ថៃ រកឃើញប្រហិតផ្ទុកសារធាតុគីមីហាមឃាត់ ដែលចែកចាយលក់ក្នុងទីផ្សារជាង៤០រួចទៅហើយ

សាលាអន្តរជាតិមួយក្នុងខេត្ត Pathum Thani ប្រទេសថៃ ត្រូវបានគេព្រមានមិនឲ្យយកប្រហិតដែលខ្លួនទើបតែទិញ ទៅធ្វើអាហារថ្ងៃត្រង់សម្រាប់សិស្ស បន្ទាប់ពីមានការវាយឆ្មក់លើរោងចក្រផលិតប្រហិតម៉ាក “Peekaboo”។ នេះបើតាមការបញ្ជាក់ពី មន្ត្រីនៃរដ្ឋបាលចំណីអាហារ និងឱសថ (FDA) កាលពីថ្ងៃសៅរ៍ទី១៨ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីនិយាយថា ការធ្វើតេស្តដំបូងបានរកឃើញថា ប្រហិត Peekaboo មានផ្ទុកសារធាតុ Borax (បូរ៉ាក់) ដែលត្រូវបានហាមឃាត់។

រោងចក្រនេះបានដំណើរការប្រហែល២ឆ្នាំមកហើយ ដោយអាចផលិតប្រហិតបានរហូតដល់៨០០គីឡូក្រាមក្នុងមួយថ្ងៃ មុនការវាយឆ្មក់កាលពីថ្ងៃព្រហស្បតិ៍ទី១៦ខែកុម្ភៈ។

រោងចក្រនេះ បានចែកចាយ​ប្រហិត Peekaboo លក់នៅ​ផ្សារ​សើម​ជាង៤០ ក្នុង​ទីក្រុង​បាងកក ខេត្ត Pathum Thani, Nonthaburi និង Samut Prakan។

មន្ត្រី FDA និងប៉ូលិសបានធ្វើសកម្មភាពបន្ទាប់ពីទទួលព័ត៌មានថា រោងចក្រដែលមានទីតាំងនៅស្រុក Khong Luang មួយនេះ មិនគោរពតាមបទប្បញ្ញត្តិផលិតកម្មសុវត្ថិភាពចំណីអាហារ។

រោងចក្រ​ក៏​បាន​ប្រើប្រាស់​សារធាតុ​រក្សា​ទុក​អាហារ​ច្រើន​ហួសហេតុ និង​មិន​បាន​ធ្វើ​ការ​ត្រួតពិនិត្យ​គុណភាពផងដែរ។

ក្រុមមន្ត្រី​រឹបអូស​បាន​សាច់​ប្រហិត​ជាង​៣០​បាវ សាច់ជ្រូកនិង​សាច់មាន់​១៣​គីឡូក្រាម កញ្ចប់​សារធាតុគីមីសម្រាប់ការធ្វើឲ្យចំណីអាហារទុកបានយូរ និង​ម៉ាស៊ីន​ធ្វើ​ប្រហិត​ចំនួន​៣​ដែល​មាន​សាច់ប្រហិត​​នៅក្នុង​នោះ​៕

ប្រែសម្រួល៖ Vann Vann

ប្រភព៖ Nation

ចុចអាន៖ ថៃ ចុះបិទរោងចក្រផលិតសាច់ប្រហិត-សាច់ជ្រូក បន្ទាប់ពីរកឃើញផ្ទុកសារធាតុរក្សាទុកលើសស្តង់ដារ