លោក Zelensky ពិចារណាបណ្ដេញទីភ្នាក់ងារសន្តិសុខ អ៊ុយក្រែន ២៨ នាក់ទៀត

ប្រធានាធិបតីអ៊ុយក្រែនលោក Volodymyr Zelensky បាននិយាយនៅលើ Telegram កាលពីថ្ងៃចន្ទថា ទីភ្នាក់ងារសន្តិសុខអ៊ុយក្រែន (SBU) កំពុងពិចារណាលើការសម្រេចចិត្តបណ្តេញចេញមន្ត្រីចំនួន ២៨ នាក់បន្ថែមទៀតជុំវិញការមិនពេញចិត្តការងាររបស់ពួកគេ ។

ប្រព័ន្ធផ្សព្វផ្សាយអ៊ុយក្រែនបានរាយការណ៍កាលពីថ្ងៃចន្ទថា ការពិចារណាបណ្ដេញបុគ្គលិកបន្ថែមទៀតនេះកើតឡើង ស្របពេលដែលអតីតប្រធាន SBU ប្រចាំតំបន់ Crimea លោក Oleg Kulinich ក៏ត្រូវបានចាប់ខ្លួន ក្រោមការសង្ស័យថា ប្រព្រឹត្តអំពើក្បត់ជាតិ ។

ទន្ទឹមនោះ លោក Zelensky ក៏បានណែនាំនាយករដ្ឋមន្ត្រីអ៊ុយក្រែនលោក Denis Shmygal ឲ្យចាប់ផ្តើមដំណើរការជ្រើសរើសប្រធានថ្មីនៃការិយាល័យប្រឆាំងអំពើពុករលួយជាតិអ៊ុយក្រែន (NABU) បន្ទាប់ពីប្រព័ន្ធផ្សព្វផ្សាយអ៊ុយក្រែនបានរាយការណ៍កាលពីថ្ងៃអាទិត្យថា នាយក NABU លោក Artem Sytnyk ក៏ត្រូវបានបណ្តេញចេញពីតំណែងដូចគ្នា ។

ស្របពេលជាមួយគ្នានេះ មេដឹកនាំអ៊ុយក្រែនបាននិយាយទៀតថា លោកក៏បានបណ្តេញអគ្គរដ្ឋអាជ្ញាអ៊ុយក្រែនលោកស្រី Irina Venediktova ក៏ដូចជាប្រមុខទីភ្នាក់ងារសន្តិសុខអ៊ុយក្រែន (SBU) លោក Ivan Bakanov ពីបទក្បត់ជាតិដូចគ្នា ។

បន្ថែមពីនេះកាលពីខែមុនសារព័ត៌មាន Politico ក៏បានរាយការណ៍ដែរថា លោក Zelenskyy មានបំណងបណ្តេញលោក Bakanov ចេញពីតំណែងយូរមកហើយ បន្ទាប់ពីមិនពេញចិត្តនឹងការងាររបស់គាត់ជុំវិញការបាត់បង់ទឹកដីដ៏ធំនៅតំបន់ Donbas របស់អ៊ុយក្រែនទៅលើកណ្ដាប់ដៃរុស្ស៊ី ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ជម្លោះ រុស្ស៊ី-អ៊ុយក្រែន នឹងបញ្ចប់ស្រដៀងសង្គ្រាមកូរ៉េ