គណៈប្រតិភូជាន់ខ្ពស់រដ្ឋាភិបាលសាធារណរដ្ឋសង្គមនិយមវៀតណាមដឹកនាំដោយប្រធានរដ្ឋលោក ង្វៀន សួនហ្វុក (Nguyen Xuan Phuc) បានអញ្ជើញមកដល់ និងបំពេញទស្សនកិច្ចផ្លូវការនៅព្រះរាជាណាចក្រកម្ពុជាហើយ ។

លោក ង្វៀន សួនហ្វុក នឹងអញ្ជើញចូលក្រាបថ្វាយបង្គំគាល់ព្រះករុណាព្រះមហាក្សត្រ និងសម្តេចព្រះមហាក្សត្រី, ចូលជួបសម្ដែងការគួរសមជាមួយសម្តេចវិបុលសេនាភក្តី សាយ ឈុំ ប្រធានព្រឹទ្ធសភា, សម្តេចអគ្គមហាពញាចក្រី ហេង សំរិន ប្រធានរដ្ឋសភា, និងជួបពិភាក្សាទ្វេភាគីជាមួយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។

លោក ង្វៀន សួនហ្វុក ដែលកំពុងបំពេញទស្សនកិច្ចផ្លូវការនៅកម្ពុជារយៈពេល ២ ថ្ងៃគឺចាប់ពីថ្ងៃទី ២១ ដល់ថ្ងៃទី ២២ ខែធ្នូ ឆ្នាំ ២០២១ នេះគឺជាអ្នកនយោបាយវៀតណាម ដែលបច្ចុប្បន្នកំពុងកាន់តំណែងជាប្រធានាធិបតីវៀតណាម ។

លោក ង្វៀន សួនហ្វុក បានសិក្សានៅសកលវិទ្យាល័យសេដ្ឋកិច្ចជាតិទីក្រុងហាណូយផ្នែកគ្រប់គ្រងសេដ្ឋកិច្ចចន្លោះឆ្នាំ ១៩៧៣ និង ១៩៧៨ បន្ទាប់មកលោកបានសិក្សាផ្នែកគ្រប់គ្រងរដ្ឋបាលនៅបណ្ឌិតសភារដ្ឋបាលជាតិវៀតណាម ។

ពីឆ្នាំ ១៩៧៨ ដល់ឆ្នាំ ១៩៧៩ លោកបានធ្វើការឲ្យក្រុមប្រឹក្សាសេដ្ឋកិច្ចខេត្ត Quang Nam-Da Nang ហើយពីឆ្នាំ ១៩៨០ ដល់ឆ្នាំ ១៩៩៣ លោក ហ្វុក បានចាប់ផ្ដើមបម្រើការជាបុគ្គលិក មុនពេលឡើងកាន់តំណែងជាអនុប្រធានគណៈកម្មាធិការប្រជាជនខេត្ត Quang Nam-Da Nang ក្រោយពីបានក្លាយជាសមាជិកបក្សកុម្មុយនិស្តវៀតណាមនៅថ្ងៃទី ១២ ខែវិច្ឆិកា ឆ្នាំ ១៩៨៣ ។

បន្ទាប់មកលោក ហ្វុក បានបម្រើការក្នុងតួនាទីជាច្រើនរួមទាំងប្រធានខេត្ត ប្រធានការិយាល័យរដ្ឋាភិបាល មុនពេលក្លាយជាឧបនាយករដ្ឋមន្ត្រីពីឆ្នាំ ២០១១ ដល់ឆ្នាំ ២០១៦ ។

ទន្ទឹមនោះលោក ង្វៀន សួនហ្វុក ក៏ជាសមាជិកពេញសិទ្ធិនៃរដ្ឋសភាផងដែរ ដោយបម្រើក្នុងអាណត្តិទី ១១ ទី ១២ ទី ១៣ និងទី ១៤ ។ លោក​ត្រូវ​បាន​រដ្ឋសភា​វៀតណាម​បោះឆ្នោត​ជ្រើសរើស​ឲ្យ​កាន់​តំណែងប្រធានាធិបតី​នៅ​ថ្ងៃ​ទី ​៥ ខែ​មេសា ឆ្នាំ ​២០២១ បន្ទាប់​ពី​កាន់​តំណែង​ជា​នាយក​រដ្ឋមន្ត្រី​ប្រទេស​អស់​រយៈពេល ៥ ​ឆ្នាំ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Wikipedia

ចុចអាន ៖ រថយន្តដឹកផ្លែឈើ វៀតណាម រាប់ពាន់គ្រឿងជាប់នៅព្រំដែន ចិន កំពុងភ័យស្អុយរលួយ (មានវីដេអូ)