ព័ត៌មានអន្ដរជាតិ

រដ្ឋបាលត្រាំ បង្កកជំនួយយោធា ៤០០លានដុល្លារ សម្រាប់អ៊ុយក្រែន ទោះបីសភាអនុម័តរួចយូរហើយ

បានផុស

៤០ នាទី មុន

នៅ

ថ្ងៃពុធ ២២ កក្កដា ២០២៦

ដោយ

ព្រឹទ្ធសមាជិកអាមេរិក បានទម្លាយឲ្យដឹងជាថ្មីទៀតថា កញ្ចប់ជំនួយយោធាបន្ថែម តម្លៃ ៤០០ លានដុល្លារសម្រាប់អ៊ុយក្រែន នឹងមិនត្រូវបានផ្ទេរឲ្យអ៊ុយក្រែន នៅក្រោមការគ្រប់គ្រងរបស់រដ្ឋបាលអាមេរិកបច្ចុប្បន្ននោះទេ បើទោះបីជាកញ្ចប់ជំនួយនេះ ត្រូវបានអនុម័តដោយសភាអាមេរិករួចហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារព័ត៌មានរុស្ស៊ី TASS នៅតថ្ងៃទី២១ ខែកក្កដា បានផ្សាយថា ព័ត៌មានខាងលើនេះ ត្រូវបានប្រកាសដោយសមាជិកព្រឹទ្ធសភាលោក Dick Durbin (មកពីគណបក្សប្រជាធិបតេយ្យ នៃរដ្ឋ Illinois) នៅក្នុងសវនាការរបស់គណៈកម្មាធិការបកស្រាយនៃព្រឹទ្ធសភាអាមេរិក។

ព្រឹទ្ធសមាជិក Durbin បានលើកឡើងថា រដ្ឋាភិបាលបានជូនដំណឹងដល់សភាថា កញ្ចប់ជំនួយនេះនឹងមិនត្រូវបានបញ្ចេញក្នុងអំឡុងពេលអាណត្តិរបស់ប្រធានាធិបតី កំពុងកាន់តំណែងនោះទេ។

នៅពេលត្រូវបានសុំឲ្យបញ្ជាក់លើរឿងនេះ នាយកសេនាធិការចម្រុះយោធាសហរដ្ឋអាមេរិក លោក Dan Caine បានលើកឡើងថា លោកមិនទាន់ទទួលបានព័ត៌មានអំពីសេចក្តីសម្រេចនេះនៅឡើយទេ។ ជាក់ស្ដែង ផែនការបែងចែកថវិកាដែលសភាបានទទួល បង្ហាញថា ចំនួនទឹកប្រាក់ខាងលើ បច្ចុប្បន្នត្រូវបានរំពឹងថា នឹងយកទៅប្រើប្រាស់ក្នុងឆ្នាំថវិកា ២០២៩ ដែលមានន័យថា ការបញ្ចេញថវិកានឹងត្រូវសម្រេចដោយប្រធានាធិបតីអាមេរិកអាណត្តិក្រោយ (ក្រោយការបោះឆ្នោត) ថា តើគួរប្រើប្រាស់វា ឬយ៉ាងណា។

សវនាការនេះក៏មានការចូលរួមពីប្រធានមន្ទីរសង្រ្គាមអាមេរិក លោក Pete Hegseth ផងដែរ។ ទោះជាយ៉ាងណាក៏ដោយ មកទល់ពេលនេះ មន្ទីរបញ្ចកោណ មិនទាន់មានការអត្ថាធិប្បាយណាមួយជុំវិញព័ត៌មានដែលចេញផ្សាយដោយសមាជិកព្រឹទ្ធសភា លោក Durbin ឡើយ។

យ៉ាងណា ចំណាត់ការនេះបានកើតឡើង ខណៈដែលគោលនយោបាយជំនួយយោធារបស់អាមេរិកចំពោះអ៊ុយក្រែន នៅតែបន្តជាប្រធានបទចម្រូងចម្រាសនៅក្នុងទីក្រុងវ៉ាស៊ីនតោន។ សមាជិកព្រឹទ្ធសភាខ្លះគាំទ្រការបន្តការឧបត្ថម្ភដល់ទីក្រុងកៀវ ខណៈពេលដែលអ្នកផ្សេងទៀតយល់ថា ទំហំ និងវឌ្ឍនភាពនៃការបញ្ចេញកញ្ចប់ជំនួយ ចាំបាច់ត្រូវយកមកពិនិត្យឡើងវិញ៕

អត្ថបទ ៖ សាង ស្រីល័ក្ខ