បុរសនេប៉ាល់ បំបែកកំណត់ត្រា ឡើងភ្នំ Everest ច្រើនដងជាងគេ

បុរសជនជាតិនេប៉ាល់ម្នាក់ សម្រេចការឡើងភ្នំអេវឺរេស (Everest ) លើកទី ២៦ ក្លាយជាបុរសដំបូងដែលឡើងភ្នំនេះបានច្រើនដងជាងគេ។

លោក Kami Rita មកពីកុលសម្ព័ន្ធ Sherpa បានឡើងដល់កំពូលភ្នំអេវឺរេសលើកទី ២៦ ដែលមានកម្ពស់ ២៩,០៣៥ហ្វីត (៨៨៤៩ម៉ែត្រ) កាលពីថ្ងៃសៅរ៍ ទី៧ ខែឧសភា កន្លងទៅនេះ។

លោក Taranath Adhikari អគ្គនាយកនៃនាយកដ្ឋានទេសចរណ៍ក្នុងរដ្ឋធានី Kathmandu ប្រទេសនេប៉ាល់ និយាយថា “Kami Rita បានបំបែកកំណត់ត្រាផ្ទាល់ខ្លួនរបស់គាត់ និងបានបង្កើតកំណត់ត្រាពិភពលោកថ្មីមួយក្នុងការឡើងភ្នំ មិនធ្លាប់មាន”។

ដោយកើតនៅក្នុងគ្រួសារអ្នកឡើងភ្នំ Kami Rita គឺជាកូនប្រុសរបស់មគ្គុទ្ទេសក៍កុលសម្ព័ន្ធ Sherpa ដែលបានដឹកនាំអ្នកឡើងភ្នំបរទេសឡើងភ្នំអេវឺរេស បន្ទាប់ពីប្រទេសនេប៉ាល់បានបើកទូលាយទទួលភ្ញៀវពីខាងក្រៅ កាលពីឆ្នាំ១៩៥០។ ដូច្នេះមិនចម្លែកនោះទេ​ដែលបុរសវ័យ ៥២ឆ្នាំរូបនេះ អាចសម្រេចការឡើងភ្នំបានច្រើនដងម្ល៉ឹងៗ។

គួររំលឹកថា កាលពីឆ្នាំ ២០១៨ Kami Rita ធ្លាប់ទទួលបានតំណែងលេខ ១ ជាមួយនឹងការឡើងភ្នំលើកទី២២ ហើយកាលនោះគាត់ធ្លាប់ប្រកាសពីមហិច្ឆតារបស់គាត់ថានឹងឡើងភ្នំឱ្យបាន ២៥ដង មុនពេលគាត់ចូលនិវត្តន៍។ លុះមកដល់ថ្ងៃទី ៧ ឧសភា ២០២១ គាត់សម្រេចបំណងរបស់គាត់ ក្នុងការឡើងភ្នំលើកទី២៥ ហើយពីពេលថ្មីៗនេះ Kami Rita បានបំបែកកំណត់ត្រាផ្ទាល់ខ្លួនម្ដងទៀត ដោយអាចឡើងភ្នំអេវឺរេសលើកទី ២៦ ដោយជោគជ័យ៕

ប្រែសម្រួល៖ សន្យា

ចុចអាន៖ រកឃើញហើយ ឆ្កែខ្ពស់ជាងគេលើលោក កម្ពស់សឹងស្មើមនុស្ស