រកឃើញបុរសជនជាតិថៃឆ្លងជំងឺអុតស្វាមានដំបៅនៅលើប្រដាប់ភេទ បន្ទាប់ពីរួមភេទរយៈ ៧ថ្ងៃ

នាយកដ្ឋាន​ប្រយុទ្ធប្រឆាំង​នឹង​ជំងឺឆ្លងនៃក្រសួងសុខាភិបាលថៃ បានជំរុញឱ្យអាជ្ញាធរពាក់ព័ន្ធពន្លឿនការស្វែងខ្លួនអ្នកប៉ះពាល់ដោយផ្ទាល់ដែលមានហានិភ័យខ្ពស់ពីករណីជំងឺអុតស្វាករណីទី២ គ្រងការឆ្លងរាលដាលនៃជំងឺនេះ បន្ទាប់រកឃើញបុរសម្នាក់ឆ្លងជំងឺអុតស្វាមានដំបៅនៅលើប្រដាប់ភេទ បន្ទាប់ពីរួមភេទរយៈ ៧ថ្ងៃ ដោយមិនបានការពារ។

នៅថ្ងៃទី២៩ ខែកក្កដានេះ លោកវេជ្ជបណ្ឌិត អូផាស កានកាវិនផុង អគ្គនាយកនៃអគ្គនាយកដ្ឋាន​គ្រប់គ្រង​ជំងឺ​បានឱ្យ​ដឹង​ថា ចំពោះ​ករណីរកឃើញអ្នក​ជំងឺ​អុតស្វាករណី​ទី២​នៅ​ទីក្រុង​បាងកក​នោះ រដ្ឋមន្ត្រី​ក្រសួងសុខាភិបាល ក្នុងនាមជាប្រធានគណៈកម្មាធិការជាតិប្រយុទ្ធប្រឆាំងនឹងជំងឺឆ្លង បានណែនាំ និងយកចិត្តទុកដាក់ក្នុងការត្រួតពិនិត្យ តាមដាន បង្ការ និងទប់ស្កាត់ការឆ្លងរាលដាលនៃជំងឺអុតស្វានេះ។

នាយកដ្ឋាន​ប្រយុទ្ធប្រឆាំង​នឹង​ជំងឺឆ្លង​បាន​ចាត់តាំង​ភ្នាក់ងារទៅកាន់តំបន់ ដើម្បីពន្លឿនការស្វែងរកអ្នកដែលបានប៉ះពាល់ដោយផ្ទាល់នឹងអ្នកជំងឺដែលមានហានិភ័យខ្ពស់នៅមន្ទីរពេទ្យវ៉ាឆីរ៉ា(Wachira)ក្រុងបាងកក ដែលអ្នកជំងឺខាងលើបានចូលមកធ្វើតេស្ត និងសម្រាកព្យាបាល។ និងផ្សព្វផ្សាយដល់ស្ថាប័នពាក់ព័ន្ធក្នុងតំបន់ ដើម្បីអនុវត្តន៍ការតាមដាន និងត្រួតពិនិត្យបន្ថែមទៀតអំពីជំងឺ តាម​ការ​ណែនាំដើម្បី​គ្រប់គ្រង​ការឆ្លង​រាល​ដាល​នៃ​ជំងឺ​អុត​ស្វានេះ និង​ដើម្បីសុវត្ថិភាព​របស់​ប្រជាពលរដ្ឋនៅ​ក្នុង​តំបន់។

បច្ចុប្បន្នអ្នកប៉ះពាល់ដោយផ្ទាល់ដែលមានហានិភ័យខ្ពស់ចំនួន ១៣នាក់ត្រូវបានរកឃើញ ហើយកំពុងស្ថិតក្រោមការត្រួតពិនិត្យនិងតាមដានរោគសញ្ញា និងត្រូវបានដាក់ឱ្យនៅដាច់ដោយឡែកពីគេរយៈពេល ២១ថ្ងៃ និងកំពុងពន្លឿនការស្វែងរកអ្នកប៉ះពាល់បន្តទៀត៕

ប្រែសម្រួល៖ គង់ សំអូន

ប្រភព៖ naewna

ចុចអាន៖ ថៃ រកឃើញអ្នកកើតជំងឺអុតស្វាទី ២ ក្រោយរួមភេទជាមួយបុរសបរទេស