សម្ព័ន្ធមិត្ត៣ប្រទេស នឹងជួបប្រជុំគ្នាលើកដំបូង នៅ សេតវិមាន ដើម្បីរកវិធីទប់ទល់ចិន

តាមការឲ្យដឹងពីសេតវិមាននៅថ្ងៃអង្គារទី១៩ខែមីនា ប្រធានាធិបតីអាមេរិកលោក Joe Biden នឹងរៀបចំកិច្ចប្រជុំកំពូលត្រីភាគីជាលើកដំបូង ជាមួយមេដឹកនាំហ្វីលីពីន និងជប៉ុន នៅថ្ងៃទី១១ខែមេសាខាងមុខ ខណៈសហរដ្ឋអាមេរិក កំពុងព្យាយាមពង្រឹងសម្ព័ន្ធភាព ដើម្បីទប់ទល់ប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួបរបស់លោក Biden ជាមួយប្រធានាធិបតីហ្វីលីពីន Ferdinand Marcos និងនាយករដ្ឋមន្ត្រីជប៉ុន Fumio Kishida នៅសេតវិមាន គឺជាជំនួបថ្មីមួយទៀត ដែលអាមេរិករៀបចំឡើងជាមួយសម្ព័ន្ធមិត្តអាស៊ីប៉ាស៊ីហ្វិក។

ពាក់ព័ន្ធរឿងនេះ អ្នកនាំពាក្យសេតវិមានលោកស្រី Karine Jean-Pierre និយាយថា “ថ្នាក់ដឹកនាំទាំង៣ នឹងជំរុញភាពជាដៃគូត្រីភាគី ដែលបង្កើតឡើងផ្អែកលើទំនាក់ទំនងជាប្រវត្តិសាស្ត្រដ៏ស៊ីជម្រៅនៃមិត្តភាព រួមទាំងចក្ខុវិស័យចែករំលែកសម្រាប់តំបន់ឥណ្ឌូប៉ាស៊ីហ្វិកសេរី និងបើកចំហផងដែរ”។

សហរដ្ឋអាមេរិក បានអំពាវនាវម្តងហើយម្តងទៀតឲ្យមានតំបន់អាស៊ីប៉ាស៊ីហ្វិកដោយសេរី ចំពេលប្រទេសចិនបង្កើនឥទ្ធិពលរបស់ខ្លួន ជាពិសេសលើការទាមទារដែនអធិបតេយ្យ ស្ទើរតែទាំងអស់នៃសមុទ្រចិនខាងត្បូង។

ជុំវិញភាពតានតឹងជាមួយចិននេះដែរ, ជប៉ុន និងហ្វីលីពីន បានគូសបញ្ជាក់កាលពីខែវិច្ឆិកាឆ្នាំ២០២៣ថា ភាគីទាំងពីរ នឹងចាប់ផ្តើមកិច្ចចរចាសម្រាប់កតិកាសញ្ញាការពារជាតិ ដែលអនុញ្ញាតឲ្យពួកគេដាក់ពង្រាយកងទ័ពនៅលើទឹកដីរបស់គ្នាទៅវិញទៅមក។

ងាកទៅជំនួបនៅឯសេតវិមានឯណោះវិញ រដ្ឋាភិបាលទីក្រុងវ៉ាស៊ីនតោននិយាយថា ក្រោយកិច្ចប្រជុំត្រីភាគី លោក Biden នឹងមានជំនួបទ្វេភាគីដាច់ដោយឡែកមួយទៀត ជាមួយលោក Marcos ដើម្បី​បញ្ជាក់​ជា​ថ្មី​ អំពី​ចំណងសម្ព័ន្ធភាព​ដែកថែប​រវាង​សហរដ្ឋ​អាមេរិក និង​ហ្វីលីពីន។

យ៉ាងណាមិញ នាយករដ្ឋមន្ត្រីជប៉ុន លោក Kishida នឹងទៅដល់សេតវិមានមុនមួយថ្ងៃ ពោលគឺនឹងទៅដល់នៅថ្ងៃទី១០ខែមេសា សម្រាប់ដំណើរទស្សនកិច្ចផ្លូវរដ្ឋដែលប្រកាសរួចហើយ។

ពាក់ព័ន្ធទំនាក់ទំនងរវាងទីក្រុងតូក្យូនិងទីក្រុងម៉ានីល, កាល​ពី​ឆ្នាំ​មុន លោក Kishida បាន​ក្លាយ​ជា​មេដឹកនាំ​ជប៉ុន​ដំបូង​គេ​ ដែល​ធ្វើ​ទស្សនកិច្ច​​ហ្វីលីពីន ​ចាប់​តាំង​ពី​ឆ្នាំ២០១៧។ 

ក្នុងប្រវត្តិសាស្រ្ត ជប៉ុន បានឈ្លានពាននិងដាក់អាណានិគមលើហ្វីលីពីន ក្នុងអំឡុងសង្គ្រាមលោកលើកទី២ ប៉ុន្តែចាប់តាំងពីពេលនោះមកប្រទេសទាំងពីរ មានទំនាក់ទំនងកាន់តែជិតស្និទ្ធដោយសារតែវិស័យពាណិជ្ជកម្មនិងការវិនិយោគ ហើយថ្មីៗនេះ ភាគីទាំងពីរថែមទាំងពួតដៃគ្នា ទប់ទល់នឹងឥទ្ធិពលរបស់ចិននៅក្នុងតំបន់ទៀតផង៕

អត្ថបទ៖ សុខ សុវណ្ណ

ចុចអាន៖ លោក Blinken ទៅដល់ហ្វីលីពីន ចំពេលភាពតានតឹងនៅសមុទ្រចិនខាងត្បូង ឡើងកម្តៅខ្លាំង