លោក Zelensky ថា សម្ព័ន្ធមិត្ត អឺរ៉ុប ត្រៀមបញ្ជូនយន្តហោះឲ្យ អ៊ុយក្រែន រួចហើយ

លោក Volodymyr Zelensky និយាយថា មេដឹកនាំអឺរ៉ុបមួយចំនួនបានត្រៀមរួចជាស្រេចដើម្បីផ្គត់ផ្គង់យន្តហោះចម្បាំងដល់ទីក្រុងកៀវ បន្ទាប់ពីលោកធ្វើដំណើរទៅក្រៅប្រទេសរយៈពេល ២ ថ្ងៃ ក្នុងការស្វែងរកអាវុធថ្មីៗពីបណ្ដាប្រទេសលោកខាងលិច ។

លោក Zelensky បញ្ជាក់ថា អឺរ៉ុបនឹងនៅជាមួយអ៊ុយក្រែនរហូតដល់ទទួលបានជ័យជម្នះ ដោយអឺរ៉ុបក៏នឹងត្រៀមផ្តល់អាវុធ និងជំនួយដែលចាំបាច់ជាច្រើនថែមទៀត ​ដោយរួមមានទាំងយន្តហោះចម្បាំងផងដែរ ។

ជាមួយគ្នានោះ លោកលើកឡើងថា អ៊ុយក្រែន ក៏មាន​កិច្ច​ព្រម​ព្រៀង​ទ្វេភាគី​មួយ​ចំនួន​ទាក់ទងនឹង​បញ្ហា​យន្តហោះ​ចម្បាំង និង​យន្តហោះ​ផ្សេង​ទៀតផងដែរ ។ ប៉ុន្តែទោះជាយ៉ាងណា មេដឹកនាំអ៊ុយក្រែនរូបនេះ មិនទាន់បានផ្តល់ព័ត៌មានលម្អិតបន្ថែមទាក់ទងនឹងពេលវេលានៃការបញ្ជូនយន្តហោះទៅឲ្យអ៊ុយក្រែននោះទេ ។

យ៉ាងណាក្តី ក្នុងដំណើរ​ទៅអឺរ៉ុប លោក Zelensky បានទទួលការអបអរសាទរជាខ្លាំងពីសភាអ៊ឺរ៉ុប ដោយ​ក្នុងសន្ទរកថា លោកថ្លែងថា ការប្រយុទ្ធរបស់អ៊ុយក្រែន​ គឺជាសិទ្ធសេរីភាពរបស់អឺរ៉ុបទាំងមូល ។

គួរបញ្ជាក់ថា កាលពីពេលថ្មីៗនេះ លោក ពូទីន ក៏​ធ្លាប់បានព្រមានហើយ ប្រសិនបើប្រទេសសហភាពអឺរ៉ុបណាមួយ ហ៊ានផ្តល់យន្តហោះចម្បាំងដល់អ៊ុយក្រែន នោះពិភពលោក នឹងជួបផលវិបាកមិនខាន ៕

ប្រែសម្រួលដោយ ៖ នាង រតនៈ

ប្រភព ៖ Al Jazeera

ចុចអាន ៖ អ៊ុយក្រែន ត្រៀមប្រើមីស៊ីល អង់គ្លេស វាយប្រហារឧបទ្វីប Crimea