Breaking News! បក្សភឿថៃ ប្រមែប្រមូលបាន ៦ គណបក្សទៀតចូលក្នុង​ក្រុមចម្រុះ កើនសំឡេង ២២៨ អាសនៈ

គណបក្សភឿថៃ ដែលកំពុងរួមដៃគ្នាជាមួយបក្សភូមិចៃថៃដើម្បីព្យាយាមបង្កើតរដ្ឋាភិបាលថ្មី នៅថ្ងៃពុធនេះបានបន្ថែមគណបក្សចំនួន ៦ ទៀតចូលទៅក្នុងក្រុមចម្រុះ ដោយធ្វើឲ្យពួកគេកាន់តែមានសំឡេងភាគច្រើននៅក្នុងសភាជាន់ទាប ។

គណបក្សទាំង ៦ ដែលបានប្រកាសចូលរួមជាផ្លូវការជាមួយក្រុមចម្រុះដែលដឹកនាំដោយបក្សភឿថៃរួមមាន គណបក្សប្រាឆាឆាត, សេរីរួមថៃ, ភឿថៃ រួមប៉ាឡាំង, ប៉ាឡាំងសង្គមម៉ៃ, គណបក្សស្រុកថៃ និងគណបក្សឆាតផាតាណាខ្លា ខណៈបើបូកចូលគ្នា គណបក្សទាំង ៨ រួមគ្នាបាន ២២៨ អាសនៈនៅក្នុងសភាដែលមាន ៥០០ អាសនៈ ។

ទន្ទឹមនោះ ក្រៅពីគណបក្សទាំង ៦ នេះហើយ បក្សភឿថៃក៏នឹងត្រៀមប្រកាសសមាជិកបន្ថែមទៀតក្នុងពេលឆាប់ៗនេះផងដែរ ខណៈគណបក្សរបស់កូនស្រីលោក ថាក់ស៊ីន មួយនេះ គ្រោងនឹងជួបចរចាជាមួយគណបក្សឆាតថៃផាតាណា ដែលមាន ១០ អាសនៈនៅថ្ងៃព្រហស្បតិ៍នេះផងដែរ ។

គួរបញ្ជាក់ថា បើមិនមានអ្វីប្រែប្រួលទេនោះ សម័យប្រជុំរួមគ្នានៃរដ្ឋសភា និងព្រឹទ្ធសភាថៃដើម្បីបោះឆ្នោតជ្រើសរើសនាយករដ្ឋមន្ត្រីទី ៣០ របស់ប្រទេស អាចនឹងប្រព្រឹត្តទៅចន្លោះថ្ងៃទី១៨ ឬថ្ងៃទី១៩ ខែសីហា ពោលរយៈពេល ៣ ថ្ងៃ ក្រោយតុលាការធម្មនុញ្ញធ្វើសេចក្ដីសម្រេចលើញត្តិទាក់ទងនឹងការបន្ត ឬដកសិទ្ធិលោក Pita លែងឲ្យឈរឈ្មោះជានាយករដ្ឋមន្ត្រីឬយ៉ាងណា ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ គណបក្ស ៣ ទៀតបង្ហាញជំហរចូលរួមបង្កើតរដ្ឋាភិបាលថ្មីជាមួយ បក្សភឿថៃ