ហេតុអ្វីបានជាការរាតត្បាតនៃកូវីដ ក្លាយជាដំណឹងល្អសម្រាប់អ្នកមានជំងឺហឺតទៅវិញ?

ស្របពេលដែលវីរុសកូវីដ-១៩ កំពុងរាតត្បាតខ្លាំងចំពោះបុគ្គលមានជំងឺរ៉ាំរ៉ៃ អ្នកជំងឺហឺតត្រូវបានគេព្រមានឱ្យមានការប្រុងប្រយ័ត្នខ្ពស់ ព្រោះជាក្រុមងាយរងគ្រោះ ដោយវីរុសអាចធ្វើឱ្យសួតខូចលឿន ហើយបណ្តាលឱ្យមានបញ្ហាដង្ហើមធ្ងន់ធ្ងរ។

ប៉ុន្តែការស្រាវជ្រាវថ្មីរបស់ចក្រភពអង់គ្លេសបានរកឃើញថា ក្នុងអំឡុងពេលនៃជំងឺរាតត្បាត មានមនុស្សតែ ១៤ភាគរយប៉ុណ្ណោះក្នុងចំណោមអ្នកជំងឺហឺតជាង១ម៉ឺននាក់ ដែលត្រូវសម្រាកព្យាបាលនៅមន្ទីរពេទ្យ។ លើសពីនេះទៀត អ្នកជំងឺទាំងនោះទំនងជាឆាប់ជាសះស្បើយជាងអ្នកដទៃ ប្រសិនបើពួកគេឆ្លងវីរុសកូវីដ-១៩។

វេជ្ជបណ្ឌិត Syed Shah អ្នកនិពន្ធដឹកនាំការស្រាវជ្រាវរបស់មជ្ឈមណ្ឌលស្រាវជ្រាវជំងឺហឺតនៅសាកលវិទ្យាល័យ Edinburgh អង់គ្លេស និយាយថា “ការចូលសម្រាកក្នុងមន្ទីរពេទ្យ និងតម្រូវការថែទាំបឋមត្រូវបានកាត់បន្ថយខ្ពស់ សម្រាប់អ្នកជំងឺហឺត ក្នុងអំឡុងពេលនៃវីរុសរាតត្បាត។”

ក្រុមស្រាវជ្រាវរបស់វេជ្ជបណ្ឌិត Syed Shah បានវិភាគលើកំណត់ត្រាវេជ្ជសាស្រ្តរបស់អ្នកជំងឺហឺតជាង១ម៉ឺននាក់ ហើយបានរកឃើញថា ចំនួនអ្នកជំងឺ ២០ ភាគរយតាមផ្ទះបានថយចុះជាងពេលមុនៗ លើកលែងតែចំនួនអ្នកជំងឺហឺតកំពុងព្យាបាលនៅមន្ទីរពេទ្យ នៅរក្សាតួលេខដដែល។

ដោយឡែក ការសិក្សាមួយទៀតរបស់ អាមេរិក បានចេញលទ្ធផលស្រដៀងគ្នានេះដែរ ដោយពួកគេបានរកឃើញថា ចំនួនអ្នករងគ្រោះនៅតាមផ្ទះបានធ្លាក់ចុះរហូតដល់ ៤០ ភាគរយ បើធៀបទៅនឹងឆ្នាំមុនៗដែលមិនទាន់មានវីរុសកូវីដ-១៩លេចឡើង។

អ្នកស្រាវជ្រាវបានពន្យល់មូលហេតុនៃការធ្លាក់ចុះចំនួនអ្នកជំងឺហឺតថា ដោយសារមនុស្សមានការប្រុងប្រយ័ត្នចំពោះសុវត្ថិភាពផ្ទាល់ខ្លួន បូករួមការរក្សាគម្លាតសង្គម  និងការពាក់ម៉ាសត្រឹមត្រូវ បានចូលរួមចំណែកក្នុងការកាត់បន្ថយហានិភ័យនៃការប៉ះពាល់នៃវីរុសចំពោះអ្នកជំងឺទូទៅ រួមទាំងជំងឺហឺតផងដែរ។ ក្នុងនោះ ខ្យល់អាកាសបរិសុទ្ធក្នុងអំឡុងពេលមានជំងឺរាតត្បាត ក៏ជាវិធានការបង្ការជំងឺហឺតកាន់តែល្អ ដែលកត្តានេះបានជួយឱ្យពួកគេមានផាសុកភាពប្រសើរជាងមុនច្រើន៕

ប្រែសម្រួល៖ សន្យា

ប្រភព៖ Daily Mail

ចុចអាន៖ អ្នកជាសះស្បើយពីកូវីដ រងផលរំខានខ្លាំងជាងអ្នកមិនធ្លាប់ឆ្លង ក្រោយចាក់វ៉ាក់សាំង

ចុចអាន៖ វិបត្តិ Delta កុំប្រហែស តាមដានឲ្យជាប់រឿងសំបោរហៀរ ក៏អាចបញ្ជាក់ពីអាការក្នុងរាងកាយធ្ងន់ឬស្រាល