ព័ត៌មានអន្ដរជាតិ

ឆ្នាំនេះ COVAX គ្រោងផ្តល់វ៉ាក់សាំងឲ្យបាន៥២០លានដូសទៅអាហ្វ្រិក

បានផុស

៥ years មុន

នៅ

ថ្ងៃសុក្រ ៩ កក្កដា ២០២១

ដោយ

កម្មវិធីចែកចាយវ៉ាក់សាំងសកល COVAX គ្រោងនឹងផ្តល់វ៉ាក់សាំងបង្ការកូវីដ-១៩ឲ្យបានចំនួន៥២០លានដូសទៅទ្វីបអាហ្វ្រិកនៅក្នុងឆ្នាំនេះ។ នេះជាការឲ្យដឹងពីប្រធានគម្រោងកាលពីថ្ងៃព្រហស្បតិ៍ ទី៨ ខែកក្កដា។

លោក Aurelia Nguyen នាយកគ្រប់គ្រងគម្រោង COVAX បានប្រាប់សន្និសីទសារព័ត៌មានដែលរៀបចំឡើងដោយអង្គការសុខភាពពិភពលោកប្រចាំតំបន់អាហ្វ្រិកថា រហូតដល់ពេលនេះ គម្រោងមិនសប្បាយចិត្តនឹងដំណើរការផ្គត់ផ្គង់វ៉ាក់សាំងរបស់ខ្លួនឡើយ ប៉ុន្តែថា ការផ្គត់ផ្គង់នឹងបង្កើនចាប់ពីខែកញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផែនការផ្គត់ផ្គង់ត្រូវបានពន្យាពេលផ្នែកខ្លះដោយសារប្រទេសឥណ្ឌាបានរឹតត្បិតក្នុងការនាំចេញវ៉ាក់សាំងដែលបានរាំងស្ទះដល់គម្រោងដើម្បីទទួលបានវ៉ាក់សាំងពីវិទ្យាស្ថានឥណ្ឌា Serum ដែលជាស្ថាប័នផលិតវ៉ាក់សាំងបំផុតមួយក្នុងពិភពលោកដែលកំពុងផលិតវ៉ាក់សាំង AstraZeneca។

លោក Nguyen បានឲ្យដឹងថា រហូតដល់ពេលនេះ COVAX ទើបតែចែកចាយវ៉ាក់សាំងបង្ការកូវីដ-១៩បានចំនួន២៥លានដូសប៉ុណ្ណោះទៅកាន់ប្រទេសអាហ្វ្រិកចំនួន៤៤។

នៅត្រឹមបំណាច់ឆមាសទី១ ឆ្នាំ២០២២ គម្រោង COVAX គ្រោងនឹងបង្កើនការផ្គត់ផ្គង់ឲ្យបានជិត៨៥០លានដូសទៅទ្វីបអាហ្វ្រិកដែលជាកន្លែងមានអត្រាវ៉ាក់សាំងបង្ការកូវីដ-១៩ទាបជាងគេបំផុតក្នុងពិភពលោក។

កាលពីខែមីនា នាយកប្រតិបត្តិសម្ព័ន្ធវ៉ាក់សាំង Gavi ដែលជាអង្គការមួយសហការដឹកនាំគម្រោង COVAX បាននិយាយថា គម្រោងមានគោលដៅចែកចាយវ៉ាក់សាំងឲ្យបាន៧២០លានដូសទៅអាហ្វ្រិកនៅក្នុងឆ្នាំ២០២១។

លោក Nguyen បានឲ្យដឹងថា COVAX បានកំពុងពិភាក្សាជាមួយរដ្ឋាភិបាលឥណ្ឌា និងវិទ្យាស្ថានឥណ្ឌា Serum ដើម្បីបន្តទទួលបានវ៉ាក់សាំងនៅឆ្នាំនេះ បើទោះជាស្ថានភាពប្រែប្រួលក៏ដោយ៕

ប្រែសម្រួល៖ វីរបុត្រ
ប្រភព៖ Reuters

Related Topics:វ៉ាក់សាំងកូវីដ-១៩ កូវីដ-១៩ COVAX

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា