នាវាចម្បាំងអង់គ្លេសនឹងល្បាតដែនទឹកខ្លួនក្នុងករណីគ្មានកិច្ចព្រមព្រៀង Brexit

នាវាកងទ័ពជើងទឹកអង់គ្លេសចំនួន ៤ គ្រឿងនឹងល្បាតដែនទឹកនេសាទរបស់ខ្លួនក្នុងករណីគ្មានកិច្ចព្រមព្រៀង Brexit បន្ទាប់ពីលោក Boris Johnson និងប្រធានគណៈកម្មការអឺរ៉ុបលោកស្រី Ursula von der Leyen បានព្រមានថា ចក្រភពអង់គ្លេសអាចនឹងចេញពីសហភាពអឺរ៉ុបដោយគ្មានកិច្ចព្រមព្រៀង ។

នាវាប្រវែង ៨០ ម៉ែត្រនឹងការពារដែនទឹកអង់គ្លេសពីនាវានេសាទរបស់សហភាពអឺរ៉ុប (EU) ក្នុងករណីដែលគ្មានកិច្ចព្រមព្រៀងថ្មីស្តីពីសិទ្ធិនេសាទបន្ទាប់ពីថ្ងៃទី ៣១ ខែធ្នូ នៅពេលការរៀបចំអន្តរកាលចប់ ។

កាលពីថ្ងៃសុក្រលោក Johnson បានជួបជាមួយទេសរដ្ឋមន្រ្តី Michael Gove ដែលទទួលខុសត្រូវចំពោះការធ្វើផែនការ Brexit និងមន្រ្តីផ្សេងទៀតដើម្បីកាន់កាប់ផែនការរបស់រដ្ឋាភិបាលសម្រាប់ការចាកចេញដោយគ្មានកិច្ចព្រមព្រៀង ។

បញ្ហាការនេសាទដែលត្រូវបានរាយការណ៍ជាលើកដំបូងដោយកាសែត The Mirror នៅក្នុងខែឧសភាគឺជាបញ្ហាដ៏ចម្រូងចម្រាសបំផុតមួយនៅក្នុងការចរចាជាមួយប្លុកនេះដោយបារាំងត្រូវបានគេរាយការណ៍មិនពេញចិត្តនឹងសំណើរបស់ចក្រភពអង់គ្លេសក្នុងការកាត់បន្ថយកូតាសម្រាប់ EU ។

យោងតាមកាសែត The Times បានឲ្យដឹងថា រដ្ឋាភិបាលកំពុងមានផែនការពង្រឹងអំណាចយាមល្បាតតាមរយៈការបង្កើតច្បាប់ដើម្បីអនុញ្ញាតឲ្យកងទ័ពជើងទឹកឡើងលើនាវាបរទេស និងចាប់ខ្លួនអ្នកនេសាទ ស្របពេលមានការភ័យខ្លាចនៃការប៉ះទង្គិចគ្នានៅប៉ុស្តិ៍ត្រួតពិនិត្យអង់គ្លេស ប្រសិនបើគ្មានដំណោះស្រាយ ។

ចំណែកកាសែត The Guardian បានរាយការណ៍ថា នាវាចំនួន ៤ គ្រឿងរបស់កងទ័ពជើងទឹកដែលបានត្រៀមសម្រាប់ការឃ្លាំមើលការនេសាទគឺជានាវាល្បាតតាមទន្លេដែលប្រដាប់ដោយកាំភ្លើងយន្ត ។

រីឯអ្នកនាំពាក្យក្រសួងការពារជាតិអង់គ្លេសបាននិយាយថា ការដាក់ពង្រាយនាវាត្រូវបានព្រមព្រៀងជាផ្នែកមួយនៃការធ្វើផែនការសម្រាប់ចុងបញ្ចប់នៃរយៈពេលអន្តរកាលជាមួយ EU ៕

ប្រែសម្រួលដោយ ៖ ជីវ័ន្ត

ប្រភព ៖ Mirror

ចុចអាន ៖ ពូទីន បញ្ជាឲ្យបាញ់មីស៊ីលចេញពីនាវាមុជទឹក រូងក្រោមដី និងយន្តហោះ ក្នុងសមយុទ្ធបែបយុទ្ធសាស្រ្ត (មានវីដេអូ)

ចុចអាន ៖ ខ្លារខិន ៣ ក្បាលធ្វើតេស្ដវិជ្ជមានជំងឺកូវីដ ១៩