លោក ពូទីន ផ្តល់រង្វាន់ឲ្យម្តាយរុស្ស៊ីរូបណា ដែលមានកូន១០នាក់ឡើងទៅ

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានផ្តល់រង្វាន់ “Mother Heroine” សម្រាប់ស្ត្រីទាំងឡាយណា ដែលមានកូនដប់នាក់ ឬច្រើនជាងនេះ។ នេះជារង្វាន់សម័យសូវៀត ប៉ុន្តែត្រូវលោក ពូទីន យកមកប្រគល់សាជាថ្មី ចំពេលដែលទីក្រុងមូស្គូ កំពុងប្រឈមមុខនឹងវិបត្តិប្រជាសាស្រ្តកាន់តែធ្ងន់ធ្ងរ ក្នុងអំឡុងពេលសង្គ្រាមរុស្ស៊ី-អ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Mother Heroine គឺជាឋានន្តរសក្តិកិត្តិយសនៅក្នុងសហភាពសូវៀត ដែលត្រូវបានផ្តល់ឲ្យសម្រាប់ការចិញ្ចឹម បីបាច់គ្រួសារដ៏ធំមួយ ពោលគឺការចិញ្ចឹមកូន ១០ នាក់ ឬច្រើនជាងនេះ។

ទីភ្នាក់ងារសារព័ត៌មានរុស្ស៊ី TASS បានរាយការណ៍ថា ក្រឹត្យមួយដែលចេញផ្សាយកាលពីថ្ងៃចន្ទទី១៥ខែសីហា លើវេបសាយព័ត៌មានច្បាប់ផ្លូវការ បាននិយាយថា រង្វាន់នេះផ្តល់ឲ្យស្ត្រីជាម្តាយនូវសាច់ប្រាក់ចំនួន ១៦ ១៣៨ ដុល្លារអាមេរិក។

យោងតាមក្រឹត្យនេះ, ម្តាយដែលមានលក្ខណៈសម្បត្តិគ្រប់គ្រាន់ នឹងទទួលបានរង្វាន់ភ្លាមៗនៅពេលកូនទី១០របស់ពួកគេ មានអាយុគ្រប់១ឆ្នាំ។ ពួកគេនឹងនៅតែមានលក្ខណៈគ្រប់គ្រាន់សម្រាប់ទទួលរង្វាន់នេះ ប្រសិនបើពួកគេបាត់បង់កូននៅក្នុងសមរភូមិ អំឡុងពេលមានអំពើភេរវកម្ម ឬក្នុងស្ថានភាពគ្រាអាសន្នណាមួយ។

ពានរង្វាន់ “Mother Heroine” ត្រូវបានបង្កើតឡើងជាលើកដំបូងក្នុងឆ្នាំ១៩៤៤ ដោយអតីតមេដឹកនាំសូវៀតលោក Josef Stalin។ រង្វាន់នេះ ត្រូវបានប្រកាសនៅពេលសូវៀត បាត់បង់ប្រជាជនយ៉ាងច្រើនសន្ធឹកសន្ធាប់ ក្នុងអំឡុងសង្គ្រាមលោកលើកទីពីរ។ ដោយសារតែការដួលរលំនៃសហភាពសូវៀតក្នុងឆ្នាំ១៩៩១ រង្វាន់នេះក៏ឈប់ផ្តល់ឲ្យដែរ។

គួរបញ្ជាក់ថា ក្នុងរយៈពេលប៉ុន្មានទសវត្សរ៍ចុងក្រោយនេះ ចំនួនប្រជាជននៅក្នុងប្រទេសរុស្ស៊ីបានធ្លាក់ចុះយ៉ាងខ្លាំង ដែលធ្វើឲ្យអាជ្ញាធរមានការភ្ញាក់ផ្អើល។ ចំនួនប្រជាជនសរុបបានធ្លាក់ចុះដល់ ១៤៥.១ លាននាក់ បន្ទាប់ពីការធ្លាក់ចុះប្រហែល ៤០០ ០០០នាក់នៅដើមឆ្នាំ២០២២នេះ៕

ប្រែសម្រួល៖ Vann Vann

ប្រភព៖ Wio News

ចុចអាន៖ រុស្ស៊ីព្រមាន ប៉ះទង្គិចផ្នែកយោធាដោយផ្ទាល់ជាមួយ សហរដ្ឋអាមេរិក