស្ថានភាពរោគរាតត្បាតក្នុងតំបន់ និងស្នើឲ្យមានវិធានការដោះស្រាយលើសុខភាពសាធារណៈដល់រដ្ឋាភិបាលរដ្ឋ ។

គួរបញ្ជាក់ថា គិតត្រឹមពេលនេះ ប្រទេសឥណ្ឌា មានករណីឆ្លងជំងឺកូវីដ ១៩ ជាង ៣០ លានករណី និងមានអ្នកស្លាប់លើស ៤០ ម៉ឺននាក់ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ កូវីដនៅ ឥណ្ឌា អ្នកស្លាប់កើនលើស ៤០ម៉ឺននាក់ហើយ