ការវាយលុករបស់ រុស្ស៊ី លើ អ៊ុយក្រែន ជាជម្លោះធំបំផុតមិនធ្លាប់មាននៅអឺរ៉ុប ចាប់តាំងពីសង្រ្គាមលោកលើទី ២

មន្ត្រីការពារជាតិជាន់ខ្ពស់អាមេរិកម្នាក់បាននិយាយកាលពីថ្ងៃព្រហស្បតិ៍ថា ការវាយលុករបស់រុស្ស៊ីទៅលើប្រទេសអ៊ុយក្រែន គឺជាការវាយប្រហារយោធាដ៏ធំបំផុតដែលត្រូវបានគេឃើញ ចាប់តាំងពីសង្គ្រាមលោកលើកទី ២ មក ។

មន្ត្រីរូបនេះបានប្រាប់អ្នកយកព័ត៌មានកាលពីថ្ងៃព្រហស្បតិ៍ថា “យើងមិនធ្លាប់ឃើញទំហំ និងវិសាលភាពវាយលុកបែបនេះពីរដ្ឋទៅរដ្ឋមួយពីមុនមកទេ ចាប់តាំងពីសង្គ្រាមលោកលើកទី ២ មក ហើយយើងជឿថា វានឹងមានសក្តានុពលខ្លាំងក្លាក្នុងការបង្ហូរឈាម ចំណាយប្រាក់ច្រើន និងមានឥទ្ធិពលយ៉ាងខ្លាំងទៅលើសន្តិសុខអឺរ៉ុប” ។

យោងតាមមន្ត្រីការពារជាតិបាននិយាយថា ឥឡូវនេះការវាយប្រហាររបស់រុស្ស៊ីរួមមាន “ការវាយលុកសំខាន់ៗចំនួន ៣” ។ ការវាយប្រហារដំបូងរួមមានការបាញ់កាំជ្រួចមីស៊ីលជាង ១០០ គ្រាប់ រួមទាំងមីស៊ីលផ្លោងរយៈចម្ងាយខ្លី និងមធ្យម មីស៊ីលនាំផ្លូវ មីស៊ីលបាញ់ពីដីគោកទៅអាកាស និងមីស៊ីលបាញ់ចេញពីសមុទ្រខ្មៅជាដើម ។

មន្ត្រីបាននិយាយថា មានយន្តហោះទម្លាក់គ្រាប់បែកធុនធ្ងន់ និងមធ្យមចំនួន ៧៤ គ្រឿងសម្រាប់ការវាយប្រហារនេះផងដែរ ហើយរុស្ស៊ីបានចាប់ផ្តើមការវាយលុយតាមដីគោកមួយចំនួនចូលទៅក្នុងអ៊ុយក្រែនពីប្រទេសបេឡារុសដែលមានព្រំប្រទល់ជាប់អ៊ុយក្រែនទៅភាគខាងជើង ។

មន្ត្រីដដែលបាននិយាយថា រហូតមកដល់ពេលនេះ យោធារុស្ស៊ីដណ្ដើមបានទីតាំងសំខាន់ៗជាច្រើន និងកំពុងវាយទីក្រុងគៀវនៅក្នុងប្រទេសអ៊ុយក្រែន រួមទាំងបន្ទាយ ឃ្លាំងអាវុធ រោងចក្រនុយក្លេអ៊ែរ និងមូលដ្ឋានអាកាសជិត ១០ កន្លែង ៕

ប្រែសម្រួលដោយ ៖ ជីវ័ន្ត

ប្រភព ៖ CNN

ចុចអាន ៖ បងប្អូនអតីតអ្នកប្រដាល់ត្រកូល Klitschko ព្រមានកាន់អាវុធប្រយុទ្ធជាមួយ រុស្ស៊ី