ប៉ូលិសអូស្រ្តាលី ផ្តួលស្រ្តីវ័យចំណាស់ ទៅលើផ្លូវហើយ បាញ់ស្ព្រាយម្ទេសដាក់មុខ

ស្ត្រីចំណាស់ម្នាក់ក្នុងវ័យ៧០ឆ្នាំ ត្រូវបានប៉ូលិសពីរនាក់រុញផ្តួលទៅនឹងដី ហើយបាញ់ស្រ្ពាយម្ទេសដាក់មុខ អំឡុងកូដកម្មប្រឆាំងការបិទខ្ទប់ទីក្រុង មែលប៊ន។

ស្រ្តីម្នាក់នោះត្រូវបានគេមើលឃើញថា គ្មានអ្វីការពារខ្លួនឡើយនៅពេលដេកលើផ្លូវ ហើយព្យាយាមយកដៃ បាំងមុខរបស់គាត់។

រូបថតនិងវីដេអូនៃហេតុការណ៍នេះ បានធ្វើឲ្យសាធារណជនមានការខឹងសម្បារយ៉ាងខ្លាំង ចំពោះយុទ្ធសាស្ត្ររបស់ប៉ូលិសដែលប្រើកម្លាំងខ្លាំងបែបនេះ​ ប៉ុន្តែអ្នកផ្សេងទៀតយល់ថា គាត់សមនឹងទទួលហើយ ដោយសារបំពានបទបញ្ជាសុខភាពសាធារណៈ។

បាតុករប្រឆាំងនឹងការបិទខ្ទប់រាប់រយនាក់ បានប្រមូលផ្តុំគ្នានៅតាមដងផ្លូវក្នុងទីក្រុងមែលប៊ន កាលពីថ្ងៃសៅរ៍ដែលបង្កឲ្យមានការប្រឈមមុខដាក់គ្នាដោយហិង្សាជាមួយប៉ូលិស ហើយបណ្តាលឲ្យមានការចាប់ខ្លួនមនុស្សចំនួន ២៣៥ នាក់ ខណៈមន្រ្តី ១០ នាក់រងរបួស។

គួរបញ្ជាក់ថា ឧបទ្ទវហេតុចុងក្រោយនេះ បានកើតឡើងបន្ទាប់ពីវីដេអូមួយទៀត បានបង្ហាញពីបាតុករម្នាក់នៅទីក្រុងមែលប៊ន ចុះចាញ់ប៉ូលិសមុនពេលត្រូវបានផ្តួលទៅនឹងដី ហើយឡោមព័ទ្ធដោយមន្រ្តីរហូតដល់ទៅ ១២ នាក់កាលពីថ្ងៃសៅរ៍៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ផ្ទុះបាតុកម្មហិង្សាប្រឆាំងការបិទខ្ទប់នៅទីក្រុងមែលប៊ន ប៉ូលិសចាប់ខ្លួនបាតុករជាង ២០០នាក់ (វីដេអូ)