ព័ត៌មានអន្ដរជាតិ
សម្ព័ន្ធមិត្ត៣ប្រទេស នឹងជួបប្រជុំគ្នាលើកដំបូង នៅ សេតវិមាន ដើម្បីរកវិធីទប់ទល់ចិន
តាមការឲ្យដឹងពីសេតវិមាននៅថ្ងៃអង្គារទី១៩ខែមីនា ប្រធានាធិបតីអាមេរិកលោក Joe Biden នឹងរៀបចំកិច្ចប្រជុំកំពូលត្រីភាគីជាលើកដំបូង ជាមួយមេដឹកនាំហ្វីលីពីន និងជប៉ុន នៅថ្ងៃទី១១ខែមេសាខាងមុខ ខណៈសហរដ្ឋអាមេរិក កំពុងព្យាយាមពង្រឹងសម្ព័ន្ធភាព ដើម្បីទប់ទល់ប្រទេសចិន។
![](https://www.kampucheathmey.com/wp-content/uploads/2024/03/image-989-1024x576.png)
ជំនួបរបស់លោក Biden ជាមួយប្រធានាធិបតីហ្វីលីពីន Ferdinand Marcos និងនាយករដ្ឋមន្ត្រីជប៉ុន Fumio Kishida នៅសេតវិមាន គឺជាជំនួបថ្មីមួយទៀត ដែលអាមេរិករៀបចំឡើងជាមួយសម្ព័ន្ធមិត្តអាស៊ីប៉ាស៊ីហ្វិក។
ពាក់ព័ន្ធរឿងនេះ អ្នកនាំពាក្យសេតវិមានលោកស្រី Karine Jean-Pierre និយាយថា “ថ្នាក់ដឹកនាំទាំង៣ នឹងជំរុញភាពជាដៃគូត្រីភាគី ដែលបង្កើតឡើងផ្អែកលើទំនាក់ទំនងជាប្រវត្តិសាស្ត្រដ៏ស៊ីជម្រៅនៃមិត្តភាព រួមទាំងចក្ខុវិស័យចែករំលែកសម្រាប់តំបន់ឥណ្ឌូប៉ាស៊ីហ្វិកសេរី និងបើកចំហផងដែរ”។
![](https://www.kampucheathmey.com/wp-content/uploads/2024/03/image-991.png)
សហរដ្ឋអាមេរិក បានអំពាវនាវម្តងហើយម្តងទៀតឲ្យមានតំបន់អាស៊ីប៉ាស៊ីហ្វិកដោយសេរី ចំពេលប្រទេសចិនបង្កើនឥទ្ធិពលរបស់ខ្លួន ជាពិសេសលើការទាមទារដែនអធិបតេយ្យ ស្ទើរតែទាំងអស់នៃសមុទ្រចិនខាងត្បូង។
ជុំវិញភាពតានតឹងជាមួយចិននេះដែរ, ជប៉ុន និងហ្វីលីពីន បានគូសបញ្ជាក់កាលពីខែវិច្ឆិកាឆ្នាំ២០២៣ថា ភាគីទាំងពីរ នឹងចាប់ផ្តើមកិច្ចចរចាសម្រាប់កតិកាសញ្ញាការពារជាតិ ដែលអនុញ្ញាតឲ្យពួកគេដាក់ពង្រាយកងទ័ពនៅលើទឹកដីរបស់គ្នាទៅវិញទៅមក។
![](https://www.kampucheathmey.com/wp-content/uploads/2024/03/image-990.png)
ងាកទៅជំនួបនៅឯសេតវិមានឯណោះវិញ រដ្ឋាភិបាលទីក្រុងវ៉ាស៊ីនតោននិយាយថា ក្រោយកិច្ចប្រជុំត្រីភាគី លោក Biden នឹងមានជំនួបទ្វេភាគីដាច់ដោយឡែកមួយទៀត ជាមួយលោក Marcos ដើម្បីបញ្ជាក់ជាថ្មី អំពីចំណងសម្ព័ន្ធភាពដែកថែបរវាងសហរដ្ឋអាមេរិក និងហ្វីលីពីន។
