កូរ៉េខាងជើង យកអំបិលរាប់ពាន់តោនផលិតថ្នាំសម្លាប់មេរោគ

អាជ្ញាធរកូរ៉េខាងជើងបាននិយាយថា អំបិលរាប់ពាន់តោនត្រូវបានបញ្ជូនជាបន្ទាន់ទៅកាន់រដ្ឋធានីព្យុងយ៉ាងដើម្បីពន្លឿនការផលិតថ្នាំសម្លាប់មេរោគ ។

ការបង្កើនផលិតថ្នាំសម្លាប់មេរោគនេះកើតឡើង ស្របពេលដែលប្រទេសកូរ៉េខាងជើងបានរាយការណ៍ថាមានករណីសង្ស័យថ្មីនៃជំងឺកូវីដ ១៩ ច្រើនជាង ២៦០,០០០ ករណីក្នុងរយៈពេលតែមួយថ្ងៃប៉ុណ្ណោះ ។

ទន្ទឹមនោះ កាសែត Rodong Sinmun របស់គណបក្សកាន់អំណាចបានរាយការណ៍នៅថ្ងៃព្រហស្បតិ៍នេះថា ករណីគ្រុនក្តៅថ្មីចំនួន ២៦២,២០០ ករណី និងការស្លាប់ម្នាក់ត្រូវបានបញ្ជាក់ក្នុងរយៈពេល ២៤ ម៉ោងចុងក្រោយនេះ ខណៈកូរ៉េខាងជើងបាននឹងកំពុងបញ្ជាក់ពីករណីគ្រុនក្តៅពី ២០០,០០០ ទៅ ៣០០,០០០ ជារៀងរាល់ថ្ងៃ ចាប់តាំងពីការផ្ទុះឡើងករណីឆ្លងដំបូងនៃជំងឺកូវីដ ១៩ កាលពីសប្តាហ៍មុន ។

ស្របពេលជាមួយគ្នានេះ អាជ្ញាធរសុខាភិក៏កំពុងសាងសង់មន្ទីរពេទ្យចល័តនៅទូទាំងប្រទេសផងដែរដើម្បីដាក់អ្នកជំងឺឲ្យនៅដាច់ដោយឡែក ដោយសារតែមនុស្សកាន់តែច្រើនធ្វើចត្តាឡីស័កនៅផ្ទះ ។ ទោះបីជាយ៉ាងណាក៏ដោយ មានការភ័យខ្លាចថា មនុស្សកាន់តែច្រើននឹងធ្លាក់ខ្លួនឈឺធ្ងន់ ដោយសារតែប្រព័ន្ធថែទាំសុខភាពដ៏ផុយស្រួយរបស់ប្រទេស និងកង្វះយុទ្ធនាការចាក់វ៉ាក់សាំងជាដើម ។

គួរបញ្ជាក់ថា រហូតមកដល់ពេលនេះមនុស្សប្រហែល ១.៩៧៨ លាននាក់មានរោគសញ្ញាគ្រុនក្តៅ និងមានអ្នកស្លាប់ចំនួន ៦៣ នាក់ ចាប់តាំងពីផ្ទុះឆ្លងកូវីដកាលពីចុងខែមេសាមក ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កូរ៉េខាងជើង ឲ្យប្រើថ្នាំទាំងនេះព្យាបាលកូវីដ