នយោបាយ​​អតិផរណា​​គឺ​​ជា​​បញ្ញា​​​ប្រឈម​​ចម្បង​​​របស់​​លោក​​ ចូ បៃដិន

ជាមួយនឹងតម្លៃកំពុងកើនឡើងធ្វើឲ្យប៉ះពាល់ដល់ប្រាក់ឈ្នួល និងឈឺចាប់ដល់គ្រួសារអាមេរិក លោកប្រធានាធិបតីសហរដ្ឋអាមេរិក ចូ បៃដិន បានលើកឡើងកាលពីថ្ងៃអង្គារ៍ ទី១០ ខែឧសភាថា អតិផរណាគឺជាអាទិភាពចម្បងរបស់លោក ប៉ុន្តែលោកប្រហែលជាមានឧបករណ៍មានកំណត់ដើម្បីដោះស្រាយបញ្ហា។

លោក បៃដិន ដែលកេរ្តិ៍ឈ្មោះរបស់លោកត្រូវបានវាយប្រហារដោយអតិផរណាខ្ពស់បំផុតក្នុងរយៈពេល៤ទសវត្សរ៍នេះបានគូសបញ្ជាក់ពីកិច្ចខិតខំប្រឹងរបស់លោកដើម្បីប្រយុទ្ធនឹងតម្លៃកំពុងកើនឡើង ខណៈទិដ្ឋភាពផ្ទុយស្រឡះទៅនឹងគោលនយោបាយដែលបានស្នើឡើងដោយគូប្រជែងគឺគណបក្សសាធារណៈ។

«ខ្ញុំចង់ឲ្យពលរដ្ឋអាមេរិកគ្រប់រូបដឹងថា ខ្ញុំកំពុងយកចិត្តទុកដាក់លើរឿងអតិផរណាខ្លាំងណាស់ ហើយវាជាអាទិភាពក្នុងស្រុកចម្បងរបស់ខ្ញុំ»។ លោក ចូ បៃដិន មានប្រសាសន៍នៅសេតវិមាន និងបន្ថែមថា «ខ្ញុំដឹងថា ក្រុមគ្រួសារទាំងអស់ទូទាំងអាមេរិកកំពុងរងការឈឺចាប់ដោយសារអតិផរណា»។

ជុំវិញអតិផរណាកើនឡើងខ្ពស់បំផុត លោកប្រធានាធិបតីអាមេរិករូបនេះបានបន្ទោសលើសង្គ្រាមនៅអ៊ុយក្រែនដែលយប្រហារដោយប្រទេសរុស្ស៊ី។ ការវាយប្រហារដែលចាប់ផ្តើមកាលពីចុងខែកុម្ភៈបណ្តាលឲ្យតម្លៃប្រេងឡើងខ្ពស់ ហើយបន្ទាប់មកតម្លៃម្ហូបអាហារក៏ឡើងដែរ។

លោក បៃដិន ថ្លែងថា ៖«ខ្ញុំដឹងថា អ្នកខកចិត្ត… ជឿខ្ញុំចុះ ខ្ញុំយល់ពីការខកចិត្ត»។

និយាយអំពីរបៀបវារៈរបស់គណបក្សសាធារណៈ លោក បៃដិន បានលើកឡើងថា ពួកគេបានធ្វើអ្វីគ្រប់យ៉ាងដើម្បីធ្វើឲ្យយឹតនូវកិច្ចខិតខំប្រឹងប្រែងរបស់លោកដើម្បីដោះស្រាយបញ្ហាសេដ្ឋកិច្ច។

លោក ចូ បៃដិន បានធានាដល់ប្រជាជនអាមេរិកថា ទុនបម្រុងសហព័ន្ធកំពុងធ្វើសកម្មភាពដើម្បីកាត់បន្ថយសម្ពាធអតិផរណា ដែលលោកហៅថា «បញ្ហាប្រឈមកំពូលដល់សេដ្ឋកិច្ច»។

កាលពីសប្តាហ៍មុន ធនាគារកណ្តាលអាមេរិកបានប្រកាសពីការកើនឡើងខ្ពស់បំផុតនៅក្នុងអត្រាការប្រាក់កម្ចីគិតចាប់តាំងពីឆ្នាំ២០០០មក ដែលជាការកើនឡើងលើកទីពីរចាប់តាំងពីខែមីនា ខណៈខ្លួនបានចាត់វិធានការដើម្បីទម្លាក់វិញឲ្យបានឆាប់។

ថ្លែងពីទិដ្ឋភាពនយោបាយដ៏រសើបនៃអតិផរណា លោក បៃដិន បានលើកឡើងថា លោកបានកំពុងពិចារណាលើកពន្ធពាណិជ្ជកម្មដែលត្រូវបានដាក់ដោយអតីតប្រធានាធិបតី ដូណាល់ ត្រាំ លើប្រទេសចិន។

លោកប្រាប់ថា ៖«យើងខ្ញុំកំពុងពិភាក្សាឥឡូវនេះ។ មិនទាន់មានការសម្រេចចិត្តទេ»។

លោក ចូ បៃដិន ស្ថិតក្រោមសម្ពាធមួយចំនួនដើម្បីដកពន្ធនៅក្នុងការប្រឹងប្រែងដើម្បីកាត់បន្ថយអតិផរណាកំពុងកើនឡើងដោយធ្វើឲ្យការនាំចូលរបស់អាមេរិកមានតម្លៃថោក៕

ប្រែសម្រួល៖ វីរបុត្រ
ប្រភព៖ AFP