លក្ខខណ្ឌ៤ចំណុច បើអ៊ុយក្រែនធ្វើបាន នោះរុស្ស៊ី នឹងបញ្ឈប់ប្រតិបត្តិការយោធាភ្លាមៗ

អ្នកនាំពាក្យវិមានក្រឹមឡាំងបាននិយាយកាលពីថ្ងៃចន្ទទី០៧ខែមីនាថា ប្រទេសរុស្ស៊ីបានប្រាប់អ៊ុយក្រែនថា ខ្លួនត្រៀមរួចជាស្រេចដើម្បីបញ្ឈប់ប្រតិបត្តិការយោធាភ្លាមៗ ប្រសិនបើទីក្រុង កៀវ បំពេញតាមលក្ខខណ្ឌដែលខ្លួនដាក់។

លោក Dmitry Peskov បាននិយាយថា ទីក្រុងមូស្គូ ទាមទារឲ្យអ៊ុយក្រែន ១.បញ្ឈប់សកម្មភាពយោធា ២.ផ្លាស់ប្តូររដ្ឋធម្មនុញ្ញរបស់ខ្លួនដើម្បីរក្សាអព្យាក្រឹតភាព ៣.ទទួលស្គាល់គ្រីមៀជាទឹកដីរបស់រុស្ស៊ី និង ៤.ទទួលស្គាល់សាធារណរដ្ឋផ្តាច់ខ្លួន Donetsk និង Lugansk ជារដ្ឋឯករាជ្យ។

នេះគឺជាសេចក្តីថ្លែងការណ៍ត្រង់ៗរបស់រុស្ស៊ីជាលើកដំបូង អំពីលក្ខខណ្ឌដែលខ្លួនចង់ដាក់លើអ៊ុយក្រែនដើម្បីបញ្ឈប់នូវអ្វីដែលខ្លួនហៅថាជា “ប្រតិបត្តិការយោធាពិសេស” ដែលឥឡូវបានឈានចូលដល់ថ្ងៃទី១៣ហើយ។

លោក Peskov បានប្រាប់រ៉យទ័រនៅក្នុងបទសម្ភាសន៍តាមទូរសព្ទថា អ៊ុយក្រែនបានដឹងអំពីលក្ខខណ្ឌនេះហើយ។ ហើយ​គេ​បាន​ប្រាប់​ថា ​អ្វីៗ​ទាំង​អស់​នេះ​អាច​ត្រូវ​បាន​បញ្ឈប់​ក្នុង​ពេលដ៏ខ្លីខាងមុខ។

ទោះបីជាយ៉ាងណាក៏ដោយ មិន​មាន​ប្រតិកម្ម​ភ្លាមៗ​ពី​ភាគី​អ៊ុយក្រែន​ទេ។

រុស្ស៊ីបានវាយប្រហារអ៊ុយក្រែន ពីភាគខាងជើង ខាងកើត និងខាងត្បូង ដោយវាយលុកទីក្រុងនានា រួមមានទីក្រុង កៀវ, Kharkov និងកំពង់ផែ Mariupol ផងដែរ។

ការលុកលុយដែលចាប់ផ្តើមនៅថ្ងៃទី២៤ខែកុម្ភៈ បានបណ្តាលឲ្យមានវិបត្តិជនភៀសខ្លួនអាក្រក់បំផុតនៅអឺរ៉ុប ចាប់តាំងពីសង្គ្រាមលោកលើកទី២មក បង្កឲ្យមានការខឹងសម្បានៅទូទាំងពិភពលោក និងនាំឲ្យមានការដាក់ទណ្ឌកម្មយ៉ាងធ្ងន់ធ្ងរលើទីក្រុងមូស្គូ។

ប៉ុន្តែអ្នកនាំពាក្យវិមានក្រឹមឡាំងបានទទូចថា រុស្ស៊ីមិនស្វែងរកការដណ្តើមយកទឹកដីអ៊ុយក្រែនបន្ថែមទៀតទេ ហើយវាមិនពិតឡើយ ដែលថា ខ្លួនកំពុងទាមទារឲ្យទីក្រុង កៀវ ប្រគល់ទឹកដីឲ្យ៕

ប្រែសម្រួល៖ Vann Vann

ប្រភព៖ Reuters

ចុចអាន៖ តម្លៃមាសនៅវៀតណាម ហក់ឡើងកប់ពពក ព្រោះឥទ្ធិពល សង្គ្រាមរុស្ស៊ី-អ៊ុយក្រែន