ខណៈនេះចំនួនអ្នកស្លាប់ដោយសារកូវីដនៅ អាមេរិក សាហាវជាងជំងឺគ្រុនផ្ដាសាយកាលពីជាង ១០០ ឆ្នាំមុន

បច្ចុប្បន្នជំងឺកូវីដ ១៩ គឺជារោគរាតត្បាតដ៏សាហាវបំផុតនៅក្នុងប្រវត្តិសាស្ត្រអាមេរិក ហើយវីរុសមួយនេះបានបញ្ចប់រជ្ជកាលជំងឺគ្រុនផ្តាសាយឆ្នាំ ១៩១៨ ។

យោងតាមមជ្ឈមណ្ឌលគ្រប់គ្រង និងបង្ការជំងឺកូវីដ ១៩ អាមេរិក (CDC) បានឲ្យដឹងថា អ្នកស្លាប់ដោយសារជំងឹកូវីដ ១៩ នៅសហរដ្ឋអាមេរិកបានវ៉ាដាច់ចំនួនអ្នកស្លាប់ ៦៧៥,០០០ នាក់ ដែលជាចំនួនអ្នកស្លាប់ ដោយសារជំងឺគ្រុនផ្តាសាយឆ្នាំ ១៩១៨ ។

​​CDC បានឲ្យដឹងថា ការស្លាប់ដោយសារជំងឺរាតត្បាតសកលត្រូវបានគេព្យាករណ៍ថា នឹងបន្តកើនឡើងនៅប៉ុន្មានសប្តាហ៍ខាងមុខនេះ ហើយចំនួនអ្នកស្លាប់ដោយសារកូវីដចំនួន ៧០ ម៉ឺននាក់អាចនឹងកើតឡើងមុនឆ្នាំ ២០២២ ខណៈបច្ចុប្បន្នអាមេរិកមានអ្នកស្លាប់ដោយសារជំងឺកូវីដ ១៩ ជាង ៦៩៤.០០០ នាក់ ។

នៅឆ្នាំ ១៩១៨ ចំនួនប្រជាជនអាមេរិកមានប្រហែល ១០០ លាននាក់ ខណៈបច្ចុប្បន្នមានចំនួនជិត ៣៣០ លាននាក់ ។ ការស្លាប់ ៦៧៥,០០០ នាក់នៅឆ្នាំ ១៩១៨ គឺស្មើនឹង ០.៦៧៥ ភាគរយនៃប្រជាជនសរុបបើប្រៀបធៀបទៅនឹង ០.២០៥ ភាគរយនៅឆ្នាំ ២០២១ ខណៈជំងឺគ្រុនផ្ដាសាយអេស្ប៉ាញត្រូវបានគេប៉ាន់ប្រមាណថា បណ្តាលឲ្យមនុស្សជិត ២ ម៉ឺននាក់ស្លាប់នៅខែតុលាឆ្នាំ ១៩១៨ ។

ប៉ុន្តែអ្នកជំនាញ CDC អះអាងថា ចំនួនអ្នកស្លាប់ដោយសារជំងឺគ្រុនផ្ដាសាយពីឆ្នាំ ១៩១៨ ដល់ឆ្នាំ ១៩១៩ នៅអាមេរិកប្រមាណ ៦៧៥,០០០ នាក់គឺជាការប៉ាន់ស្មានដ៏ល្អ និងត្រឹមត្រូវបំផុត ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក បើកការវាយប្រហារតាមអាកាសសម្លាប់មេដឹកនាំជាន់ខ្ពស់ ក្រុមអាល់កៃដា នៅ ស៊ីរី