យ៉ាងណាមិញ នាយករដ្ឋមន្ត្រីជប៉ុន លោក Kishida នឹងទៅដល់សេតវិមានមុនមួយថ្ងៃ ពោលគឺនឹងទៅដល់នៅថ្ងៃទី១០ខែមេសា សម្រាប់ដំណើរទស្សនកិច្ចផ្លូវរដ្ឋដែលប្រកាសរួចហើយ។
![](https://www.kampucheathmey.com/wp-content/uploads/2024/03/image-992-1024x576.png)
ពាក់ព័ន្ធទំនាក់ទំនងរវាងទីក្រុងតូក្យូនិងទីក្រុងម៉ានីល, កាលពីឆ្នាំមុន លោក Kishida បានក្លាយជាមេដឹកនាំជប៉ុនដំបូងគេ ដែលធ្វើទស្សនកិច្ចហ្វីលីពីន ចាប់តាំងពីឆ្នាំ២០១៧។
ក្នុងប្រវត្តិសាស្រ្ត ជប៉ុន បានឈ្លានពាននិងដាក់អាណានិគមលើហ្វីលីពីន ក្នុងអំឡុងសង្គ្រាមលោកលើកទី២ ប៉ុន្តែចាប់តាំងពីពេលនោះមកប្រទេសទាំងពីរ មានទំនាក់ទំនងកាន់តែជិតស្និទ្ធដោយសារតែវិស័យពាណិជ្ជកម្មនិងការវិនិយោគ ហើយថ្មីៗនេះ ភាគីទាំងពីរថែមទាំងពួតដៃគ្នា ទប់ទល់នឹងឥទ្ធិពលរបស់ចិននៅក្នុងតំបន់ទៀតផង៕
អត្ថបទ៖ សុខ សុវណ្ណ
ចុចអាន៖ លោក Blinken ទៅដល់ហ្វីលីពីន ចំពេលភាពតានតឹងនៅសមុទ្រចិនខាងត្បូង ឡើងកម្តៅខ្លាំង
![](https://kampucheathmey.com/wp-content/uploads/2020/12/1-01-2-01-1.png)
-
ព័ត៌មានជាតិ១ សប្តាហ៍ ago
ត្រីតុកកែមានតម្លៃថ្លៃតាមហាងចិន កំពុងបង្កាត់ពូជនៅមជ្ឈមណ្ឌលវារីវប្បកម្មនៅខេត្តព្រះសីហនុ
-
ព័ត៌មានជាតិ៧ ថ្ងៃ ago
ក្រុងបាត់ដំបង កំពុងប្រឈមនឹងភក់ជ្រាំ មិនខុសពីទសវត្សរ៍ទី ៨០
-
ព័ត៌មានអន្ដរជាតិ៥ ថ្ងៃ ago
ស្លាប់១១នាក់ បាត់ខ្លួន៣០នាក់ ក្នុងហេតុការណ៍បាក់ស្ពាននៅចិនព្រោះភ្លៀងធ្លាក់ខ្លាំង
-
ព័ត៌មានជាតិ៥ ថ្ងៃ ago
អស់រយៈពេល៨ថ្ងៃហើយ ឧទ្ធម្ភាគចក្រដែលបាត់ដាន ពុំទាន់មានតម្រុយនៅឡើយទេ
-
ព័ត៌មានអន្ដរជាតិ១ សប្តាហ៍ ago
កំណើនកម្តៅផែនដីធ្វើឲ្យពេលថ្ងៃ អូសបន្លាយពេលយូរជាងពេលយប់
-
កីឡា៣ ថ្ងៃ ago
ភរិយាលោកគ្រូ អេ ភូថង ចេញសារសុំទោសរឿងតវ៉ាម្សិលមិញ
-
ព័ត៌មានជាតិ១ សប្តាហ៍ ago
UPDATE៖ ជំនន់ទឹកភ្លៀងនៅខេត្តព្រះវិហារ បានស្រកបណ្តើរៗ តែស្ពាននិងថ្នល់មួយចំនួនរងការខូចខាត
-
ព័ត៌មានអន្ដរជាតិ២ ថ្ងៃ ago
មនុស្ស១៤៦នាក់ កប់ស្លាប់ក្រោមបំណាក់ដីភក់ នៅប្រទេស អេត្យូពី