ស្ថានភាពកាន់តែអាក្រក់! ថៃ ដល់ថ្នាក់មានអ្នកស្លាប់តាមដងផ្លូវដោយសារ កូវីដ

លោកនាយករដ្ឋមន្រ្តី ប្រាយុទ្ធ ចាន់អូចា បានសម្តែងការព្រួយបារម្ភយ៉ាងខ្លាំង ចំពោះមនុស្សដែលស្លាប់ដោយសារជំងឺកូវីដ-១៩ បន្ទាប់ពីមិនបានទទួលការព្យាបាលទាន់ពេលវេលា។ លោក បានណែនាំដល់ភ្នាក់ងារ ដែលពាក់ព័ន្ធទាំងអស់ ដើម្បីដោះស្រាយបញ្ហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងកិច្ចប្រជុំរបស់ មជ្ឈមណ្ឌលគ្រប់គ្រងស្ថានភាពសេដ្ឋកិច្ច (CESA) តាមរយៈវីដេអូកាលពីថ្ងៃព្រហស្បតិ៍ លោកប្រាយុទ្ធ បាននិយាយថា “អ្នកត្រូវតែជួយខ្ញុំរកវិធីកាត់បន្ថយចំនួនអ្នកឆ្លងជំងឺ ដែលស្នាក់នៅផ្ទះ ហើយរង់ចាំឡានពេទ្យ ឬរង់ចាំតាមដងផ្លូវ”។

លោកនាយករដ្ឋមន្រ្តីបន្តថា “រូបភាពបែបនេះ មិនត្រូវឲ្យឃើញម្តងទៀតទេ។ វាជាការទទួលខុសត្រូវរបស់ទីភ្នាក់ងារទាំងអស់ មិនត្រឹមតែក្រសួងសុខាភិបាលម្នាក់ឯងទេ។ ភ្នាក់ងារដែលពាក់ព័ន្ធ ត្រូវតែស្វែងរកមធ្យោបាយដើម្បីនាំមនុស្សទាំងនេះ ទៅមន្ទីរពេទ្យ”។

លោកបានធ្វើការកត់សម្គាល់បែបនេះ បន្ទាប់ពីមានការរិះគន់ទៅលើការពន្យាពេល ក្នុងការប្រមូលសាកសពមនុស្សម្នាក់ ក្នុងចំណោមបីនាក់ ដែលត្រូវបានគេប្រទះឃើញនៅតាមដងផ្លូវ ក្នុងខណ្ឌ Phon Nakhon កាលពីយប់ថ្ងៃអង្គារ។

សពដែលរុំដោយក្រណាត់ស ហើយដេកនៅលើចិញ្ចើមផ្លូវ ត្រូវបានទុកចោល គ្មានអ្នកមកយករយៈពេលជិត ១២ ម៉ោងហើយរឿងនេះ បានបង្កឲ្យមានការខឹងសម្បារជាសាធារណៈ។ សពទី២ ត្រូវបានគេប្រទះឃើញនៅមហាវិថី Ratchadamnoen និងសពទី៣ ត្រូវបានរកឃើញនៅតំបន់ Sao Chingcha។

បន្ទាប់ពីការធ្វើតេស្តលើសពទាំងអស់ ក្រុមគ្រូពេទ្យបានរកឃើញថា ពួកគេសុទ្ធតែមាន វិជ្ជមានជំងឺកូវីដ-១៩៕

ប្រែសម្រួល៖ Vann Vann

ប្រភព៖ Bankgkok Post

ចុចអាន៖ ស្រ្តីថៃ ដេកស្លាប់ក្នុងផ្ទះ ­បន្ទាប់ពីចាក់វ៉ាក់សាំង លាយគ្នា