ពេលនេះ ចិន ជាប្រទេស មានកងទ័ពជើងទឹកធំជាងគេបំផុតលើពិភពលោក

មន្ទីរបញ្ចកោណបានបង្ហាញថា ឥឡូវនេះ ប្រទេសចិន មានកងទ័ពជើងទឹកធំជាងគេបំផុតនៅលើពិភពលោក ហើយកំពុងរៀបចំដាក់ឲ្យដំណើរការនូវ នាវាផ្ទុកយន្តហោះបច្ចេកវិទ្យាខ្ពស់ថ្មីមួយគ្រឿងទៀតនៅខែកុម្ភៈខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃពុធសប្តាហ៍មុន ក្រសួងការពារជាតិអាមេរិក បាននិយាយនៅក្នុងរបាយការណ៍ប្រចាំឆ្នាំរបស់ខ្លួនស្តីពីប្រទេសចិនថា ទីក្រុងប៉េកាំង មានកងទ័ពជើងទឹកធំបំផុតនៅលើពិភពលោកដែលមានកម្លាំងប្រយុទ្ធនៃនាវាចម្បាំងនិងនាវាមុជទឹកសរុប ៣៥៥គ្រឿង។

នោះបើប្រៀបធៀបជាមួយនឹងនាវាចម្បាំង២៩៦គ្រឿង របស់កងទ័ពជើងទឹកសហរដ្ឋអាមេរិក និង២៩៥គ្រឿងដែលដាក់ពង្រាយដោយកងទ័ពជើងទឹករុស្ស៊ី។

នៅដើមឆ្នាំ២០២២ ទីក្រុងប៉េកាំង ត្រូវបានគេរំពឹងថានឹងបន្ថែមនាវាផ្ទុកយន្តហោះទីបី ដែលមានឈ្មោះថា Type-003 ខណៈរូបភាពផ្កាយរណបពីកន្លែងផលិតកប៉ាល់ដែល បញ្ចេញនាពេលថ្មីៗនេះបង្ហាញថា វានឹងប្រកួតប្រជែងជាមួយនាវាផ្ទុកយន្តហោះទំនើបរបស់អាមេរិក។

រូបភាពនៃកន្លែងផលិតកប៉ាល់ Jiangnan ពីខែកញ្ញាដល់ខែតុលា បានបង្ហាញថា ការវិវឌ្ឍន៍ដ៏សំខាន់ត្រូវបានធ្វើឡើងចំពោះធាតុផ្សំខាងក្រៅរបស់នាវាផ្ទុកយន្តហោះ ហើយការងារលើនាវាផ្សេងទៀតនៅទីនោះ ហាក់ដូចជាមានការយឺតយ៉ាវ ប្រហែលជាដោយសារតែនាវា Type-003 គឺជាអាទិភាពខ្ពស់ជាងគេ។

មជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិដែលមានមូលដ្ឋាននៅទីក្រុងវ៉ាស៊ីនតោន បាននិយាយថា នាវាផ្ទុកយន្តហោះនេះអាចរួចរាល់នៅដើមខែកុម្ភៈ។

ទោះបីជាយ៉ាងណាក៏ដោយ បើនិយាយពីនាវាផ្ទុកយន្តហោះវិញ បច្ចុប្បន្នអាមេរិក នៅតែនាំមុខគេលើពិភពលោកដោយមាននាវាផ្ទុកយន្តហោះចំនួន១១គ្រឿង ចក្រភពអង់គ្លេសមាន ២គ្រឿង ខណៈរុស្ស៊ីមាននាវាផ្ទុកយន្តហោះតែមួយគ្រឿងប៉ុណ្ណោះ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ១០ប្រទេស មានកងទ័ពធំបំផុតលើពិភពលោក