ប្រធានាធិបតី កូរ៉េខាងត្បូង នឹងចូលរួមកិច្ចប្រជុំកំពូលអាស៊ាននៅ កម្ពុជា

ប្រធានាធិបតីកូរ៉េខាងត្បូងលោក Yoon Suk-yeol នឹងចូលរួមកិច្ចប្រជុំកំពូលអាស៊ានលើកទី ៤០ និង ៤១ នៅប្រទេសកម្ពុជា ដើម្បីពង្រឹងទំនាក់ទំនងសេដ្ឋកិច្ច និងសន្តិសុខជាមួយតំបន់ ក៏ដូចជា បង្ហាញពីយុទ្ធសាស្ត្រឥណ្ឌូប៉ាស៊ីហ្វិក និងអាស៊ានថ្មីរបស់ប្រទេសជាតិ ។

លោក Yoon នឹងចូលរួមកិច្ចប្រជុំកំពូលអាស៊ានតែម្ដង នៅពេលលោកមកដល់រាជធានី​ភ្នំពេញ នៅថ្ងៃទី១១ ខែវិច្ឆិកា ដើម្បីបង្ហាញអំពីយុទ្ធសាស្ត្រឥណ្ឌូប៉ាស៊ីហ្វិកថ្មីរបស់រដ្ឋាភិបាល និងគោលនយោបាយអាស៊ាន ដែលហៅថា គំនិតផ្តួចផ្តើមសាមគ្គីភាព កូរ៉េ-អាស៊ាន ។

នៅថ្ងៃបន្ទាប់ លោកប្រធានាធិបតីកូរ៉េខាងត្បូង​នឹង​ចូល​រួមកិច្ចប្រជុំ​អាស៊ាន​បូក​បី ខណៈកិច្ចប្រជុំនេះគឺជាកិច្ចសហប្រតិបត្តិការក្នុងតំបន់ដែលបានចាប់ផ្តើមសម្រាប់ការឆ្លើយតបរួមគ្នា បន្ទាប់ពីវិបត្តិហិរញ្ញវត្ថុអាស៊ីក្នុងឆ្នាំ ១៩៩៧ ហើយមានការចូលរួមប្រជុំពីប្រទេសសមាជិកអាស៊ានចំនួន ១០ រួមជាមួយកូរ៉េខាងត្បូង ជប៉ុន និងចិន ។

ចំណែកនៅថ្ងៃអាទិត្យ ទី១៣ លោកប្រធានាធិបតីកូរ៉េនឹងចូលរួមកិច្ចប្រជុំកំពូលអាស៊ីបូព៌ា ដែលមានការចូលរួមពីប្រទេសអាស៊ានទាំង ១០ រួមជាមួយកូរ៉េខាងត្បូង អូស្ត្រាលី ចិន ឥណ្ឌា ជប៉ុន នូវែលសេឡង់ រុស្ស៊ី និងសហរដ្ឋអាមេរិក ។

គួរបញ្ជាក់ថា បន្ទាប់ពីចាកចេញពីកម្ពុជា លោក Yoon Suk-yeol នឹង​ចាកចេញ​ទៅ​កោះ​បាលី ប្រទេស​ឥណ្ឌូណេស៊ី នៅ​ថ្ងៃ​ចន្ទ ទី១៤ ខែវិច្ឆិកា ដើម្បី​ចូលរួម​កិច្ច​ប្រជុំ​កំពូល G20 ហើយនេះគឺ​ជា​ដំណើរទស្សនិច្ចលើក​ដំបូង​របស់​លោក​ទៅ​អាស៊ី​អាគ្នេយ៍ ​ចាប់​តាំង​ពី​ចូល​កាន់​តំណែង ៕

ប្រែសម្រួលដោយ ៖ ជីវ័ន្ត

ប្រភព ៖ Korea Herald

ចុចអាន ៖ ក្រៅពីអរគុណ កម្ពុជា, រដ្ឋមន្ត្រីការបរទេស អ៊ុយក្រែន ផ្ដោតលើបញ្ហា ២ ទៀត​ជាមួយសម្ដេចតេជោ ហ៊ុន សែន