ឡាវ ចាប់គ្រឿងញៀនទ្រង់ទ្រាយធំទម្ងន់ជិត ១តោន

ប្រភពព័ត៌មានបានឱ្យដឹងថា សមត្ថកិច្ចឡាវចាប់បានថ្នាំញៀនទ្រង់ទ្រាយធំជាថ្មីទៀត ខណៈដែលឈ្មួញកំពុងដឹកជញ្ជូនតាមព្រំដែនចូលតាមភូមិសាស្ត្រស្រុកហុងសា ខេត្តសាយ៉ាប៊ូលី ពោលគឺចាប់បានមេតំហ្វេតាមីនចំនួន ៩៥២គីឡូក្រាម និងម៉ាទឹកកកកន្លះតោន។

កាលពីថ្ងៃទី១៨ ខែមេសា លោកវរសេនីយ៍ទោ Thonglai Peddawong មេបញ្ជាការការពារសន្តិសុខ(អធិការ) ស្រុកហុងសា ខេត្តសាយ៉ាប៊ូលី (Xayabuli) បានថ្លែងអំពីប្រតិបត្តិការបង្រ្កាបគ្រឿងញៀនទ្រង់ទ្រាយធំ ចន្លោះពីថ្ងៃទី ១១-១២ ខែមេសាកន្លងទៅនេះ ដោយកម្លាំងសមត្ថកិច្ចចាប់បានវត្ថុតាងរួមមាន៖ គ្រឿងញៀនប្រភេទមេតំហ្វេតាមីនចំនួន ៩៥២គីឡូក្រាម និងប្រភេទម៉ាទឹកកកចំនួន ៥៣៤គីឡូក្រាម រថយន្ត ២គ្រឿង ទូរស័ព្ទដៃ ២គ្រឿង និងជនសង្ស័យ ១នាក់។

ទីប្រជុំជនស្រុកហុងសាមានចម្ងាយប្រហែល ៣៥គីឡូម៉ែត្រពីព្រំដែនថៃ ត្រង់ចំណុចស្រុកឆាឡើមព្រះគៀតខេត្តណាន(ថៃ)។ ចំណែកខេត្តសាយ៉ាប៊ូលីជាខេត្តស្ថិតនៅភាគខាងលិចនៃប្រទេសឡាវ៕

ប្រែសម្រួល៖ គង់ សំអាន

ប្រភព៖ Mgronline