មនុស្សជាច្រើនមិនមែនចាត់ទុកថង់ប្លាស្ទិកច្រកភេសជ្ជៈរបស់ហាងមួយនៅ ថៃ ដូចប្រម៉ោយដំរីទេ

ម្ចាស់តូបលក់ភេសជ្ជៈតាមដងផ្លូវមួយកន្លែងក្នុងខេត្ត Songkhla ភាគខាងត្បូងប្រទេសថៃដែលបានប្រើថង់ប្លាស្ទិកមានរូបរាងដូចប្រម៉ោយដំរីដើម្បីច្រកតែទឹកដោះគោទឹកកក ឬកាហ្វេសម្រាប់អ្នកទិញកំពុងផ្ទុះការចាប់អារម្មណ៍យ៉ាងខ្លាំងលើបណ្ដាញសង្គម ។

ប៉ុន្តែទោះជាយ៉ាងណាក៏ដោយ ថង់ប្លាស្ទិកច្រកភេសជ្ជៈដែលហាងចាត់ទុកថាជា “ប្រម៉ោយដំរី” នោះត្រូវបានមនុស្សជាច្រើនមើលទៅដូចជា សេរីរាង្គបន្តពូជរបស់បុរស (លិង្គ) ទៅវិញ ។ ក្រោយមកម្ចាស់ហាងក៏បានចេញមកសុំទោសអតិថិជន ហើយបានប្រកាសថានឹងឈប់យកថង់ប្លាស្ទិកច្រកឲ្យអតិថិជនទៀតហើយផងដែរ ។

ទន្ទឹមនោះម្ចាស់ហាងក៏បានបង្ហោះនៅលើទំព័រហ្វេសប៊ុករបស់ខ្លួនផងដែរថា “យើងខ្ញុំសូមអភ័យទោសចំពោះអតិថិជនទាំងអស់សម្រាប់ថង់ច្រកភេសជ្ជៈរបស់យើង ហើយវានឹងលែងមានលក់ទៀតហើយ ដោយសារវាពាក់ព័ន្ធនឹងបញ្ហាមិនល្អជាច្រើន តែសូម​អរគុណ​ចំពោះ​ការ​ចាប់​អារម្មណ៍ និង​ការ​គាំទ្រ​យ៉ាង​ខ្លាំង​របស់​អ្នកទាំងអស់គ្នា” ។

គួរបញ្ជាក់ថា ការបង្ហោះនៅលើគណនីហ្វេសប៊ុករបស់អ្នកលេងម្នាក់មានឈ្មោះថា Cha Dean នាពេលថ្មីៗនេះបានបង្ហាញពីថង់ប្លាស្ទិកវេចខ្ចប់ភេសជ្ជៈដែលមើលទៅស្រដៀងនឹងប្រម៉ោយដំរីទទួលបានការគាំទ្រយ៉ាងច្រើនសម្រាប់ការច្នៃប្រឌិតមួយនេះ ប៉ុន្តវាក៏ទាក់ទាញការរិះគន់ពីអ្នកអភិរក្សនិយម និងអ្នកកាន់សាសនាផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation

ចុចអាន ៖ ក្រុមហ៊ុន Cambodia Airways បើកជើងហោះហើរត្រង់ ភ្នំពេញ-កោះ Samui របស់ ថៃ ២ ដងក្នុងមួយសប្ដាហ៍