រុស្ស៊ី បាញ់ផ្លោងរោងចក្រថាមពលកម្ដៅកាត់ផ្ដាច់អគ្គិសនីនៅភាគខាងកើត អ៊ុយក្រែន

ការដាច់ភ្លើងទ្រង់ទ្រាយធំបានវាយប្រហារភាគខាងកើតអ៊ុយក្រែន បន្ទាប់ពីកងកម្លាំងរុស្ស៊ីបានបាញ់ផ្លោងរោងចក្រថាមពលកម្ដៅ និងកន្លែងផ្គត់ផ្គង់ទឹកនៅក្នុងតំបន់ Kharkov ។

មន្ត្រីអ៊ុយក្រែនបាននិយាយថា ការវាយប្រហារនេះបានកើតឡើងកាលពីថ្ងៃអាទិត្យ ដែលបណ្តាលឲ្យមានការផ្ទុះរាលដាលនៅជុំវិញតំបន់ Kharkiv និង Donetsk ។

ទន្ទឹមនោះអភិបាលក្រុង Kharkiv បាននិយាយថា កងកម្លាំងរុស្ស៊ីបានកាត់ផ្ដាច់អគ្គិសនីនៅក្នុងការវាយប្រហារសងសឹក នៅពេលដែលកងទ័ពអ៊ុយក្រែនវាយដណ្តើមបានទឹកដីមួយចំនួនវិញនៅភាគខាងកើតអ៊ុយក្រែន ។

ចំណែកប្រធានាធិបតីអ៊ុយក្រែនលោក Volodymyr Zelensky បានថ្កោលទោសរុស្ស៊ីនៅក្នុងសារមួយដែលបានបង្ហោះនៅលើប្រព័ន្ធផ្សព្វផ្សាយសង្គមថា “ភេរវកររុស្ស៊ីបានវាយប្រហារហេដ្ឋារចនាសម្ព័ន្ធសំខាន់ៗរបស់យើងជាច្រើន” ។

ជាចុងក្រោយលោក Zelensky បានបញ្ជាក់ថា “គោលដៅរបស់កងកម្លាំងរុស្ស៊ីគឺដើម្បីបង្អត់មនុស្សមិនឲ្យមានពន្លឺ និងកម្ដៅជំនួសឲ្យការផ្តោតទៅលើទីតាំងយោធារបស់អ៊ុយក្រែន” ។

គួរបញ្ជាក់ថា រហូតមកពេលនេះសង្គ្រាមលុកលុយរបស់រុស្ស៊ីលើអ៊ុយក្រែនដែលលោក ពូទីន ចាត់ទុកជាប្រតិបត្តិការយោធាពិសេសបានអូសបន្លាយពេលជាង ៦ ខែមកហើយ បន្ទាប់ពីផ្ទុះការវាយលុកលើទីក្រុងកៀវកាលពីថ្ងៃទី២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ហុងគ្រី ថា ពេលនេះសហភាពអឺរ៉ុបអស់ថាមពលប្រើប្រាស់ហើយ