ដឹងទីតាំងនិងកាលបរិច្ឆេទ នៃកិច្ចចរចា រុស្ស៊ី-អ៊ុយក្រែន ជុំបន្ទាប់

ជុំបន្ទាប់នៃកិច្ចចរចារវាងរុស្ស៊ី និងអ៊ុយក្រែន នឹងប្រព្រឹត្តទៅនៅទីក្រុងអ៊ីស្តង់ប៊ុល​ នៃប្រទេសតួកគី នៅថ្ងៃអង្គារទី២៩ខែមីនា។ នេះបើយោងតាមការិយាល័យប្រធានាធិបតីតួកគី។

សេចក្តីថ្លែងការណ៍មួយ ពីនាយកដ្ឋានទំនាក់ទំនងរបស់ប្រធានាធិបតីតួកគី បាននិយាយថា ក្នុងអំឡុងកិច្ចសន្ទនាតាមទូរសព្ទកាលពីថ្ងៃអាទិត្យទី២៧ខែមីនា ប្រធានាធិបតីតួកគីលោក Recep Tayyip Erdogan និងសមភាគីរុស្ស៊ីលោក Vladimir Putin បានព្រមព្រៀងគ្នាថា កិច្ចប្រជុំបន្ទាប់នៃគណៈប្រតិភូរុស្ស៊ីនិងអ៊ុយក្រែន នឹងត្រូវរៀបចំធ្វើឡើងនៅក្នុងទីក្រុង អ៊ីស្តង់ប៊ុល។

ស្របពេលជាមួយគ្នានោះ អ្នកនាំពាក្យប្រធានាធិបតីតួកគី លោក Ibrahim Kalin បានប្រាប់ទូរទស្សន៍ CNN អន្តរជាតិកាលពីថ្ងៃអាទិត្យថា កិច្ចពិភាក្សានឹងធ្វើឡើងនៅថ្ងៃអង្គារនេះ។

លោក Erdogan និងលោក Putin បានពិភាក្សាគ្នាអំពីស្ថានភាពចុងក្រោយនៅក្នុងសង្គ្រាមរុស្ស៊ី-អ៊ុយក្រែន និងការខិតខំប្រឹងប្រែងចរចាររវាងរុស្ស៊ី និងអ៊ុយក្រែន។

ក្នុងអំឡុងពេលនៃកិច្ចប្រជុំនោះ លោកប្រធានាធិបតី Erdogan បានគូសបញ្ជាក់អំពីភាពចាំបាច់នៃការបង្កើតបទឈប់បាញ់ និងសន្តិភាពរវាងរុស្ស៊ី និងអ៊ុយក្រែនឲ្យបានឆាប់តាមដែលអាចធ្វើទៅបាន និងការកែលម្អស្ថានភាពមនុស្សធម៌នៅក្នុងតំបន់ ហើយបាននិយាយថា តួកគីនឹងបន្តរួមចំណែកក្នុងគ្រប់មធ្យោបាយដែលអាចធ្វើទៅបាន អំឡុងពេលដំណើរការនេះ៕

ប្រែសម្រួល៖ Vann Vann

ប្រភព៖ CNN

ចុចអាន៖ លោក Macron ព្រមានថា ការបោះពាក្យសម្តីមិនប្រយ័ត្ន នឹងធ្វើឲ្យសង្រ្គាមនៅអ៊ុយក្រែន កាន់តែអាក្រក់