ព័ត៌មានអន្ដរជាតិ

WHO ណែនាំវៀតណាម៣ចំណុចដើម្បីទប់ស្កាត់កូវីដ ខណៈប៉ុន្មានសប្តាហ៍ខាងមុខចាំបាច់ខ្លាំង

បានផុស

៥ years មុន

នៅ

ថ្ងៃពុធ ១៥ កញ្ញា ២០២១

ដោយ

តំណាងអង្គការសុខភាពពិភពលោកប្រចាំប្រទេសវៀតណាមបានណែនាំឲ្យមានផែនការសកម្មភាព៣ចំណុចដើម្បីទប់ស្កាត់កូវីដ-១៩ បន្ទាប់ពីកត់សំគាល់ថា ប៉ុន្មានសប្តាហ៍ខាងមុខនេះចាំបាច់ខ្លាំងណាស់។

ទី១ វៀតណាមគួរចាក់វ៉ាក់សាំងដល់ក្រុមមនុស្សអាទិភាព ក្នុងនោះបុគ្គលិកសុខាភិបាល មនុស្សវ័យចំណាស់ មនុស្សដែលមានជំងឺស្រាប់ និងបន្ទាប់មកចាក់សហគមន៍ទាំងមូលឲ្យបានលឿនតាមដែលអាចទៅរួច។ បន្ថែមលើសនេះ ការចាក់វ៉ាក់សាំងអាទិភាពត្រូវផ្តល់ដល់តំបន់ដែលមានប្រព័ន្ធសុខាភិបាលខ្សោយ។ នេះជាការលើកឡើងរបស់លោក Kidong Park តំណាង WHO ប្រចាំប្រទេសវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទី២ វៀតណាមត្រូវធ្វើឲ្យប្រាកដច្បាស់ថា ប្រជាជនគោរពតាមវិធានការការពារកូវីដ-១៩ឲ្យបានយ៉ាងតឹងរឹង ក្នុងនោះពាក់ម៉ាស់ រក្សាគម្លាតសង្គម និងជៀសវៀងទៅកន្លែងដែលមានមនុស្សច្រើនទាំងសាលារៀន និងកន្លែងធ្វើការ បន្ទាប់ពីគម្លាតសង្គមត្រូវបានបន្ធូរបន្ថយ។

លោក Park បន្តថា សម្រាប់ផ្នែកនេះ វៀតណាមក៏អាចចាត់វិធានការបន្ថែមទៀតលើការការពារផ្ទាល់ខ្លួន និងវិធានការការពារសុខភាពសាធារណៈដើម្បីកាត់បន្ថយការចម្លងឲ្យបានច្រើនតាមលទ្ធភាពដែលអាចទៅរួច។

ទី៣ វៀតណាមត្រូវការពង្រឹងសមត្ថភាពសុខាភិបាលបន្ថែមទៀតដើម្បីឲ្យប្រសើរឡើងក្នុងការគ្រប់គ្រងជំងឺកូវីដ-១៩ដែលធ្ងន់ធ្ងរ និងដាក់ចេញនូវផែនការយុទ្ធសាស្ត្រត្រឹមត្រូវសម្រាប់ព្យាបាលជំងឺកូវីដដើម្បីជៀសវាងអ្នកជំងឺច្រើនលើសនៅក្នុងប្រព័ន្ធសុខាភិបាលទាំងអ្នកជំងឺស្រាល និងមធ្យម។

ការវាយតម្លៃពីអ្វីដែលវៀតណាមបានធ្វើកន្លងមកដើម្បីទប់ស្កាត់កូវីដ លោកតំណាង WHO ថា ស្ថានភាពនៅវៀតណាមនៅតែធ្ងន់ធ្ងរ និងពិបាកខ្លាំងដែល«ចំនួនឆ្លងកើនឡើងជាលំដាប់រហូតដល់ជាងពាក់កណ្តាលលាននាក់គិតត្រឹមដើមខែកញ្ញា ឆ្នាំនេះមក»។

វៀតណាមបានបន្តរាយការណ៍ពីចំនួនខ្ពស់នៃករណីឆ្លង និងស្លាប់ប្រចាំថ្ងៃកាលពីសប្តាហ៍មុន ជាពិសេសនៅក្រុងហូជីមិញ និងខេត្តជុំវិញ។

លោក Park បាននិយាយថា ៖«នេះជាស្ថានព្រួយបារម្ភ និងជាសញ្ញានៃហានិភ័យឆ្លងខ្ពស់នៅសហគមន៍»។

ប្រព័ន្ធសុខាភិបាលស្ថិតក្រោមសម្ពាធធ្ងន់ធ្ងរ។ បុគ្គលិកសុខាភិបាលធ្វើការគ្មានពេលសម្រាក ហើយមន្ទីរពេទ្យខ្លះនៅតំបន់ឆ្លងពោរពេញដោយអ្នកជំងឺលើស។

តំណាង WHO បានណែនាំរដ្ឋាភិបាលវៀតណាមឲ្យប្រឹងប្រែងបន្ថែមទៀត និងប្រមូលកៀរគរធនធានដើម្បីទប់ស្កាត់ការរីករាលដាល ជាពិសេសឧបត្ថម្ភដល់មន្ទីរពេទ្យដែលមានអ្នកឆ្លងច្រើន។

ស្ថានភាពបច្ចុប្បន្ននេះកាន់តែធ្ងន់ធ្ងរ ជាពិសេសទីក្រុងហូជីមិញ។ លោក Park បាននិយាយថា នៅមានការងារច្រើនដែលវៀតណាមត្រូវធ្វើនៅពេលខាងមុខ ជាពិសេសប៉ុន្មានសប្តាហ៍ខាងមុខនេះគឺជាពេលវេលាដែលចាំបាច់បំផុត។

រហូតដល់ពេលនេះ វៀតណាមមានអ្នកឆ្លងកូវីដសរុប៦២០១៦៦នាក់ និងស្លាប់១៥៦២៥នាក់៕

ប្រែសម្រួល៖ វីរបុត្រ
ប្រភព៖ vnexpress