លោក Biden និង Zelensky ពិភាក្សាគ្នាអំពីជំហានបន្ទាប់ក្នុងសង្គ្រាម រុស្ស៊ី

ប្រធានាធិបតីសហរដ្ឋអាមេរិកលោក Joe Biden បានសន្យាថានឹងផ្តល់ជំនួយបន្ថែមទៀតសម្រាប់ប្រជាជនអ៊ុយក្រែននៅក្នុងការហៅទូរស័ព្ទកាលពីថ្ងៃពុធជាមួយលោកប្រធានាធិបតី Volodymyr Zelensky ។

លោក Biden បានសន្យាផ្តល់ជំនួយថវិកាផ្ទាល់ចំនួន ៥០០ លានដុល្លារដល់អ៊ុយក្រែន ក្រោយលោក Zelenskyy បានស្នើសុំជំនួយម្តងទៀតក្នុងការការពារប្រទេសរបស់គាត់ ខណៈមន្ត្រីសេតវិមានបាននិយាយថា ពួកគេកំពុងធ្វើការលើរឿងនេះ ។

ទន្ទឹមនោះ មេដឹកនាំទាំងពីរក៏បានពិភាក្សាអំពីកិច្ចខិតខំប្រឹងប្រែងបន្ទាប់របស់សហរដ្ឋអាមេរិក និងសម្ព័ន្ធមិត្តរបស់ខ្លួនដើម្បីជួយដល់យោធាអ៊ុយក្រែន ក៏ដូចជាអាវុធដែលផ្គត់ផ្គង់ដោយសហរដ្ឋអាមេរិកបានប៉ះពាល់ដល់ជម្លោះនេះឬយ៉ាងណានោះ ។

បន្ថែមពីនេះ មន្ត្រីសេតវិមានបាននិយាយថា ពួកគេចង់ដាក់ការចំណាយយ៉ាងធ្ងន់ធ្ងរលើប្រទេសរុស្ស៊ីសម្រាប់អ្វីដែលពួកគេហៅថា “ការលុកលុយដ៏ព្រៃផ្សៃ” ខណៈពួកគេនឹងប្រកាសដាក់ទណ្ឌកម្មបន្ថែមទៀតនៅក្នុងប៉ុន្មានថ្ងៃខាងមុខនេះផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី កំពុងចល័តទ័ពដូរផែនការវាយលុក អ៊ុយក្រែន