លោក ពូទីន៖ សកម្មភាពគ្មានទំនួលខុសត្រូវរបស់ G7 បង្កឲ្យមានអតិផរណាជាសកល មិនមែនដោយសាររុស្ស៊ីទេ

ខណៈដែលបណ្តាប្រទេសលោកខាងលិច កំពុងស្វះស្វែងដោះស្រាយការកើនឡើងអតិផរណានោះ ប្រធានាធិបតីអាមេរិកលោក Joe Biden បានព្យាយាមស្តីបន្ទោសចំពោះការលំបាកផ្នែកសេដ្ឋកិច្ចនៅក្នុងប្រទេស និងអឺរ៉ុប ទៅលើប្រធានាធិបតីរុស្ស៊ី ដោយអះអាងថា អតិផរណាគឺជាលទ្ធផលនៃអ្វីដែលគេហៅថា “ការដំឡើងតម្លៃរបស់លោក ពូទីន”។

.

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយកាលពីថ្ងៃសុក្រទី២៤ខែមិថុនាថា ឫសគល់នៃអតិផរណាដែលកំពុងកើនឡើងខ្លាំងនៅទូទាំងពិភពលោក គឺដោយសារតែសកម្មភាពគ្មានទំនួលខុសត្រូវ រយៈពេលច្រើនឆ្នាំរបស់បណ្តាប្រទេស G7 មិនមែនដោយសារប្រតិបត្តិការយោធារបស់រុស្ស៊ីក្នុងប្រទេសអ៊ុយក្រែននោះទេ។

លោកពូទីន បាននិយាយក្នុងអំឡុងកិច្ចប្រជុំ BRICS Plus ថា “ការកើនឡើងយ៉ាងខ្លាំងនៃអតិផរណា មិនមែនកើតឡើងកាលពីម្សិលមិញទេ។ វាគឺជាលទ្ធផលនៃ គោលនយោបាយម៉ាក្រូសេដ្ឋកិច្ចដែលគ្មានការទទួលខុសត្រូវរយៈពេលច្រើនឆ្នាំរបស់ក្រុមប្រទេស G7”។

ស្របពេលប្រទេសលោកខាងលិច បន្តដាក់សម្ពាធលើរុស្ស៊ី ជុំវិញប្រតិបត្តិការយោធារបស់ខ្លួនក្នុងប្រទេសអ៊ុយក្រែន ពួកគេកំពុងជួបប្រទះនឹងការកើនឡើងនៃអតិផរណា។ នៅសហរដ្ឋអាមេរិក អតិផរណាបានកើនឡើង ៨,៦% ខណៈពេលអតិផរណាចក្រភពអង់គ្លេស ត្រូវបានរាយការណ៍ថាមាន ៩,១% និងនៅក្នុងតំបន់អឺរ៉ូ ៨,១%។

ទោះបីជាយ៉ាងណាក៏ដោយ លោកខាងលិចនៅតែបន្តថ្កោលទោសប្រតិបត្តិការយោធារបស់រុស្ស៊ីថាជា “ការលុកលុយ” ដោយទីក្រុងមូស្គូបានគូសបញ្ជាក់ថា ប្រតិបត្តិការនេះបានចាប់ផ្តើមជាការឆ្លើយតបទៅនឹងការអំពាវនាវរកជំនួយពីប្រជាជននៃតំបន់ Donbass និងមានគោលដៅចំពោះភាពគ្មានយោធា និងលុបបំបាត់លទ្ធិណាស៊ីនិយម របស់អ៊ុយក្រែន៕

ប្រែសម្រួល៖ Vann Vann

ប្រភព៖ Sputnik

ចុចអាន៖ អ៊ុយក្រែន បញ្ជាឲ្យកងទ័ពរបស់ខ្លួន ដកថយពីទីក្រុង Severodonetsk