ទាំងវ៉ាក់សាំង Sinopharm និង Sinovac សុទ្ធតែការពារការចូលមន្ទីរពេទ្យ និងជំងឺធ្ងន់ធ្ងរពី Omicron

ដោយដកស្រង់សម្តីពីអ្នកជំនាញរបស់អង្គការសុខភាពពិភពលោក (WHO), ទីភ្នាក់ងារសារព័ត៌មាន The National ដែលមានមូលដ្ឋាននៅអារ៉ាប់រួមបានរាយការណ៍កាលពីថ្ងៃអង្គារថា វ៉ាក់សាំង Sinopharm និង Sinovac របស់ប្រទេសចិន គឺការពារប្រឆាំងនឹងការចូលសម្រាកព្យាបាលនៅមន្ទីរពេទ្យ និងជំងឺធ្ងន់ធ្ងរដែលបង្កឡើងដោយវីរុសបំប្លែងខ្លួន Omicron ។

លោក Abdi Mahamud ដែលជាអ្នកគ្រប់គ្រងជំងឺរាតត្បាតរបស់ WHO បាននិយាយថា “ភស្តុតាងកាន់តែច្រើនបង្ហាញថា Omicron កំពុងប៉ះពាល់ដល់ផ្លូវដង្ហើមខាងលើដែលបណ្តាលឲ្យមានរោគសញ្ញាស្រាលជាងវីរុសបំប្លែងខ្លួនមុនៗ ហើយវ៉ាក់សាំងទាំងពីររបស់ចិនអាចការពារបាន” ។

ទន្ទឹមនោះ វាកើតឡើង ស្របពេលដែលថ្មីៗនេះអារ៉ាប់រួមបានអនុម័តលើការប្រើប្រាស់ជាបន្ទាន់នៃវ៉ាក់សាំងប្រូតេអ៊ីនថ្មីដែលផលិតដោយក្រុមហ៊ុន Sinopharm ដែលនឹងត្រូវបានប្រើជាដូសជំរុញ ឬដូសទី ៣ នៅក្នុងប្រទេស ។

បើយោងតាមក្រសួងសុខាភិបាលរបស់អារ៉ាប់រួមបានឲ្យដឹងថា វ៉ាក់សាំងថ្មីរបស់ចិនបានបង្ហាញពីសមត្ថភាពភាពស៊ាំប្រសើរឡើងប្រឆាំងនឹងវីរុសបំប្លែងខ្លួនថ្មីជាមួយនឹងអត្រាសុវត្ថិភាពខ្ពស់ដែលអនុញ្ញាតឲ្យផលិតបានលឿន ងាយស្រួលរក្សាទុក និងចែកចាយជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ WHO រកឃើញភស្តុតាងបន្ថែមថា Omicron មិនចូលស៊ីសួតរហ័សដូច វីរុសបំប្លែងខ្លួនផ្សេងទេ