ព័ត៌មានអន្ដរជាតិ

វៀតណាម ត្រៀមបន្តគម្រោងសាងសង់រោងចក្រនុយក្លេអ៊ែរឡើងវិញ ក្រោយផ្អាក ១០ ឆ្នាំ

បានផុស

៤ years មុន

នៅ

ថ្ងៃសុក្រ ២៤ ធ្នូ ២០២១

ដោយ

ប្រទេសវៀតណាមនឹងបន្តគម្រោងសាងសង់រោងចក្រនុយក្លេអ៊ែរដោយមានជំនួយពីរុស្ស៊ី ក្រោយផ្អាកក្នុងរយៈពេលមួយទសវត្សរ៍ បន្ទាប់ពីគ្រោះមហន្តរាយផ្ទុះរោងចក្រនៅទីក្រុង Fukushima ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំហានថ្មីឆ្ពោះទៅរកផែនការសាងសង់ឡើងវិញនូវរោងចក្រថាមពលនុយក្លេអ៊ែរនេះធ្វើឡើង នៅពេលដែលប្រធានាធិបតីវៀតណាមលោក ង្វៀន សួនហ្វុក (Nguyen Xuan Phuc) ដែលអមដំណើរដោយអ្នកជំនាញនុយក្លេអ៊ែរវៀតណាម ទៅបំពេញទស្សនកិច្ចនៅទីក្រុងមូស្គូរយៈពេល ៤ ថ្ងៃកាលពីថ្ងៃទី ២៩ ខែវិច្ឆិកា ។

គួររំឭកថា វៀតណាម និងរុស្ស៊ីបានចុះហត្ថលេខាលើអនុស្សរណៈនៃការយោគយល់គ្នាក្នុងឆ្នាំ ២០១១ ដើម្បីសាងសង់រោងចក្រថាមពលនុយក្លេអ៊ែរក្នុងរយៈពេលមួយទសវត្សរ៍ ប៉ុន្តែគម្រោងនេះត្រូវបានពន្យារពេលដោយសារតែការកើនឡើងនៃការព្រួយបារម្ភអំពីសុវត្ថិភាព បន្ទាប់ពីឧបទ្ទវហេតុរោងចក្រនុយក្លេអ៊ែរនៅទីក្រុង Fukushima ប្រទេសជប៉ុនក្នុងខែមីនាឆ្នាំនោះ ។

ទន្ទឹមនោះសារព័ត៌មាន Vietnam Investment Review បានរាយការណ៍កាលពីខែតុលាថា គម្រោងដែលមានតម្លៃ ៣៥០ លានដុល្លារនេះ រួមមានម៉ាស៊ីនរ៉េអាក់ទ័រស្រាវជ្រាវនុយក្លេអ៊ែរដែលរចនាដោយរុស្ស៊ីទំហំ ១០ មេហ្គាវ៉ាត់ និងម៉ាស៊ីនស៊ីក្លូត្រូន ព្រមទាំងមន្ទីរពិសោធន៍ស្រាវជ្រាវផងដែរ ។

យោងតាមប្រភពបានឲ្យដឹងថា ការវិនិយោគសរុបអាចមានច្រើនជាង ៥០០ លានដុល្លារ ខណៈក្រុមហ៊ុនរដ្ឋរុស្ស៊ី Rosatom Group ក៏នឹងចូលរួមក្នុងគម្រោងនេះផងដែរជាមួយនឹងគោលដៅនៃការបញ្ចប់ការសាងសង់នៅចុងឆ្នាំ ២០២៤ ។

វឌ្ឍនភាពនាពេលថ្មីៗនេះ គឺជាសញ្ញាចុងក្រោយបង្អស់នៃចេតនារបស់ទីក្រុងហាណូយក្នុងការវិលត្រលប់ទៅរកផែនការសាងសង់រោងចក្រថាមពលនុយក្លេអ៊ែរដំបូងរបស់ប្រទេសនេះ ។ កាលពីខែកក្កដា ក្រុមប្រឹក្សាវិទ្យាសាស្ត្រថាមពលវៀតណាមចំនួន ២១ នាក់បានស្នើឲ្យរដ្ឋសភា និងនាយករដ្ឋមន្ត្រីលោក Pham Minh Chinh ឲ្យសម្រេចចិត្តលើការរួមបញ្ចូលថាមពលនុយក្លេអ៊ែរនៅក្នុងផែនការមេអគ្គិសនីថ្មី ។

បច្ចុប្បន្នតម្រូវការប្រើប្រាស់អគ្គិសនីរបស់ប្រទេសវៀតណាមត្រូវបានគេរំពឹងថានឹងកើនឡើងក្នុងល្បឿនពី ៨.៥ ភាគរយទៅ ៩.៤ ភាគរយជារៀងរាល់ឆ្នាំ ។ ស្របពេលដែលតម្រូវការកើនឡើង ប្រទេសមួយនេះត្រូវតែស្វែងរកវិធីសាស្ត្រដើម្បីបង្កើនផលិតកម្មថាមពល ខណៈការផលិតថាមពលនេះ ក៏មិនត្រូវឲ្យមានផលប៉ះពាល់ដល់បរិស្ថានក្នុងកម្រិតធ្ងន់ធ្ងរផងដែរ ។

បន្ថែមពីនេះ វាក៏ដោយសារតែវៀតណាមបានធ្វើការប្ដេជ្ញាចិត្តក្នុងការសម្រេចបាននូវការបំភាយឧស្ម័នកម្រិតសូន្យត្រឹមឆ្នាំ ២០៥០ នៅក្នុងកិច្ចប្រជុំកំពូលស្ដីពីអាកាសធាតុ (COP26) នៅក្នុងឆ្នាំ ២០២១ នេះ ៕

ប្រែសម្រួលដោយ ៖ ជីវ័ន្ត

ប្រភព ៖ Nikkei Asia

ចុចអាន ៖ ថ្ងៃបុណ្យណូអែល វៀតណាម នឹងជួបសីតុណ្ហភាពចុះត្រជាក់បំផុត តំបន់ខ្លះអាចកក

ចុចអាន ៖ រថយន្តដឹកផ្លែឈើ វៀតណាម រាប់ពាន់គ្រឿងជាប់នៅព្រំដែន ចិន កំពុងភ័យស្អុយរលួយ (មានវីដេអូ)