ប្រុងប្រយ័ត្ន! ថៃ ជួបគ្រោះរញ្ជួយដីមិនធ្លាប់មានពីមុនមកចំនួន ៤ លើក

ការរញ្ជួយដីតូចៗចំនួន ៤ ត្រូវបានគេកត់ត្រានៅក្នុងស្រុក Sri Sawat នៃខេត្ត Kanchanauburi ភាគខាងលិចប្រទេសថៃកាលពីយប់ថ្ងៃពុធ និងរហូតដល់ព្រឹកថ្ងៃព្រហស្បតិ៍ ខណៈកម្លាំងខ្លាំងបំផុតនៃការរញ្ជួយនេះគឺ ៣.៧ រ៉ិចទ័រ ។

ក្រុមអង្កេតនៃគ្រោះរញ្ជួយដីរបស់នាយកដ្ឋានឧតុនិយម បានរាយការណ៍ថា ការរញ្ជួយនេះកើតឡើងនៅតំបន់ Khao Jode និងចំណុចកណ្តាលរបស់វាស្ថិតនៅជម្រៅ ១ ទៅ ២ គីឡូម៉ែត្រ ។

ការរញ្ជួយលើកទីដំបូង គឺមានជម្រៅប្រហែល ២ គីឡូម៉ែត្រនៅម៉ោង ១០ យប់ និងមានកម្លាំង ២.១ រ៉ិចទ័រ ។ លើកទី ២ បានកើតឡើងនៅវេលាម៉ោង ១០ និង ១៨ នាទីយប់ មានកម្លាំង ៣.៧ រ៉ិចទ័រ និងមានជម្រៅ ២ គីឡូម៉ែត្រ ។

ចំណែកការរញ្ជួយលើកទី ៣ កើតឡើងនៅម៉ោង ២ និង ២២ នាទីយប់ មានកម្លាំង ២.២ រ៉ិចទ័រ ជម្រៅ ១ គីឡូម៉ែត្រ ហើយទី ៤ នៅកើឡើងនៅម៉ោង ៥ និង ២០ នាទីទៀបភ្លឺ មានកម្លាំង ២.៩ រ៉ិចទ័រ នៅជម្រៅ ១ គីឡូម៉ែត្រដូចគ្នា ។

ទន្ទឹមនោះលោក Wallop Mekphrueksawong នាយកការងារសាធារណៈ នៃអាជ្ញាធរអគ្គិសនីថៃបាននិយាយថា ការរញ្ជួយដីនេះស្ថិតនៅចម្ងាយ ៦៦ គីឡូម៉ែត្រខាងជើងទំនប់វារីអគ្គិសនី Srinagarind ក្នុងស្រុក Sri Sawat តែមួយ និងចម្ងាយ ៦៣ គីឡូម៉ែត្រខាងកើតនៃទំនប់វារីអគ្គិសនី Vajiralongkorn នៅស្រុក Thong Pha Phum ។ លោកបន្តថា ការរញ្ជួយជាបន្តបន្ទាប់នេះ មិនមានឥទ្ធិពលលើទំនប់វារីអគ្គិសនីទាំងនេះនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ស្រ្តី ថៃ ដេកស្លាប់ក្នុងផ្ទះ ­បន្ទាប់ពីចាក់វ៉ាក់សាំង លាយគ្នា