ប៉ុន្មានលើកហើយដែល ថៃ រៀបចំកិច្ចប្រជុំក្រៅផ្លូវការដោះស្រាយវិបត្តិនៅ មីយ៉ាន់ម៉ា?

ប្រទេសថៃកាលពីពេលថ្មីៗនេះបានធ្វើជាម្ចាស់ផ្ទះកិច្ចប្រជុំក្រៅផ្លូវការស្ដីពីការដោះស្រាយវិបត្តិនៅមីយ៉ាន់ម៉ាដែលរៀបចំឡើងក្រោមរដ្ឋាភិបាលចាំផ្ទះរបស់លោក ប្រាយុទ្ធ ចាន់អូចា ប៉ុន្តែមិនទទួលបានលទ្ធផលផ្លែផ្កាអ្វីនោះឡើយ ។

ទោះយ៉ាងណា នេះមិនមែនជាលើកដំបូងទេដែលប្រទេសថៃក្រោមការដឹកនាំរបស់លោកនាយករដ្ឋមន្ត្រីផុតអាណត្តិ ប្រាយុទ្ធ ចាន់អូចា បានរៀបចំកិច្ចប្រជុំក្រៅផ្លូវការបែបនេះ ។

ប្រទេសថៃបានរៀបចំកិច្ចប្រជុំក្រៅផ្លូវការជាច្រើនលើករួចមកហើយស្តីពីការដោះស្រាយវិបត្តិនៅប្រទេសមីយ៉ាន់ម៉ាទាំងក្នុងទម្រង់ និងកម្រិតផ្សេងៗគ្នា រួមទាំងនៅថ្នាក់រដ្ឋមន្ត្រីចំនួន ២ លើកផងដែរកាលពីពេលកន្លងមក ។

ទន្ទឹមនោះ រដ្ឋាភិបាល​របស់​លោក ប្រាយុទ្ធ ក៏ធ្លាប់បាន​ធ្វើ​ជា​ម្ចាស់​ផ្ទះ​នៃ​កិច្ច​ប្រជុំ​មិន​មែន​អាស៊ានពាក់ព័ន្ធនឹងបញ្ហាមីយ៉ាន់ម៉ាកាលពីខែធ្នូឆ្នាំមុន និងកិច្ចសន្ទនាតុមូលកាលពី​ខែ​មីនាឆ្នាំនេះផងដែរ ខណៈកិច្ច​ប្រជុំ​ថ្នាក់​រដ្ឋមន្ត្រី​មួយ​ទៀតគឺ​មិនត្រូវបានគេ​ដឹង​ជា​សាធារណៈឡើយ ។

យោងតាមអ្នកជំនាញបានឲ្យដឹងថា កិច្ចប្រជុំក្រៅផ្លូវការដែលរៀបចំឡើងដោយរដ្ឋាភិបាលចាំផ្ទះរបស់ប្រទេសថៃស្តីពីវិបត្តិមីយ៉ាន់ម៉ា បានត្រឹមតែផ្តល់នូវតំបន់សុខស្រួលសម្រាប់យោធាឆ្លងកាត់ព្រំដែនប៉ុណ្ណោះ ប៉ុន្តែបានប៉ះពាល់យ៉ាងខ្លាំងដល់កេរ្តិ៍ឈ្មោះជាអន្តរជាតិរបស់ប្រទេសថៃ និងការបែកបាក់កាន់តែស៊ីជម្រៅទៅវិញទេនៅក្នុងប្លុកអាស៊ាន ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ សភាជាតិ ថៃ នឹងបើកសម័យប្រជុំនៅដើមខែក្រោយ បន្ទាប់ពីអនុម័ត លទ្ធផលបោះឆ្នោតផ្លូវការ