តួស្រីរឿង «តំណាលតែងតាំងទេវតា» ជាប់ក្នុងបញ្ចីហាមឃាត់ ក្រោយបំពានច្បាប់ និងបោកប្រាស់ការសិក្សា

សារព័ត៌មានមានកម្សាន្ត Sohu កាលពីថ្ងៃទី ៦ ខែមិថុនា បានរាយការណ៍ថា ទូរទស្សន៍កណ្តាលចិន (CCTV) បានលុបវីដេអូរបស់តារាសម្តែង Nashi ដែលជូនពរសិស្សឲ្យទទួលបានជោគជ័យក្នុងការបញ្ចប់វិទ្យាល័យនិងការប្រឡងចូលសាកលវិទ្យាល័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើសពីនេះ គេហទំព័ររបស់កាសែត People’s Daily ដែលជាប្រព័ន្ធផ្សព្វផ្សាយដ៏មានឥទ្ធិពលបំផុត ក៏បានលុបការបង្ហោះអំពីតួស្រីក្នុងរឿង «តំណាលតែងតាំងទេវតា 2: សង្រ្គាមអារក្ស» ផងដែរ។ សកម្មភាពជាបន្តបន្ទាប់នេះ ចាត់ទុកថាជាជំហានដំបូងដើម្បីរារាំងនាង បន្ទាប់ពីរឿងអាស្រូវអំពីការប្រឡងចូលសាកលវិទ្យាល័យរបស់សិល្បករស្រី។

តារាស្រីកើតក្នុងឆ្នាំ ១៩៨៩ ត្រូវបានចោទប្រកាន់ពីបទរំលោភលើទំនាក់ទំនងគ្រួសារ និងបំពានច្បាប់ ដើម្បីរារាំងដល់ភាពយុត្តិធម៌ក្នុងវិស័យអប់រំ។ តារាស្រីរូបនេះ មានដើមកំណើតមកពីប្រទេសម៉ុងហ្គោលី។ ប៉ុន្តែតាមពិតទៅនាងកើត និងធំធាត់នៅទីក្រុងប៉េកាំង ហើយបានចូលរៀននៅវិទ្យាល័យល្អបំផុតរបស់រដ្ឋធានី។

ពេលដល់ពេលប្រឡងចូលសាកលវិទ្យាល័យ នាងបានត្រឡប់ទៅស្រុកកំណើតវិញ ដើម្បីចុះឈ្មោះប្រឡង ដោយឆ្លៀតយកអត្ថប្រយោជន៍ពីការអនុញ្ញាតឲ្យបេក្ខជនជនជាតិភាគតិចមកពីតំបន់ជួបការលំបាកក្នុងប្រទេសម៉ុងហ្គោលី ចូលរៀនសកវិទ្យាល័យ។

លក្ខខណ្ឌតម្រូវនៃអាហារូបករណ៍នេះគឺថា បន្ទាប់ពីបញ្ចប់ការសិក្សា និស្សិតត្រូវត្រឡប់ទៅអង្គភាពដែលបានកំណត់ ដើម្បីបម្រើប្រទេសកំណើតរបស់ពួកគេក្នុងរយៈពេលកំណត់។ យ៉ាងណាមិញ បន្ទាប់ពីបញ្ចប់ការសិក្សានៅ Shanghai Drama Academy តារាស្រីរូបនេះបានទៅសិក្សានៅបរទេសនៅប្រទេសន័រវេស។ នៅឆ្នាំ ២០១៨ Nashi បានត្រលប់មកឧស្សាហកម្មកម្សាន្តវិញ ហើយមិនដែលគ្រោងទៅទៅម៉ុងហ្គោលីវិញទេ។

ម៉្យាងវិញទៀត Nashi ខ្លួនឯងបានសារភាពថាបានបំពានកិច្ចសន្យាជាមួយអង្គភាពការងារ ដោយបានលាតត្រដាងដោយផ្ទាល់ថា នាងបានបំពានលើបទបញ្ជានៃការប្រឡងចូល។ ដោយ​សារ​តែ​រឿង​នេះ​ហើយ​ទើប​កេរ្តិ៍​ឈ្មោះ​របស់​តារា​ស្រី​ស្រាប់តែ​ធ្លាក់​ចុះ​យ៉ាង​ខ្លាំង។ ដើម្បីធានាភាពយុត្តិធម៌ក្នុងការប្រឡង មនុស្សជាច្រើនបានស្នើសុំឲ្យមានការស៊ើបអង្កេតលើប្រវត្តិគ្រួសាររបស់តួស្រី។ ក្រោយមកទើបគេរកឃើញថា ឪពុករបស់នាងធ្លាប់គឺជាអ្នកគ្រប់គ្រងជាន់ខ្ពស់នៅ CCTV ចំណែកម្តាយបានប្រើវិធីស្រដៀងគ្នានេះដើម្បីចូលរៀននៅសកលវិទ្យាល័យដូចគ្នា។

គួរបញ្ចាក់ដែរថា Nashi មានភាពល្បីល្បាញបន្ទាប់ពីដើរតួជាមេទ័ពស្រី Deng Chanyu ក្នុងរឿង «Creation of the Gods II: Demon Force» ឬ «តំណាលតែងតាំងទេវតា 2: សង្រ្គាមអារក្ស» ។ នាងបានបង្ហាញពីភាពរឹងមាំ អង់អាច និងភាពក្លាហានរបស់តួអង្គបានយ៉ាងល្អ ហើយត្រូវបានគេសរសើរថាជា មេទ័ពស្រីស្អាតបំផុតនៅលើកញ្ចក់ទូរទស្សន៍ចិននាពេលបច្ចុប្បន្ននេះ។ សូម្បីតែមុននោះ ទស្សនិកជនជាច្រើនបានស្នើឲ្យនាងសម្តែងជាតួ Hua Mulan ព្រោះពួកគេគិតថា តួស្រីពិតជាស័ក្តិសមសម្រាប់តួអង្គមួយនេះជាខ្លាំង។

បច្ចុប្បន្ននេះ តារាស្រីវ័៣៦ឆ្នាំ ចូលរួមសម្តែងក្នុងរឿង «The Litchi Road» រួមសម្តែងជាមួយតារាប្រុសJiayin Lei និង Yunpeng Yue ។ យ៉ាងណា ចាប់តាំងពីចូលប្រឡូកក្នុងវិស័យសិល្បៈមក ភាពយន្តរបស់ Nashi តែងតែទទួលបានការវាយតម្លៃល្អ នាងតែងតែចូលរួមក្នុងគម្រោងធំៗជាច្រើន។ ប៉ុន្តែ ជាអកុសល ជាមួយនឹងរឿងអាស្រូវខាងលើ អាជីពរបស់តារាស្រីនឹងត្រូវបញ្ចប់ដោយមិនដឹងថា ពេលណាទើបនាងនឹងវិលមកកាន់អាជីពវិញឡើយ៕

អត្ថបទ៖ សាង ស្រីល័ក្ខ

ចុចអាន៖ម្តាយ Kris Wu ​ជាប់​គុក​ពី​បទ​ក្លែង​បន្លំ​ពន្ធ ខណៈ​កូនប្រុស​ប្រឈម​​នឹង​កាត់​ទោស​បន្ថែម