ខេត្តថៃជាប់ព្រំដែនកម្ពុជា កាន់តែច្រើន កំពុងឆ្លងរាលដាល​ អូមីក្រុង

ក្រសួងសុខាភិបាលសាធារណៈថៃបានប្រកាសកាលពីថ្ងៃពុធថា ការឆ្លងវីរុសបំប្លែងខ្លួន អូមីក្រុង នៅក្នុងប្រទេសថៃ កំពុងកើនឡើង ដោយករណីចំនួន៧៤០ត្រូវបានបញ្ជាក់នៅក្នុងខេត្តចំនួន ៣៣ ហើយក្នុងនោះមាន ៤៨៩ករណី ជាការនាំចូល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមខេត្តទាំង៣៣ដែលថៃរកឃើញអូមីក្រុង មាន៤ខេត្ត ស្ថិតនៅព្រំដែនជាប់ប្រទសកម្ពុជា។ ខេត្តទាំង៤គឺ Sa Kaeo (ជាប់ខេត្តបន្ទាយមានជ័យនិងបាត់ដំបង) រកឃើញ១ករណី, Buriram (ជាប់ខេត្តឧត្តរមានជ័យ) ១ករណី, Surin (ជាប់ខេត្តឧត្តរមានជ័យ) ៣ករណីនិង Ubon Ratchathani (ជាប់ខេត្តព្រះវិហារ) ៤ករណី។

លោកវេជ្ជបណ្ឌិត Supakit Sirilak អគ្គនាយកនៃនាយកដ្ឋានវិទ្យាសាស្ត្រវេជ្ជសាស្ត្រថៃ (DMS) បាននិយាយថា “ឥឡូវនេះ អូមីក្រុង កំពុងរីករាលដាលយ៉ាងឆាប់រហ័ស ប៉ុន្តែមិនធ្ងន់ធ្ងរទេ”។

លោកវេជ្ជបណ្ឌិតនិយាយថា ទីក្រុងបាងកក រកឃើញអូមីក្រុងច្រើនបំផុត ដោយសារតែការធ្វើតេស្តភាគច្រើនត្រូវបានធ្វើឡើងនៅក្នុងរាជធានី បន្ទាប់ពីអ្នកដំណើរបានមកដល់អាកាសយានដ្ឋានសុវណ្ណភូមិ។

លោកបន្តថា “ទោះមិនមែនទាំងអស់ តែភាគច្រើនការឆ្លងអូមីក្រុង ក្នុងសហគមន៍គឺត្រូវបានផ្សារភ្ជាប់ជាមួយនឹងករណីនាំចូល”។

ចង្កោម​ចម្លងអូមីក្រុងធំបំផុត គឺនៅខេត្ត Kalasin ដែល​បង្ក​ឡើង​ដោយ​ប្ដី​ប្រពន្ធ វិល​ត្រឡប់​មក​ពីប្រទេស​បែលហ្ស៊ិក។

អ្នកទាំង២បានចូលទទួលទានអាហារនៅបារ និងភោជនីយដ្ឋានក្នុងខេត្ត Kalasin ដោយមិនបានដឹងថា ពួកគេបានឆ្លងវីរុសបំប្លែងខ្លួន អូមីក្រុង នោះទេ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ថៃ មានអ្នកឆ្លង អូមីក្រុង ក្នុងសហគមន៍ជាង ២០០ករណីហើយ