ព័ត៌មានអន្ដរជាតិ

លោក Zelensky ថា សាកសពក្នុងផ្នូរដែលទើបរកឃើញ សុទ្ធតែត្រូវធ្វើទារុណកម្ម

បានផុស

៣ years មុន

នៅ

ថ្ងៃសៅរ៍ ១៧ កញ្ញា ២០២២

ដោយ

លោក Volodymyr Zelensky បាននិយាយថា ក្រុមអ្នកស៊ើបអង្កេតទើបតែរកឃើញភស្តុតាងនៅទីបញ្ចុះសពដ៏ធំមួយក្នុងប្រទេសអ៊ុយក្រែន ខណៈអ្នកស្លាប់មួយចំនួនត្រូវគេធ្វើទារុណកម្ម សពខ្លះបាក់ដៃជើង និងមានខ្សែពួរជុំវិញករបស់ពួកគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងវីដេអូមួយ ដែលត្រូវបានចែករំលែកត្រឹមតែប៉ុន្មានម៉ោង បន្ទាប់ពីទីក្រុង Izyum ដែលទើបនឹងយកបានមកវិញពីកងកម្លាំងរុស្ស៊ី លោក Zelensky បញ្ចាក់ថា ផ្នូរជាង៤០០ ត្រូវបានរកឃើញនៅកន្លែងនោះ។

លោកបាននិយាយថា មនុស្សធំ និងកុមារស៊ីវិលរាប់រយនាក់ ក៏ដូចជាទាហាន ត្រូវបានគេរកឃើញថា “ធ្វើទារុណកម្ម បាញ់សម្លាប់ដោយការបាញ់ផ្លោង” នៅជិតទីបញ្ចុះសព Pishchanske នៃទីក្រុង Izyum ។

ទន្ទឹមនោះ អ្នកសារព័ត៌មាន Al Jazeera បានរាយការណ៍ថា ឃើញផ្នូរដែលមានឈើឆ្កាងសាមញ្ញ។ សពខ្លះដាក់ឈ្មោះ ថ្ងៃខែឆ្នាំកំណើត និងមរណភាព ប៉ុន្តែខ្លះទៀតគ្រាន់តែជាលេខប៉ុណ្ណោះ។ កន្លែងនេះមានភាពក្រៀមក្រំ សាកសពស្ថិតក្នុងស្ថានភាពអាក្រក់ខ្លាំង អ្នកខ្លះហាក់ដូចជាបាត់បង់ជីវិតតាំងពីយូរយារណាស់មកហើយ ខណៈដែលសពរបស់ពួកគេ កំពុងរលួយ វានឹងក្លាយជាការងារដ៏ធំសម្រាប់អ្នកជំនាញផ្នែកកោសល្យវិច័យ។

យ៉ាងណាមិញ ប្រសិនបើចំនួនសាកសពត្រូវបានបញ្ជាក់ នោះទីតាំងនៅ Izyum ដែលជាអតីតបន្ទាយជួរមុខរបស់រុស្ស៊ី នឹងក្លាយជាកន្លែងបញ្ចុះសពដ៏ធំបំផុត នៅក្នុងទ្វីបអឺរ៉ុប ចាប់តាំងពីក្រោយសង្គ្រាមបាល់កង់ឆ្នាំ ១៩៩០ មក៕

ប្រែសម្រួល៖ សាង ស្រីល័ក្ខ

ប្រភព៖AL Jazeera

ចុចអាន៖អ៊ុយក្រែន រកឃើញផ្នូរដាក់សពមនុស្សជាង ៤០០នាក់ក្នុងទីក្រុង Izium ក្រោយរុស្ស៊ី ដកទ័ព