ចក្រភពអង់គ្លេស កំពុងក្លាយជា កន្លែងថ្មី សម្រាប់ការឆបោកហិរញ្ញវត្ថុ

ធនាគារចក្រភពអង់គ្លេសបានព្រមានថា ការឆបោកឥឡូវនេះ បានក្លាយជា “ការគំរាមកំហែងសន្តិសុខជាតិ” ខណៈដែលពួកគេបានរាយការណ៍ថា មានការកើនឡើង ៧១% នៃការឆបោកទទួលបានការអនុញ្ញាត ដែលក្នុងនោះ ជនរងគ្រោះត្រូវបានគេបោកប្រាស់ឲ្យផ្ទេរប្រាក់របស់ពួកគេទៅកាន់ឧក្រិដ្ឋជន ឬប្រគល់ព័ត៌មានលម្អិតផ្ទាល់ខ្លួន។

ការបាត់បង់ទឹកប្រាក់ដោយសារការឆបោក បានកើនឡើងដល់ ៣៥៥.៥ លានផោន ក្នុងរយៈពេល ៦ ខែដំបូងនៃឆ្នាំ ២០២១ នេះពោលគឺកើនឡើង ៧១% បើធៀបនឹងរយៈពេលដូចគ្នាក្នុងឆ្នាំ ២០២០ ហើយជនរងគ្រោះចំនួន ១០៦,០០០ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថាប័នឧស្សាហកម្មបាននិយាយថា តួលេខនេះ បង្ហាញពីរបៀបដែលឧក្រិដ្ឋជនកំពុងបង្វែការផ្តោតអារម្មណ៍របស់ពួកគេទៅខាងក្រៅប្រព័ន្ធធនាគារ ក្នុងការព្យាយាមញែកជនរងគ្រោះពីសាច់ប្រាក់របស់ពួកគេ។ ស្ថាប័ននេះ បានអំពាវនាវឲ្យមានការសម្របសម្រួលពីវិស័យឧស្សាហកម្មហិរញ្ញវត្ថុ រដ្ឋាភិបាលនិងវិស័យផ្សេងទៀត ដើម្បីទប់ស្កាត់លំហូរនៃការឆបោក និងការពារអ្នកប្រើប្រាស់។

លោកស្រី Katy Worobec នាយកគ្រប់គ្រងឧក្រិដ្ឋកម្មសេដ្ឋកិច្ច នៅសមាគមពាណិជ្ជកម្ម UK Finance បាននិយាយថា “ឧស្សាហកម្មធនាគារនិងហិរញ្ញវត្ថុ បានវិនិយោគទឹកប្រាក់រាប់ពាន់លាន នៅក្នុងប្រព័ន្ធជឿនលឿន ដើម្បីព្យាយាមបញ្ឈប់ការឆបោកដែលកើតមានឡើងជាបឋម ប៉ុន្តែឧក្រិដ្ឋជនកំពុងទាញយកភាពទន់ខ្សោយនៅខាងក្រៅការគ្រប់គ្រងរបស់ធនាគារ ដើម្បីបោកបញ្ឆោតអតិថិជនឲ្យបង្កើតការទូទាត់ដោយផ្ទាល់ទៅពួកគេ”។

នេះជាមូលហេតុ ដែលយើងអំពាវនាវឲ្យមានការសហការ សម្របសម្រួលនិងបង្កើនកិច្ចខិតខំប្រឹងប្រែងពីរដ្ឋាភិបាលនិងវិស័យផ្សេងទៀត ដើម្បីដោះស្រាយបញ្ហាដែលឥឡូវនេះជាការគំរាមកំហែងដល់សន្តិសុខជាតិ។

ការឆបោក បានកើនឡើង ១២៣ ភាគរយ ដោយខាតបង់ទឹកប្រាក់ ១២៩.៣ លានផោន។ នៅក្នុងការក្លែងបន្លំទាំងនេះ ឧក្រិដ្ឋជនបានផ្ញើអត្ថបទនិងអ៊ីមែលក្លែងក្លាយដែលបង្ហាញថា ខ្លួនជាក្រុមហ៊ុនចែកចាយ, NHS ឬនាយកដ្ឋានរដ្ឋាភិបាល៕

ប្រែសម្រួល៖ Vann Vann

ប្រភព៖ FT

ចុចអាន៖ អង់គ្លេស ត្រៀមចេញច្បាប់ ដាក់គុកអ្នកកាសែត ១៤ឆ្នាំ បើផ្សាយព័ត៌មានធ្វើឲ្យរដ្ឋាភិបាល អាម៉ាស់មុខ