ខ្លារខិន ៣ ក្បាលធ្វើតេស្ដវិជ្ជមានជំងឺកូវីដ ១៩

មន្ត្រីសួនសត្វ និងសេវាកម្មអធិការកិច្ចសុខភាពសត្វ និងរុក្ខជាតិរបស់ក្រសួងកសិកម្មសហរដ្ឋអាមេរិកបានបញ្ជាក់កាលពីថ្ងៃសុក្រថា សត្វខ្លារខិនព្រិល ( Snow Leopard ) ចំនួន ៣ ក្បាលក្នុងនោះឈ្មោល ២ ក្បាល និងញីមួយក្បាល ត្រូវបានគេធ្វើតេស្តវិជ្ជមានចំពោះវីរុសកូរ៉ូណានៅឯសួនសត្វ Louisville Zoo ហើយទំនងឆ្លងពីអ្នកមេីលថែសត្វដែលមិនដឹងថាខ្លួនផ្ទុកវីរុស និងមិនចេញរោគសញ្ញា ។

ប្រធានសួនសត្វ Louisville Zoo លោក John Walczak បាននិយាយនៅក្នុងសេចក្តីថ្លែងការណ៍មួយថា ខ្លារខិនទាំង ៣ ក្បាលដែលមានរោគសញ្ញាស្រាលជាមួយនឹងការដងដង្ហើមតឹង និងក្អកស្ងួតត្រូវបានគេរំពឹងថានឹងឆាប់ជាសះស្បើយ ។

ខ្លារខិនព្រិលទាំងនេះ គឺជាសត្វខ្លាមួយក្នុងចំណោមសត្វខ្លាយ៉ាងតិច ៦ ប្រភេទផ្សេងទៀត ដែលបានឆ្លងវីរុសនេះ បន្ទាប់ពីមានទំនាក់ទំនងជិតស្និទ្ធជាមួយមនុស្ស ។ ទីមួយគឺសត្វខ្លាម៉ាឡេនៅសួនសត្វ Bronx ដែលកាលពីខែមេសាបានធ្វើតេស្តវិជ្ជមានចំពោះជំងឺកូវីដ ១៩ បន្ទាប់ពីបានបង្ហាញរោគសញ្ញានៃជំងឺផ្លូវដង្ហើម ។ ចំណែកនៅចុងខែនេះសត្វឆ្មាធំៗរបស់សួនសត្វចំនួន ៨ ក្បាលក្នុងនោះមានសត្វខ្លា ៤ ក្បាល និង សត្វតោអាហ្វ្រិក ៣ ក្បាលបានធ្វើតេស្តរកឃើញវីរុសនេះ ។

បើយោងតាមមជ្ឈមណ្ឌលត្រួតពិនិត្យ និងបង្ការជំងឺឆ្លងសហរដ្ឋអាមេរិកបានឲ្យដឹងថា សត្វឆ្កែ និងឆ្មាមួយចំនួនតូចបានឆ្លងវីរុសនេះនៅសហរដ្ឋអាមេរិកនេះ ។ ក្នុងករណីនេះសត្វពាហនៈភាគច្រើនពេលដែលឆ្លងវីរុសមិនមានគ្រោះថ្នាក់នោះទេ ទោះបីជាការផ្ទុះឡើងនៃវីរុសនេះបានសម្លាប់មនុស្សរាប់ពាន់នាក់នៅសហរដ្ឋអាមេរិកក៏ដោយ ៕

ប្រែសម្រួលដោយ ៖ ជីវ័ន្ត

ប្រភព ៖ CNN

ចុចអាន ៖ Breaking News! អាមេរិកសម្រេចអនុញ្ញាតឲ្យប្រើប្រាស់វ៉ាក់សាំងកូវីដរបស់ក្រុមហ៊ុន Pfizer-BioNTech

ចុចអាន ៖ ក្រុមហ៊ុន Pfizer-BioNTech បញ្ជាក់ការស្លាប់មនុស្ស ៦ នាក់ក្នុងការសាកល្បងវ៉ាក់សាំងខ្លួន