ព័ត៌មានអន្ដរជាតិ

មេបញ្ជាការជាន់ខ្ពស់អាមេរិកប្រចាំអាហ្វហ្គានីស្ថានលាលែងពីតំណែងម្សិលមិញ

បានផុស

៥ years មុន

នៅ

ថ្ងៃអង្គារ ១៣ កក្កដា ២០២១

ដោយ

ឧត្តមសេនីយ៍កំពូលរបស់អាមេរិក និងណាតូប្រចាំប្រទេសអាហ្វហ្គានីស្ថានបានផ្ទេរភារកិច្ចជាផ្លូវការហើយ នៅពេលបេសកកម្មយោធាដឹកនាំដោយសហរដ្ឋអាមេរិកខិតជិតដល់ទីបញ្ចប់ បន្ទាប់ពីប្រតិបត្តិការរយៈពេល២០ឆ្នាំ។

លោកឧត្តមសេនីយ៍ជាន់ខ្ពស់ Austin “Scott” Miller បានលាឈប់កាលពីថ្ងៃចន្ទ ម្សិលមិញ បន្ទាប់ពីលោកប្រធានាធិបតីអាមេរិក ចូ បៃដិន មានប្រសាសន៍ថា ប្រតិបត្តិការយោធាអាមេរិកនឹងត្រូវបញ្ចប់នៅថ្ងៃទី៣១ ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសណាតូផ្សេងទៀតរាប់ទាំងចក្រភពអង់គ្លេសក៏បានដកកម្លាំងយោធារបស់ខ្លួនជិតអស់ហើយមុនពេលកាលកំណត់របស់អាមេរិកមកដល់។

ការដកកម្លាំងយោធាចេញនេះស្របពេលដែលសកម្មប្រយុទ្ធតាលីបង់បានកំពុងកាន់កាប់តំបន់ជាច្រើនស្ទើរទូទាំងប្រទេសអាហ្វហ្គានីស្ថាន។

ក្នុងពិធីផ្ទេរតំណែងសាមញ្ញមួយកាលពីថ្ងៃចន្ទ លោកឧត្តមសេនីយ៍ Miller បានប្រគល់ភារកិច្ចរបស់លោកទៅឧត្តមសេនីយ៍អាមេរិក២រូប ដែលម្នាក់នឹងទទួលបន្ទុកសកម្មភាពយោធាអាមេរិកពីស្នងការកណ្តាលដែលមានទីស្នាក់ការនៅរដ្ឋហ្លរីដា និងម្នាក់ទៀតទទួលបន្ទុកគ្រប់គ្រងយោធា៦៥០នាក់ដែលបន្តនៅអាហ្វហ្គានីស្ថានដើម្បីការពារសុវត្ថិភាពស្ថានទូតអាមេរិក បន្ទាប់អាមេរិកដកយោធាចប់។

ថ្លែងសុន្ទរកថាដោយអារម្មណ៍រំជើបរំជួល លោក Miller បានប្រាប់អ្នកចូលរួមក្នុងពិធីដែលមានទាំងមន្ត្រីអាហ្វហ្គានីស្ថានជាន់ខ្ពស់ផងថា ៖«វាពិតជាសំខាន់សម្រាប់ខ្ញុំដើម្បីនិយាយលាអ្នកទាំងអស់គ្នា។ ការងាររបស់យើងឥឡូវនេះមិនអាចភ្លេចបានឡើយ»។

លោក Miller បានតួនាទីជាឧត្តមសេនីយ៍កំពូលក្នុងការគ្រប់គ្រងកម្លាំងយោធាអាមេរិក និងណាតូយូរជាងគេបំផុតប្រចាំប្រទេសអាហ្វហ្គានីស្ថានដែលលោកហៅថា ជាផ្នែកដ៏សំខាន់នៃអាជីពរបស់លោក៕