អ៊ុយក្រែន​ ​ព្យាយាម​វាយ​ប្រហារ​គោល​ដៅ​យោធា​បេឡារុស តែ​មីស៊ីលទាំងអស់ ត្រូវ​ស្ទាក់​ចាប់បាន

ប្រធានាធិបតីបេឡារុស លោក Alexander Lukashenko បាននិយាយថា កងកម្លាំងប្រដាប់អាវុធអ៊ុយក្រែន បានព្យាយាមវាយប្រហារទៅលើគោលដៅយោធាជាច្រើនកន្លែងនៅក្នុងទឹកដីបេឡារុស ប្រហែលបីថ្ងៃមុន។

ទោះបីជាយ៉ាងណាក៏ដោយ ការវាយប្រហារបានបរាជ័យ ហើយមីស៊ីលទាំងអស់ត្រូវបានស្ទាក់ចាប់ដោយប្រព័ន្ធការពារដែនអាកាស Pantsir S-1។ នេះបើយោងតាមលោក Lukashenko។

លោក Lukashenko បានសង្កត់ធ្ងន់ថា រដ្ឋាភិបាលទីក្រុង មីនស្កិ៍ មិនចង់ធ្វើសង្រ្គាមប្រឆាំងនឹងអ៊ុយក្រែនទេ ហើយថា មិនមានទាហានបេឡារុសម្នាក់ណា ហ៊ានចូលទៅក្នុងទឹកដីរបស់ខ្លួនឡើយ។

“ពួកគេនៅតែព្យាយាមអូសយើងចូលទៅក្នុងសង្រ្គាមនៅអ៊ុយក្រែន។ គោលដៅគឺដូចគ្នា៖ ដើម្បីដោះស្រាយជាមួយរុស្ស៊ីនិងបេឡារុសក្នុងពេលតែមួយ។ អ្នកនយោបាយអ៊ុយក្រែន និងប្រធានាធិបតីមានគោលនយោបាយតែមួយ៖ ប្រជាជនអ៊ុយក្រែន ស្លាប់កាន់តែច្រើនទៅៗ។ ពួកគេនឹងស្រែកអំពីភាពឃោរឃៅនៃ ហ្វាស៊ីស ពីប្រទេសរុស្ស៊ី និងបេឡារុស។ សកម្មភាពរបស់ទីក្រុង កៀវ ត្រូវបានរៀបចំពីបរទេស”។

យ៉ាងណាក្តី លោកបានកត់សម្គាល់ថា ទីក្រុង មីនស្កិ៍ និងទីក្រុងមូស្គូ ត្រូវតែត្រៀមខ្លួនជាស្រេចដើម្បីផ្តល់ការឆ្លើយតប ក្នុងករណីដែលប្រទេសលោកខាងលិចធ្វើសកម្មភាពយ៉ាងគឃ្លើន។

ទីក្រុង មីនស្កិ៍ បានសង្កត់ធ្ងន់ម្តងហើយម្តងទៀតថា ខ្លួនមិនចូលរួមក្នុងប្រតិបត្តិការយោធាពិសេសរបស់រុស្ស៊ីនៅអ៊ុយក្រែនទេ ប៉ុន្តែទីក្រុង កៀវ នៅតែបន្តហៅខ្លួនថាជា “អ្នកលុកលុយ”។

លើសពីនេះ លោក Lukashenko អះអាងថា អ៊ុយក្រែនខ្លួនឯង កំពុងរៀបចំផែនការវាយប្រហារប្រឆាំងនឹងបេឡារុស មុនពេលប្រតិបត្តិការពិសេស ប៉ុន្តែត្រូវបានរារាំងដោយទីក្រុង មីនស្កិ៍ និងមូស្គូ៕

ប្រែសម្រួល៖ Vann Vann

ប្រភព៖ Sputnik

ចុចអាន៖ ទីប្រឹក្សាលោក Zelensky ទទួលស្គាល់ថា បន្ទាយធំចុងក្រោយ របស់អ៊ុយក្រែន ជិតធ្លាក់ទៅដៃ រុស្ស៊ី ហើយ