កូរ៉េខាងជើង ចោទ អាមេរិក ថាជា “រដ្ឋភេរវករជីវសាស្ត្រ”

យោងតាមទីភ្នាក់ងារសារព័ត៌មានកូរ៉េ KCNA បានឲ្យដឹងថា ប្រទេសកូរ៉េខាងជើងបានចោទប្រកាន់សហរដ្ឋអាមេរិកកំពុងប្រព្រឹត្ត “អំពើភេរវកម្មជីវសាស្រ្ត” ដែលរួមបញ្ចូលទាំងការងារពិសោធន៍ដោយប្រើភ្នាក់ងារបង្ករោគដ៏គ្រោះថ្នាក់នៅលើទឹកដីនៃប្រទេសអ៊ុយក្រែន និងការរីករាលដាលនៃជំងឺឆ្លងជាដើម ។

KCNA បាននិយាយកាលពីថ្ងៃអាទិត្យថា “សហរដ្ឋអាមេរិកគឺជារដ្ឋភេរវករជីវសាស្រ្ត ដោយសារតែបានបង្កើតមន្ទីរពិសោធន៍ជីវសាស្រ្តជាច្រើននៅក្នុងប្រទេស និងតំបន់ជាច្រើនផ្សេងទៀតរួមទាំងនៅអ៊ុយក្រែនផងដែរ” ។

KCNA បានរាយការណ៍ថា ការចែកចាយមន្ទីរពិសោធន៍ជីវសាស្រ្តរបស់សហរដ្ឋអាមេរិកនៅជុំវិញពិភពលោកត្រូវគ្នាទៅនឹងកន្លែងផ្ទុះឡើងនៃជំងឺផ្សេងៗត្រូវបានចុះបញ្ជីក្នុងប៉ុន្មានឆ្នាំកន្លងមកនេះ ខណៈទីតាំង​ទាំងនេះ​ភាគច្រើន​ជា​ចង្កោម​ជុំវិញ​រដ្ឋ​ប្រឆាំង​អាមេរិក ។

KCNA បាននិយាយទៀតថា “វាមិនមែនជារឿងចម្លែកទេដែលចំពោះការលើកឡើងថា សហរដ្ឋអាមេរិកនៅពីក្រោយវិបត្តិជំងឺរាតត្បាតកូវីដ ១៩ ដ៏សាហាវ ដែលធ្វើឲ្យសហគមន៍អន្តរជាតិមានការភ័ន្តច្រឡំ” ។

កាលពីថ្ងៃទី ៩ ខែមិថុនា ក្រសួងការពារជាតិអាមេរិកបាននិយាយថា សហរដ្ឋអាមេរិកបានជួយផ្តល់ជំនួយដល់មន្ទីរពិសោធន៍ជីវសាស្រ្តចំនួន ៤៦ នៅអ៊ុយក្រែនក្នុងគោលបំណងធ្វើឲ្យប្រសើរឡើងនូវសន្តិសុខជីវសាស្រ្ត និងតាមដានជំងឺឆ្លង ។

ដោយឡែកកាល​ពី​ខែ​កុម្ភៈ ក្រសួង​ការពារ​ជាតិ​រុស្ស៊ី​បាន​រក​ឃើញ​​មន្ទីរ​ពិសោធន៍​ជីវសាស្ត្រ​យោធា​ចំនួន ៣០ ដែល​ផ្តល់​មូលនិធិ​ដោយ​សហរដ្ឋ​អាមេរិកកំពុងដំណើរការ​នៅ​ក្នុង​ប្រទេស​អ៊ុយក្រែន ខណៈយោងតាមរដ្ឋាភិបាលទីក្រុងមូស្គូបានឲ្យដឹងថា ទីក្រុងវ៉ាស៊ីនតោនបានចំណាយប្រាក់ជាង ២០០ លានដុល្លារ ដើម្បីអភិវឌ្ឍអាវុធជីវសាស្រ្តនៅតាមកន្លែងនានា ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក កំពុងភ័យថា ចិន អាចដាក់តំបន់គ្មានការហោះហើរលើ តៃវ៉ាន់