អាមេរិកចោទរុស្ស៊ី រៀបផែនការបង្កើតលេស ដើម្បីវាយប្រហារអ៊ុយក្រែន

មន្ត្រីអាមេរិកបាននិយាយថា រុស្ស៊ីគ្រោងប្រឌិតលេស សម្រាប់ការវាយចូលអ៊ុយក្រែន ដោយទម្លាក់កំហុសលើយោធាអ៊ុយក្រែនចំពោះការវាយប្រហារលើក្រុមផ្តាច់ខ្លួនដែលគាំទ្រដោយរុស្ស៊ី ឬវាយប្រហាររុស្ស៊ីខ្លួនឯង។

ជម្រើសមួយដែលគេគិតថា​ រុស្ស៊ីកំពុងពិចារណាគឺការសម្ដែង និងថតការវាយប្រហារក្លែងក្លាយ ជាមួយនឹងរូបភាពក្រាហ្វិកនៃការផ្ទុះបង្ហាញពីអ្នកស្លាប់ និងរបួសជាច្រើន។

មន្ត្រីរដ្ឋបាលជាន់ខ្ពស់របស់សហរដ្ឋអាមេរិក បាននិយាយថា ប្រតិបត្តិការសង្ស័យកំពុងរៀបចំដោយសេវាសន្តិសុខរុស្ស៊ី នឹងបង្ហាញរូបភាពនៃជនរងគ្រោះ និងជនស៊ីវិលនៅក្នុងទីក្រុង Donbas ភាគខាងកើតប្រទេសអ៊ុយក្រែន ដើម្បីបង្កើតកំហឹងប្រឆាំងនឹងអាជ្ញាធរអ៊ុយក្រែន។

បន្ទាប់មក រឿងនេះអាចប្រើដើម្បីបង្ហាញអំពីភាពត្រឹមត្រូវនៃការវាយប្រហារលើអ៊ុយក្រែន។ ផែនការនេះអាចពាក់ព័ន្ធនឹងការសម្ដែង ហើយថតការវាយប្រហារក្លែងក្លាយ។

ពួកគេនិយាយថា វានឹងបង្ហាញសាកសព និងទីតាំងដែលត្រូវបំផ្លាញ ឧបករណ៍យោធាអ៊ុយក្រែនក្លែងក្លែងក្លាយ យន្តហោះគ្មានមនុស្សបើកដែលផលិតដោយទួរគី និងអ្នកសម្តែងដែលដើរតួជាអ្នកកាន់ទុក្ខនិយាយភាសារុស្សី។

ប៉ុន្តែក្រុមមន្ត្រីអាមេរិកបានសង្កត់ធ្ងន់ថា នេះគ្រាន់តែជាជម្រើសមួយក្នុងចំណោមជម្រើសដែលរុស្ស៊ីកំពុងពិចារណាប៉ុណ្ណោះ ហើយបាននិយាយថា ពួកគេកំពុងផ្សព្វផ្សាយវាជាសាធារណៈក្នុងកិច្ចខិតខំប្រឹងប្រែងដើម្បីរារាំងរុស្ស៊ីពីសកម្មភាពដែលខ្លួនបានគ្រោងទុក។

ជាការឆ្លើយតប រុស្ស៊ីបាននិយាយថា ខ្លួនគ្មានគម្រោងធ្វើប្រតិបត្តិការក្លែងក្លាយណាមួយឡើយ។

សហរដ្ឋអាមេរិក​និង​ណាតូ កំពុង​បារម្ភ​ចំពោះ​ការ​ប្រមូលផ្តុំ​កម្លាំង​រុស្ស៊ី​នៅ​ក្បែរ​អ៊ុយក្រែន។ ប៉ុន្តែរុស្ស៊ី​បដិសេធ​គម្រោង​វាយប្រហារ ដោយ​និយាយ​ថា ទាហាន​នៅ​ទីនោះគឺ​សម្រាប់​សមយុទ្ធប៉ុណ្ណោះ។ បច្ចុប្បន្ន ទាហាននៅទីនោះមានប្រហែល ១០០,០០០នាក់។

គួរបញ្ជាក់ថា ភាពតានតឹងនេះបានកើតឡើងរយៈពេលប្រាំបីឆ្នាំ បន្ទាប់ពីរុស្ស៊ីកាត់បញ្ចូលឧបទ្វីបគ្រីមៀភាគខាងត្បូងអ៊ុយក្រែនចូលជាឧបសម្ព័ន្ធ និងគាំទ្រការបះបោរបង្ហូរឈាមនៅក្នុងតំបន់ Donbas ភាគខាងកើត៕

ប្រែសម្រួល៖ Vann Vann

ប្រភព៖ BBC

ចុចអាន៖ លោក ពូទីន ទៅប៉េកាំង ជួបលោក ស៊ី ស្របពេលវិបត្តិ អ៊ុយក្រែន-រុស្ស៊ី កំពុងតានតឹងខ្លាំង